აღსანიშნავია, რომ სასჯელაღსრულების სისტემაში მყოფი პირების პროტესტი მართლმსაჯულების ხარვეზების დამდგენი კომისიის შექმნის გადადებამ გამოიწვია, რომლის შესახებაც იუსტიციის მინირტმა თეა წულუკიანმა 28 ნოემბერს განაცხადა.
“ჩვენ კანონპროექტი მთავრობის ერთ-ერთ ბოლო სხდომაზე გავიტანეთ, თუმცა მიუხედავად იმისა, რომ კომისიის შექმნას არავინ ეწინააღმდეგება, მთავრობამ მიიჩნია, რომ ძალიან ფრთხილადაა გასათვლელი ის შედეგები, რაც შესაძლოა ეკონომიკური და ფინანსური თვალსაზრისით მივიღოთ, ვინაიდან თუკი ადამიანი გამართლებულად იქნება მიჩნეული და მას უკვე გაუჩნდება მატერიალური მოთხოვნის დაყენების უფლება, ამისთვის დღეს ჩვენი ქვეყნის ეკონომიკური, ფინანსური მდგომარეობა მზად არ არის.
ამ ერთადერთი მიზეზის გამო ჩაითვალა, რომ ეს ამ ეტაპზე ნაადრევია, თუმცა თავისთავად იდეა უარყოფილი არ ყოფილა”, _ განაცხადა თეა წულუკიანმა.
წულუკიანის აღნიშნულ განცხდებას არაერთგვაროვანი გამოხმაურება მოჰყვა საზოგადოებაში. არასამთავრობო ორგანიზაციების ნაწილმა და სახალხო დამცველმა გადაწყვეტილებას გაუმართლებელი უწოდეს.
საქართველოს ახალგაზრდა იურისტთა ასოციაცია აცხადებს, რომ ორგანიზაციისთის მიუღებელია როგორც კომისიის შექმნის გაურკვეველი ვადით გადადება, ასევე ის მიზეზები, რაც საფუძვლად დაედო ამ გადაწყვეტილებას. კერძოდ კი ის, რომ ქვეყანა, თავისი ეკონომიკური და ფინანსური მდგომარეობის გათვალისწინებით, მზად არ არის მსგავსი კომისიის შესაქმნელად.
“მოვუწოდებთ საქართველოს მთავრობას, გადახედოს მიღებულ გადაწყვეტილებას, გააანალიზოს თუ რა ფინანსურ რესურსს მოითხოვს ზემოაღნიშნული სამართლებრივი მექანიზმის ამოქმედება, შეიმუშაოს კომპენსაციის გონივრულ ვადაში გაცემის უზრუნველსაყოფად გასატარებელი ღონისძიებების დროში გაწერილი გეგმა და თავისი ძალისხმევა მის შესასრულებლად მიმართოს”, _ ნათქვამია ორგანიზაციის მიერ გავრცელებულ განცხადებაში.
საქართველოს სახალხო დამცველი უჩა ნანუაშვილი კი, მართლმსაჯულების ხარვეზების დამდგენი კომისიის შექმნის საკითხის გადადებას დაუშვებლად მიიჩნევს.
როგორც ნანუაშვილმა განაცხადა, მას ესმის, რომ კომისიის შექმნას ძალიან ბევრი სირთულე აქვს და არსებობს სერიოზული რისკები, თუმცა ხელისუფლებამ აუცილებლად უნდა შესთავაზოს საზოგადოებას და პირველ რიგში უკანონობის მსხვერპლ ათასობით ადამიანს რაღაც მექანიზმი, რომლის მეშვეობითაც მათი განაჩენების გადახედვა მოხდება.
“ჩვენ ყველამ ყველაფერი უნდა გავაკეთოთ იმისთვის, რომ რაღაც ფორმით ეს კომისია შეიქმნას, ამუშავდეს. იქ შეიძლება იყოს ბევრი განსხვავებული აზრი, მაგრამ ზოგადად ეს პროცესი უნდა გაგრძელდეს. ამის გაჩერება, ჩემი აზრით, დაუშვებელია”, _ განაცხადა უჩა ნანუაშვილმა.
წულუკიანის განცხადებას, რომ მართლმსაჯულების ხარვეზების დამდგენი კომისიის შექმნა გადაიდო, მეორე დღესვე, 29 ნოემბერს, პატიმართა პროტესტი მოჰყვა და თითქმის ყველა საპყრობილეში მათ შიმშილობა გამოაცხადეს.
მაშინ, “ყოფილი პოლიტპატიმრები ადამიანის უფლებებისათვის” ხელმძღვანელი ნანა კაკაბაძე აცხადებდა, რომ პატიმრები ვადამდელი საპარლამენტო არჩევნების ჩატარებას ითხოვენ.
