ბრიფინგი გაიმართა და საინიციატივო ჯგუფმა სრული შემადგენლობით, გარდა თავმჯდომარის _ მერაბ ქარჩავასი, პარტია დატოვა. როგორც მოსალოდნელი იყო, ბრიფინგზე სკანდალური განცხადებები გაკეთდა, მათ შორის, ფინანსებთან დაკავშირებით _ მერაბ ქარჩავას, მინიმუმ ფინანსების საკუთარი სურვილებით გამოყენებაში ადანაშაულებენ. “ქართული პარტიის” ლანჩხუთის ოფისის თავმჯდომარე ბრიფინგზე, როგორც მოსალოდნელი იყო, არ გამოჩენილა და მას არც შემდგომ არ გაუცია პასუხი ყოფილ თანაპარტიელთა ბრალდებებისთვის. ქარჩავა ჟურნალისტებისთვისაც მიუწვდომელია.
ბრიფინგზე, მედიის წარმომადგენელთა გარდა, მიწვეულები იყვნენ ლანჩხუთში არსებული ყველა ოპოზიციური პარტიის წარმომადგენლები, მაგრამ გარდა “თავისუფალი დემოკრატების” წარმომადგენლი ელგუჯა ჩხაიძის გარდა, არავინ მოსულა.
“რასაც ხელისუფლებას ვედავებით, ის ოპოზიციას უნდა ვაპატიოთ?! როცა დავპირდით მიკროვატობუსების მძღოლებს, რომ გადავუხდიდით ჯარიმას, რომელიც პატრულმა ჩვენი მხარდამჭერების გადაყვანისთვის გამოუწერა, რატომ არ გადავუხადეთ?! ეს განცხადება ხომ სათავო ოფისმა _ “ქართული პარტიის” ლიდერებმა გააკეთეს? ბატონი მერაბი ამბობს, რომ ეს ფული არ მიუღია. თუ კი სხვებს დაუფარეს ჯარიმა, ლანჩხუთისთვის არ გამოუგზავნიათ? ახლა მალულად ოფისის კარებზე გასაღები შეცვალა _ ჩვენ დავდიოდით მაგ ოფისში, თორემ ბატონმა ქარჩავამ “სახლის ოფისი” მოიწყო. არ თვლიდა საჭიროდ, ოფისში მოსულიყო! მეტსაც გეტყვით _ კომპიუტერი, რომელიც ცენტრალურმა ოფისმა გამოგვიყო, მეორე დღესვე სახლში წაიღო _ აქ რაში გვჭირდებაო?” _ ეს ეკა ალექსაიამ ბრიფინგამდე 2 დღით ადრე გვითხრა. როგორც ის ამბობს, ამ კომენტარის გამოქვეყნებას, მერაბ ქარჩავას მხრიდან, “მესიჯები” მოჰყვა.
ეკა ალექსაია, “ქართული პარტიის” ლანჩხუთის ორგანიზაციის ერთ-ერთი დამფუძნებელი: _ უნდა ნახოთ, რა “მესიჯებს” მიგზავნის ბატონი მერაბი. მართალია, ტელეფონი უმეტესად გათიშული აქვს, მაგრამ როგორც ჩანს, სმს-ებში იმდენად კარგადაა გაწაფული, გამოგზავნის და იმავე წამს რომ დაურეკო, მობილური უკვე გათიშული აქვს.
_ მაინც რას გწერთ?
_ შენ რატომ აყევი გია ქურიძეს და მაგათ, მე შენთვის კარგი მინდოდა, არ ველოდი შენგან ასეთ რაღაცებსო… საგაზეთო წერილს ძალიან აუფორიაქებია _ ყოჩაღ შენ, ამდენი ტყუილის თქმა რომ შეგძლებიაო. ახლა მე ვეკითხები მერაბ ქარჩავას: რა ვთქვი ტყუილი? ოფისს გასაღები რომ მალულად შეუცვალა? მძღოლებს რომ ფული არ გადავუხადეთ? ოფისში რომ არ დადიოდა, ჟურნალისტებმაც კარგად იცით! ოფისის კომპიუტერი სახლში აქვს წაღებული! რა არის აქედან ტყუილი? სინამდვილეში, თავად იტყუება! მას არ სურდა იქ ადამიანები, რომლებიც მას რაღაცეებს მოჰკითხავდნენ. ის არის ტიპური ერთპიროვნული მმართველი და არაფრით არ განსხვავდება ხელისუფლებისაგან! ჩვენ რატომ ვებრძვით ხელისუფლებას, თუ იგივე უნდა გააკეთოს ოპოზიციამაც? რატომ ვლაპარაკობთ გამგებლისა და საკრებულოს თავმჯდომარის პრემიებზე, თუ ოპოზიციური პარტიის თავმჯდომარე იგივეს აკეთებს? თუ ვკითხულობთ, რატომ მიიღეს ხელისუფლების წარმომადგენლებმა დამატებითი ანაზღაურება, არ უნდა დავინტერესდეთ, რატომ იღებს სამმაგ ხელფასს ოპოზიციის ის ხელმძღვანელი, რომელიც ოფისშიც არ დადის, აქციების დროს ცდილობს, დაიმალოს, დაჭერის შიშით, მაპატიეთ და, ქალბატონს “შეატენოს” თანამდებობა? სამაგიეროდ, ჩნდება ფულის აღების დროს!
