თუმცა, ბორჯომში ერთ-ერთი მოზარდი ცუდად შეიქნა. შემთხვევის ადგილზე სასწრაფო-სამედიცინო სამსახურის ბრიგადა გამოიძახეს. 18 წლის ახალგაზრდას ჯანმრთელობის მდგომარეობა იმდენად მძიმე იყო, რომ აუცილებელი გახდა ბორჯომის საავადმყოფოს რეანიმაციულ განყოფილებაში მისი გადაყვანა, მოგვიანებით კი მოზარდს დიაგნოზი: მწვავე ინტოქსიკაცია დაუსვეს და უგონო მდგომარეობაში მყოფი კატასტროფის მანქანით ბორჯომიდან თბილისში გადაიყვანეს.
როგორც გიორგი ტ-ს მეგობრები ჰყვებიან, მათ გადაწყვიტეს, გამოსაშვები საღამო არ გადაეხადათ და სამდღიან ექსკურსიაზე ვარძიაში წასულიყვნენ.
“8 ივნისს, გამთენიისას, ავტობუსში ჩავსხედით და დავიძარით. კლასის დამრიგებელმა, გაუგებრობის გამო, უარი თქვა ექსკურსიაზე წამოსვლაზე და მის გარეშე წავედით”, _ ამბობენ გიორგის თანაკლასელები.
11 საათისთვის, ახალგაზრდებმა ბორჯომის პარკში გასეირნება და გართობა გადაწყვიტეს. რამდენიმე წუთში მათ გიორგიმ უთხრა, რომ შეუძლოდ იყო და მიკროავტობუსში დაისვენებდა.
“მასწავლებელი გაჰყვა, ცუდად არ გახდესო. ბიჭებმა გზაში არაყი დალიეს და ნასვამები იყვნენ. გიორგიმ ჩაიძინა. როცა გზის გაგრძელება გადავწყვიტეთ, მის გაღვიძებას შევეცადეთ, თუმცა, სახეში გალაწუნებაზეც აღარ რეაგირებდა. ამის შემდეგ სასწრაფო-სამედიცინო სამსახურს დავუკავშირდით. ექიმებმა გიორგი გონს ვერ მოიყვანეს და ბორჯომის საავადმყოფოში გადაიყვანეს”, _ თქვეს მოზარდებმა.
როგორც მათ აღნიშნეს, გიორგის წნევა დაუვარდა და კრუნჩხვებში ჩავარდა, ექიმებმა თბილისიდან კატასტროფის ცენტრის ბრიგადა გამოიძახეს და მისი დედაქალაქში გადაყვანა უზრუნველყვეს.
როგორც გიორგის დედა გვიყვება, ახლა მისი შვილის მდგომარეობა სტაბილურად მძიმეა: “ოთხი დღის განმა თუნდაცლობაში, რეანიმაციაში, აპარატზე ჰყავდათ მიერთებული, დღეს პალატაში გადაიყვანეს, თუმცა, რამდენიმე დღეა საჭირო, რომ გაირკვეს, დაძლია თუ არა კრიზისი”, _ გვითხრა სატელეფონო საუბარში დედამ.
მოზარდს თბილისში, #5 საავადმყოფოში მკურნალობენ. როგორც დედამისი ამბობს, მისი ოჯახი სიღარიბის ზღვარს მიღმა მყოფი ოჯახების კატეგორიას განეკუთვნება და სამედიცინო კომპანია “ალფაში” არიან დაზღვეულები, თუმცა, როგორც თავად ამბობს, სადაზღვევო კომპანია მკურნალობის ხარჯების გაღებას არ აპირებს და ეს ხარჯები ოჯახმა უნდა დაფაროს: “მართალია, ახლა ამის გარკვევა ნამდვილად არ შემიძლია, მაგრამ, იქნებ, დამეხმაროთ და გამიგოთ, თუ არ აფინანსებს “ალფა” მისი კლიენტის სამედიცინო ხარჯებს, რაში მჭირდება ეს პოლისი?”
როგორც მან აღნიშნა, მისი უფროსი შვილი უნარშეზღუდულია _ ორივე ფეხების ამპუტაცია წლების წინ გაუკეთეს. ასევე, ავად არის მისი მეუღლე და ოჯახი მძიმე ეკონომიკურ მდგომარეობაშია.
“რეანიმაციის განყოფილებაში ერთი ღამე 550 ლარი ღირს. ოთხი ღამე იწვა გიორგი იქ უგონო მდგომარეობაში, აპარატზე მიერთებული. რეანიმობილის ხარჯები ჩვენ დავფარეთ. ჯერჯერობით, არ დაუანგარიშებიათ, რამდენი გვაქვს გადასახდელი, თუმცა, დანამდვილებით შემიძლია გითხრათ, რომ ერთი თეთრის გადახდის საშუალება არ მაქვს. როგორც ვიცი, აქ ღამეში 380 ლარი უნდა გადავიხადოთ”, _ ამბობს ქალბატონი.