“დღეს დილით დამირეკეს პატიმრებმა და მითხრეს, რომ მთელი სისტემის ფარგლებში იწყება შიმშილობა იმ განცხადებასთან დალავშირებით, რაც გუშინ იუსტიციის მინისტრმა გააკეთა, რომ მართლმსაჯულების ხარვეზების დადმდგენი კომისიის შექმნა შეჩერდა. პატიმრები ამბობენ, რომ ეს იყო მოტყუება და ისინი ამდენი ხანი ელოდნენ თუ როდის გადაიხედებოდა უკანონო საქმეები. ეს ხალხი არ თხოულობს გათავისუფლებას, მათ სურთ ჩაიხედონ რა ხდებობდა მათ საქმეებში და სასამართლომ იმსჯელოს. მათი მოთხოვნაა, რომ სამართლიანობა აღსდგეს და თუ ამას პარლამენტი ვერ ახერხებს დაინიშნოს ვადამდელი არჩევნები”, _ აცხადებდა “გურია ნიუსთან” საუბრისას კაკაბაძე.
სასჯელაღსრულების სამინისტროს მონაცემებით, ამ ეტაპზე 146 პატიმარს აქვს გამოცხადებული შიმშილობა.დღეისათვის პატიმრები რუსთავის მე-6, ქსნის მე-15, რუსთავის მე-17 და გლდანის მე-8 საპყრობილეებში შიმშილობენ.
როგორც სასჯელაღსრულების და პრობაციის სამინისტროში ამბობენ, სიტუაცია კონტროლს ექვემდებარება და საჭიროა პატიმრების მობილიზება, რათა ფიზიკური დაზიანებები თავიდან იქნეს აცილებული.
თუმცა, “ყოფილი პოლიტპატიმრები ადამიანის უფლებებისათვის” ხელმძღვანელი ნანა კაკაბაძე “გურია ნიუსთან” ამბობს, რომ მოშიმშილე პატიმრების მდგომარეობა უკიდურესად მძიმეა, სახელმწიფო და შესაბამისი უწყებები კი ამით არც ინტერესდებიან.
“მიუხედავად იმისა, რომ ხალხი უკვე მომაკვდავია და უმძიმეს მდგომარეობაში არიან, ხელისუფლებამ საერთოდ ყური არ შეიბერტყა ამასთან დაკავშირებით. მათ უარი თქვეს თავიანთი დანაპირების შესრულებაზე, რასაც ეს პროცესები მოჰყვა და მათი მხირდან არც არავინ შესულა პატიმრებთან და არ დალაპარაკებია. როგორც “ნაციონალებმა” იცოდნენ, რაიმეს იტყოდნენ და მერე უკან დაიხევდნენ, ისევე იქცევიან ესენიც. დღევანდელი ხელისუფელაც იგივეს იმეორებს.
მოშიმშილეებს შორის არიან დავადებულები სხვადასხვა ჰეპატიტებით და მათი ჯანმრთელობის მდგომარეობა ძალიან მძიმეა. მიუხედავად ამისა რეაგირება ხელისუფლებისგან არაა. ესაა ხალხის ხელისუფლება?!
ამ შიმშილობას შეიძლება ძლიან მალე ფატალური შედეგებიც მოჰყვეს და ხელისუფლება იმასაც კი არ ფიქრობს რა შეიძლება მოხდეს თუ იქ ვინმე ამ უბედურებას ემსხვერპლება”, _ ამბობს “გურია ნიუსთან” საუბრისას კაკაბაძე.
მისივე თქმით, დღეს პატიმრებმა დაურეკეს და უთხრეს, რომ მოშიმშილეების ნაწილი ნაცემია.
“დღეს დამირეკეს და იმის მაგივრად რომ სახელმწიფოს და ციხის ადმინისტრაციას რაიმე ქმედითი ნაბიჯები გადაედგათ, მოშიმშილეები მე-6 საპყრობილიდან მე-7-ში გადაიყვანეს. როგორც თვითონ ამბობენ ისინი ნაცემები არიან”, _ ამბობს კაკაბაძე.
რაც შეეხება ინფორმაციას, რომ მსჯავრდებულთა მოთხოვნა, გარდა მათი საქმეების გადახედვისა, 223-ე პრიმა მუხლის გაუქმებას ეხება, რომელიც “ქურდული სამყაროს” წევრობასთანაა დაკავშირებული, “ყოფილი პოლიტპატიმრები ადამიანის უფლებებისათვის” ხელმძღვანელი ამბობს, რომ გარკვეულ ჯგუფებს მართლაც აქვთ ასეთი მოთხოვნები.
“ამით მხოლოდ მანიპულირება ხდება. მართალია, პატიმრების ნაწილს აქვს სხვადასხვა მოთხოვნები, მაგრამ საერთო, ძირითადი მოთხოვნა მათი განაჩენების გადახევდაა”, _ ამბობს კაკაბაძე.
აღსანიშნავია, რომ სასჯელაღსრულების სამინისტროში ინფორმაციას მოშიმშილე პატიმრების ცემის ფაქტზე არ ადასტურებენ.
“სისულელელა! ასეთი რამეები წინა ხელისუფლების დროს ხდებოდა. დღეს ციხეებში პატიმართა უფლებები დაცულია”, _ უთხრა “გურია ნიუსს” სამინისტროს პრესსამსახურის ხელმძღვანელმა ირაკლი კორძაიამ.
