ჩვენ შევეცადეთ ეს, ინფორმაციები ქალაქში და სოფელშიც, შესაბამისად, ერთ-ერთ უბანზე გადაგვემოწმებინა ფაქტებით და ჩანაწერებით. ერთი ასეთი აღმოჩნდა ოზურგეთის მუნიციპალიტეტის სოფელ დვაბზუს #60 -ში შემავალი 25 -ე უბანი, სადაც ოჯახში ძალიან ბევრი მიწერილი ადამიანი აღმოჩნდა, რაც თავად იმ ოჯახის წვერებმაც დაგვიდასტურეს. ასევე ქალაქში # 1 უბანზე გარდაცვლილის სახელზე მოსულია ამომრჩევლის ბარათიც.
სოფელ დვაბზუს 60/25 საუბნო კომისიის თავმჯდომარე ზაირა გურაშვილი “გურია ნიუსთან” ადასტურებს აღნიშნულ ინფორმაციებს და ფაქტებს და ამბობს, რომ საუბნო კომისია ძველი სიებით ხელმძღვანელობს და გაუგებრობა ნამდვილად არის. თუმცა, ხდება შესწორება. ოზურგეთის #60 საარჩევნო ოლქის თავმჯდომარე ზვიად თენიეშვილი კი აცხადებს, რომ ასეთი რამ გამორიცხულია.
ოზურგეთში, კოსტავას ქუჩაზე მდებარე მრავალსართულიანი ბინების მიმდებარე ტერიტორიაზე, ერთ-ერთ სავაჭრო ჯიხურში მომუშავე გ. ფუტკარაძე ამბობს, რომ საკუთარი თვალით ნახა, სიაში როგორ ეწერა მისივე გარდაცვლილი მეზობელი.
“მე ვმუშაობ მაღაზიაში და აქ მომიტანეს ამომრჩევლების ბარათები, რომ შუქის გადასახად ქვითრებთან ერთად წაეღოთ. იქ ისეთი გვარ-სახელები ვნახე, რომ საერთოდ არ ცხოვრობენ ამ უბანზე ან ბევრი მკვდარია. მაგალითად, ვახტან ბასილაშვილი წერია, რომელიც 4 წელია გარდაცვლილია.”
ოზურგეთის მუნიციპალიტეტის სოფელ დვაბზუში მცხოვრები ლუიზა ღლონტის ოჯახში, რძალი თამარ ღლონტი “გურია ნიუსთან” ადასტურებს ინფორმაციას, რომ მათ ოჯახში მართლაც იყო მიწერილი არარსებული ადამიანები.
“ვიღაც მადონა ღლონტი არის მიწერილი, ეს ვიცი. ნამდვილად მითხრეს, აქ ჩემი მეზობლებია დობორჯგინეძეები, მათ ოჯახზე თორნიკე დარჩიაა მიწერილი. ზუსტად ვიცი, ახლა სახლში არაა. მე ადრე დვაბზუს საკრებულოში ვმუშაობდი მდივნად და ვიცი ყველა ოჯახის შესახებ. ძალიან ბევრი ადამიანია მიწერილი.”
ზურაბ გოგუაძის ოჯახში ქალბატონი ნაზი გვპასუხობს, რომ მათ ოჯახზე ელზა და ირმა ჩავლეშვილებია მიწერილი.
ზაირა გურაშვილი, 60/25 საუბნო საარჩევნო კომისიის თავმჯდომარე:
_ ამასთან დაკავშირებით ვცდილობთ, სიები შევასწოროთ. ძირითადად, არარსებულები კი არ არიან, არამედ არიან სხვა უბნის მცხოვრებლები. ახლა გაყოფილია უბნები. კი, ნამდვილად არის ასეთი ფაქტები. დვაბზუში 161 კაცის სია ამოვწერეთ, შევასწორეთ და გავაგზავნეთ ოლქში, ჩვენი მაცხოვრებლებიც არიან გაღმა დვაბზუში ჩაწერილები, არის ასეთი შემთხვევებიც.
_ რა არის ამის მიზეზი, რატომ არის სიებში გაუგებრობა?
_ რა ვიცი, რა გითხრათ, ეს სიები არის ძველი, ბრუნავს, რამდენიმე წელია.
_მაინც?
_რაც საკომლო წიგნები გაუქმდა, იმის მერე ამ სიებით ხელმძღვანელობენ, თუმცა ხდება ჩასწორება, ვმუშაობთ ამაზე.
_შარშანაც ამ სიებით ხელმძღვანელობდნენ?
–კი, ნამდვილად ასე იყო, მე შარშან კომისიის წევრი ვიყავი. შარშანაც ვასწორებდით, დიდ იმედს ვერც ახლა გეტყვით, თუ შემოვა შესწორებული სიები, არ ვიცი, ჩვენი მცხოვრებლებიც არიან გაღმა დვაბზუში მიწერილი.
ზვიად თენიეშვილი, ოზურგეთის #60 საარჩევნო ოლქის თავმჯდომარე:
_ არ მგონია, ასე იყოს. რას ჰქვია, სიები არეულია? ყველაფერი დალაგებულია, რას ჰქვია მიწერილია, ვერ გავიგე? _
_ ბატონო ზვიად, ოჯახბში სიებზე მიწერილია ისეთი ადამიანები, რომლებიც ფაქტიურად იქ არ ცხოვრობენ.
_ ვინ გითხრათ, კაცო, რას ჰქვია, აბა მითხარი, ვინ არის, შეგიძლიათ, დამისახელოთ?
_რა თქმა უნდა, ახლავე დაგისახელებთ.
_აუ, გამორიცხულია რა! მე ახლა გზაში ვარ, თბილისიდან მოვდივარ, ასე ზეპირად ვერ გეტყვი, ხვალ მოდი, ერთად გადავამოწმოთ და მაშინ გავაკეთებ კოემნტარს ამასთან დაკავშირებით. წინა არჩევნებზე 43 000 კაცი იყო და პრეტენზიით არცერთი მოსულა, მიწერილია ვინმეო. ახლა საიდან გაჩნდა? ერთი ადამიანიც არ დაფიქსირებულა, რომ სიაში არ ყოფილიყოს, – გვითხრა ზვიად თენიეშვილმა.
