სანამ აღნიშნული ცვლილებები ამოქმედდებოდა, საპარლამენტო უმრავლესობის წარმომადგენლები აღნიშნავდნენ, რომ ეს ცვლილებები სახიფათო იყო და უნდა შექმნილიყო კომისია, რომელიც საკონსტიტუციო ცვლილებებზე იმუშავებდა.
პარლამენტის იურიდიულ საკითხთა კომიტეტის თავმჯდომარე ვახტანგ ხმალაძე კონსტიტუციის იმ პრობლემურ მუხლებზე საუბრობდა, რომლებიც 2013 წლის ოქტომბრიდან უნდა ამოქმედებულიყო და რომელთა შეცვლასაც პარლამენტი ამოქმედებამდე შეეცდებოდა.
“მთავრობას ქმნის პარლამენტი, მაგრამ ამისთვის შეიძლება საჭირო გახდეს სამთვიანი მოქმედებები, თუმცა მას შემდეგ, რაც პარლამენტი დაამტკიცებს მთავრობას, პრემიერს 15 წუთში შეუძლია მოხსნას ესა თუ ის მინისტრი და მთლიანი მთავრობა შეცვალოს პარლამენტთან დაუკითხავად.
მთავრობისთვის უნდობლობის გამოცხადებას ჭირდება პარლამენტში 60%-იანი უმრავლესობა, რაც არასწორია. თუკი პარლამენტი მთავრობას უმრავლესობით უცხადებს ნდობას, ასეთივე უმრავლესობით უნდა შეეძლოს მას უნდობლობის გამოცხადება. არსებული პარლამენტის პირობებში 60%-იანი უმრავლესობა, ეს არის 90 დეპუტატი. ამ დროისთვის ქართულ ოცნებას, ანუ უმრავლესობას, ახლადშესული დეპუტატებიანად ჰყავს 86 პარლამენტარი”, _ აცხადებდა ხმალაძე და დასძენდა, რომ ქვეყანაში სუპერ პრეზიდენტის ან სუპერ პრემიერის არსებობა არაა საჭირო.
სახელმწიფო საკონსტიტუციო კომისია, რომელსაც ახალი საკონსტიტუციო რეფორმა უნდა განეხორციელებინა, ივლისსში უნდა შექმნილიყო.
პარლამენტის თავმჯდომარე დავით უსუფაშვილი აცხადებდა, რომ კომისიაში შევიდოდნენ არა მხოლოდ საპარლამენტო პოლიტიკური ძალები, არამედ არასაპარლამენტო პარტიების წარმომადგენლები, ექსპერტები და არასამთავრობო ორგანიზაციები. გარდა ამისა, უსუფაშვილის განმარტებით, საკონსტიტუციო კომისიას, რომლის დეკლარირებული მიზანიც საკონსტიტუციო ხარვეზების გასწორება უნდა ყოფილიყო, დახმარებას საერთაშორისო ექსპერტებიც გაუწევდნენ.
აღნიშნულ კომისიას უნდა ემუშვა ცვლილებზე, რომლის მიხედვით პრემიერ-მინისტრს უფლება არ ექნებოდა პარლამენტისგან დამოუკიდებლად მთავრობის შემადგენლობა შეეცვალა.
რა მდგომარეობაა 5 თვის შემდეგ და რჩება თუ არა ძალაში აღნიშნული კომისიის შექმნა, რომელიც პრემიერის უფლებების შეზღუდვაზე იმუშავებს, უცნობია. თუმცა, ცნობილია, რომ საკონსტიტუციო კომისია ჯერ არ ჩამოყალიბებულა.
საპარლამენტო უმრავლესობის წარმომადგენელი და იურიდიული კომიტეტის თავმჯდომარის მოადგილე შალვა შავგულიძე “გურია ნიუსთან” საუბრისას აღნიშნავს, რომ კომისიის ჩამოყალიბება დაწყებულია.