ამის გამო, მოზარდის თანაკლასელები ორი დღის განმავლობაში, ოზურგეთის ქუჩებში შემწეობას ითხოვდნენ და ამ გზით 1200 ლარის შეგროვება მოახერხეს.
“დღეს გავუგზავნეთ თეთრებით შეგროვილი თანხა, იქნებ წამლისთვის მაინც წაადგეს. ხალხი დაგვეხმარა, ვისაც რა საშუალება ჰქონდა იმით, თუმცა, ფულის შეგროვებას ისევ განვაგრძობთ”, _ ამბობენ გიორგის თანაკლასელები.
ჩვენ ვცდილობდით, გაგვერკვია, რა მოტივით უთხრა უარი სადაზღვევო კომპანიამ გიორგის დედას სამედიცინო ხარჯების დაფარვაზე, მაგრამ სადაზღვევო კომპანია “ალფას” ოფიციალურ ვებ-გვერდზე მითითებულ ტელეფონის ნომერზე _ 2987860, რომელიც საზოგადოებასთან ურთიერთობის სამსახურის განყოფილებას ეკუთვნის, არავინ გვიპასუხა.
როგორც “გურია ნიუსთან” სატელეფონო საუბარში ექსპერტმა ეკონომიკის საკითხებში ლევან კალანდაძემ აღნიშნა, ასეთ შემთხვევაში არის ერთადერთი გზა: _ უნდა დაუკავშირდეთ ჯანდაცვის სამინისტროს მედიაციის სამსახურს, რომელიც აგვარებს დავებს კლიენტსა და სადაზღვევო კომპანიას შორის. წერილობით უნდა მიმართოთ ამ სამსახურს. იგი განიხილავს განცხადებას და დავას, ან კლიენტის, ან სადაზღვევო კომპანიის სასარგებლოდ გადაწყვეტს. ზოგადად, სადაზღვევო კომპანიებს ახასიათებთ გულგრილი დამოკიდებულება მომხმარებლებთან დაკავშირებით _ თუ შეამჩნევენ, რომ შესაძლებელია, კლიენტს კუთვნილ სადაზღვევო მომსახურებაზე უარი ათქმევინონ, ამ შანსს ხელიდან არ გაუშვებენ და არ არის გამორიცხული კონკრეტულ შემთხვევაში ამ ხერხს მიმართონ კიდეც. თუმცა, ეს უკვე დამოკიდებულია მედიაციის სამსახურის აქტივობაზე, _ გვითხრა ლევან კალანდაძემ.
“მედიაციის ცენტრი” სახელმწიფო სტრუქტურაა, რომელიც იმ მოქალაქეებს ემსახურება, რომლებიც ამა თუ იმ სადაზღვევო კომპანიებთან პრობლემებს აწყდებიან. თუმცა, როცა ამ სტატიას ვამზადებდით, მედიაციის ცხელი ხაზის ოპერატორი გვპასუხობდა, რომ სამუშაო დღეები ორშაბათიდან პარასკევის ჩათვლითაა და ისიც 10 საათიდან 18 საათამდე.
ოზურგეთის რესურსცენტრის უფროსი ლელა იმედაშვილი ამბობს, რომ 2011 წლის 8 ივნისს, ოზურგეთის მუნიციპალიტეტის ბოხვაურის საჯარო სკოლის კურსდამთავრებულებმა მიიღეს გადაწყვეტილება, წასულიყვნენ ექსკურსიაზე მარშრუტით ოზურგეთი-ვარძია-ოზურგეთი: _ როგორც ჩემთვის ცნობილია, ბორჯომში, ერთ-ერთი მოსწავლე _ გიორგი ტ-ი ცუდად გახდა. თანმხლებმა პირებმა გამოიძახეს სასწრაფო-სამედიცინო დახმარების ბრიგადა და გადაიყვანეს ბორჯომის საავადმყოფოში. იქ გამოძახებული იქნა რეანიმობილი და თბილისში, ჟვანიას სახელობის კლინიკაში მოათავსეს. რამდენადაც ჩემთვის ცნობილია, ბავშვის მდგომარეობა ამჯერად სტაბილურია. ცუდად გახდომის მიზეზები ჩემთვის უცნობია. თუმცა, მე იმავე ღამეს შევხვდი გიორგის თანაკლასელებს და თანმხლებ პირებს. ისინი ჩემთან საუბარში მიზეზად არყის მიღებას ასახელებდნენ, _ გვითხრა იმედაშვილმა.
ამჟამად გიორგის ფილტვების ანთებაც აქვს და საავადმყოფოში მკურნალობენ. მისი ოჯახი გროშებს აგროვებს და ყველა ღონეს ხმარობს, შვილს სიცოცხლე შეუნარჩუნოს.
“გურია ნიუსი” ამ თემას ისევ მიუბრუნდება და შეეცდება, მოიპოვოს მედიაციის ცენტრისა და სადაზღვევო კომპანია “ალფას” წარმომადგენლების კომენტარები.
