კანონპროექტის მიზანია, სამართლებრვი მექანიზმების შემუშავება, რომელიც მოსახლეობის დაცვასა და პირველადი დახმარების აღმოჩენას ითვალისწინებს, იძულებით გადაადგილების მთელ პერიოდში.
კანონპროექტი ასევე, დევნილის რეგისტრაციის ადგილისა და დევნილის ფაქტობრივი საცხოვრებელი ადგილის განმარტებებს ადგენს, რომლის თანახმად ყალიბდება ერთიანი მიდგომა იძულებით გადაადგილების პერიოდში, დევნილთა საცხოვრებელი ადგილების საკითხზე. შესაბამისად, ამ ტერმინის მიზანია, ერთ დევნილზე შემწეობა 45 ლარის ოდენობით გაიცეს, რომელიც როგორც ელექტროენერგიის ასევე, სხვა სახის კომუნალურ გადასახადებს მოიცავს.
ამჟამად მოქმედი კანონმდებლობის თანახმად, დევნილთა კომპაქტურად განსახლების ობიექტში მაცხოვრებელ ერთ დევნილზე სახელმწიფო ბიუჯეტიდან 22 ლარი ირიცხება, როგორც შემწეობა და ერთი დევნილის მოხმარებული ელექტროენერგიის საფასურის დაფინანსება, რომელიც თბილისში არაუმეტეს 10.2 ლარია, ხოლო საქართველოს სხვა რეგიონში არაუმეტეს 5 ლარი. რაც შეეხება კერძო სექტორში მცხოვრებ დევნილებს, ამ შემთხვევაში ერთ მათგანზე დევნილის შემწეობა 28 ლარი გაიცემა.
აღნიშნული კანონპროექტის თანახმად, იცვლება დევნილთა საცხოვრებელ ფართთან დაკავშირებული უფლებები და საცხოვრებელ ფართიდან გამოსახლების მარეგულირებელი დებულებები. ვინაიდან კანონპროექი არა ცნობს ტერმინს “დევნილთა კომპაქტურად განსახლების ობიექტი” და კანონპროექტში გამოიყენება ტერმინი “მართლზომიერ მფლობელობაში გადაცემული საცხოვრებელი ფართი”. კანონპროექტით ასევე განსზღვრულია, თუ რომელი საცხოვრებელი ფართები წარმოადგენენ “მართლზომიერ მფლობელობაში გადაცემულ საცხოვრებელს.”
“დევნილთა და განსახლების სამინისტროს” ინფორმაციით, 2013 წლის ივნისის თვის მონაცმებით, საქართველოში დევნილის სტატუსი 271 592 პირს აქვს. აქედან 32 349 სიღარიბის ზღვარს ქვემოთ იმყოფება, ხოლო 239 243 დევნილი შემწეობის მიმღები.
კანონპროექტის მიზანია დევნილის შემწეობა 45 ლარი გახდეს, რომელსაც პირი საკუთარი შეხედულებისამებრ გამოიყენებს. შესაბამისად, აღარ მოხდება კომუნალური ხარჯების ანაზღაურება სახელმწიფო ბიუჯეტიდან და გამოთავისუფლდება ამისთვის გამოყოფილი 758 484,52 ლარი, ხოლო წელიწადში – 9 101 815 ლარი.
აღნიშნულის გათვალისწინებით, დღეისთვის დევნილთა შემწეობისა და მათი კომუნალური ხარჯების ანაზღაურების დაფარვის მიზნით, ბიუჯეტიდან 86 904 463 ლარია მიმართული.
ხოლო კანონპროექტში შესატანი ცვლილებების დამტკიცების შემდეგ, დევნილის სტატუსის მატარებელ 239 243 პირზე დევნილის შემწეობის 45 ლარის ოდენობით გაცემის მიზნით, ბიუჯეტიდან თვეში 10 765 935 ლარი იქნება გამოსაყოფი, რაც წელიწადში 129 191 220 ლარს შეადგენს.