“ეს კომისია ჯერ არ შექმნილა, მაგრამ შეიქმნება. თუმცა, ზუსტად ვერ გეტყვით როდის. უკვე გამოიკვეთა ვინ იქნებიან წევრები, ფრაქციებმა წარადგინეს კანდიდატები. კომისიას დავით უსუფაშვილი უხელმძღვანელებს”, _ ამბობს შავგულიძე.
მისივე თქმით, აღნიშნული კომისია კონსტიტუციურ ცვლილებებზე იმუშავებს, თუმცა ჯერ ცნობილი არაა კონკრეტულად იქნება თუ არა საუბარი პრემიერის უფლებების შემცირებაზე, ან პრეზიდენტის უფლებამოსილებების გაზრდაზე.
“ახალი მემარჯვენეების” ლიდერი ფიქრია ჩიხრაძე მიიჩნევს, რომ თუ კომისია არ შეიქმნა და მან პრემიერ-მინისტრის უფლებამოსილებების გადახედვა არ დაიწყო, ამით მმართველი კოალიცია კიდევ ერთ ფუნდამენტალურ წინასაარჩევნო დაპირებას დაარღვევს.
“საკონსტიტუციო კომისიის შექმნა ერთ-ერთი მნიშვნელოვანი საკითხი გახლავთ. ძალიან ვიყავი ამ საკითხით დაინტერესებული და საკმაოდ მაღალი თანამდებობის პირისგან მაქვს ინფორმაცია მიღებული, რომ ნოემბრის ბოლოს, როდესაც ახალი პრეზიდენტის ინაუგურაცია ჩატარებული იქნებოდა, პარლამენტს უნდა მიეღო დებულება და ამ კომისიის შემადგენლობა უნდა დამტკიცებულიყო. როგორც ჩანს, რაღაც შეიცვალა ამ თვალსაზრისით, რაც ძალიან ცუდია, რადგან ჩვენ მუდმივად გვქონდა სახელისუფლებო შტოების დაუბალანსებლობის პრობლემა და ეს კვალაც რჩება. თუ ადრე გვყავდა პრეზიდეტი განუსაზღვრელი უფლებამოსილებებით, დღეს ასეთი პრემიერი გვყავს. თუ წინა ხელისუფლებამ თავისთვის გაიმზადა ეს მოდელი, “ქართულმა ოცნებამაც” არ დააკლო ხელი და ამ მიმართულებით კიდევ უფრო გაუზარდა უფლებები პრემიერს”, _ ამბობს “გურია ნიუსთან” საუბრისას ჩიხრაძე და დასძენს, რომ კონსტიტუცია არაა ერთი და ორი პოლიტიკური ძალის შეთანხმების საგანი, ამაზე ფართო საზოგადოებრივი თანხმობა უნდა არსებობდეს.
კონსტიტუციონალისტი ვახტანგ ძაბირაძე კი მიიჩნევს, რომ გადასახედი და შესაცვლელია არა მხოლოდ პრემიერის უფლებები, არამედ მთლიანად კონსტიტუცია, რადგან თითოეული საკითხი ერთმანეთთანაა მიბმული და საერთო ჯამში დემოკრატიულ სახელმწიფოს ქმნის.
“თუ წინა ხელისუფლების დროს პრეზიდენტი იყო ხელშეუვალი, დღეს უკვე პრემიერია იგივე სიტუაციაში. ეს კონსტიტუციის მხოლოდ ერთი ნაწილია, რომელიც შეცვლას და გადახედვას საჭიროებს. არის კიდევ სხვა საკითხები, რომელთა ცვლილებაც მნიშვნელოვანია. თუ მხოლოდ პრემიერს მივაბამთ ამ ცვლილებებს დ კომისიის შექმნას, ეს არ იქნება სწორი. დღევანდელი მთავრობა ისევე იქცევა როგორც სააკაშვილის მთავრობა”, _ ამბობს “გურია ნიუსთან” საუბრისას ძაბირაძე.