გია ქურიძე, “ქართული პარტიის” ლანჩხუთის საინიციატივო ჯგუფის თავმჯდომარის მოადგილე: _ ლანჩხუთი ძალიან პატარა რაიონია და ყველა ყველას იცნობს. პოლიტიკაში პირველი ნაბიჯი გადავდგი “ქართულ პარტიაში” მისვლით, მაგრამ არაკაცურ საქციელს ვერ მივიღებ ვერც ჩვეულებრივ ცხოვრებაში და ვერც პოლიტიკაში. თუ ოპოზიციურ პარტიაში ადამიანი გაწევრიანდება, მან უნდა გაითავისოს ის საფრთხეებიც, რომელიც მას ელოდება მომავალში ხელისუფლების მხრიდან და ყველაფერი გააკეთოს პარტიისა და ქვეყნისთვის, მიუხედავად საფრთხისა. საინიციატივო ჯგუფის და, მასთან ერთად, პარტიის ადგილობრივი შემადგენლობის აბსოლუტური ნაწილის მიერ პარტიის დატოვება ორი მთავარი ფაქტორის გამო მოხდა _ უპირველესად მერაბ ქარჩავას ქმედებებს ვგულისხმობ: თვითონ სამმაგი ხელფასი დაინიშნა და პლუს ოფისის ხარჯებს ერთპიროვნულად განაგებს ისე, რომ უარს აცხადებს ფინანსური ანგარიშგების გაკეთებაზე. ლანჩხუთის ადგილობრივი ორგანიზაციის ჩამოყალიბების და ოფისის შექმნის საქმეში ლომის წილი საინიციატივო ჯგუფის წევრს, ეკა ალექსაიას მიუძღვის და ქარჩავას, პრაქტიკულად, არც ერთი წევრი არ შემოუყვანია პარტიაში. არადა, ყველაფერს თვითონ იბრალებს.
ეკა ალექსაია: _ მერაბ ქარჩავა არაფრად გვაგდებდა, თავად აკონტროლებდა ფინანსებს, თავისთვის გაზრდილ ხელფასს იწერდა, ამ დროს ერთ ხელფასს 2 ადამიანზე ყოფდა! ოფისის ხარჯების თანხებს, არავინ იცის, რაში ხარჯავდა. ხშირად გვეუბნებოდა, დაკეტეთ ოფისი, დაგვიჭერენო. სულ დაჭერა ელანდებოდა! სათავო ოფისიც ჩავაყენეთ საქმის კურსში, მაგრამ ყურადღება არ მოგვაქციეს. ვერ გეტყვით, ქარჩავა გადაწყვეტილებებს ერთპიროვნულად იღებდა თუ ასე თხოვდნენ “ზემოდან”, მაგრამ ფაქტია, რომ ვერ იტანდა, თუ კი ამ თანხებზე კონტროლს ვთხოვდით. ერთი კაციც არ მოუყვანია პარტიაში, პირიქით _ ისიც ჩვენ მოვიყვანეთ. 150 კაცამდე გვყავდა და ყველა წამოვიდა. მარტო დარჩა ფაქტობრივად.
გია ქურიძე: _ ერთ მაგალითს მოვიტანთ: ორგანიზაციის საქმეთა მმართველს, ნანა შაინიძეს დაავალა ზუსტად ის ფუნქცია-მოვალეობების შესრულება, რომელიც მას, როგორც თავმჯდომარეს, ეკისრება. თუმცა, ეს ხელმძღვანელობა ერთდღიანი გამოდგა _ მეორე დღეს ხელფასის თანხა ჰქონდა გასანაწილებელი და მის მიერ თავმჯდომარედ დანიშნულს ხელფასი არ მისცა! აქ თანხაზე არაა საუბარი _ უბრალოდ, ხელმძღვანელის მოქცევის მაგალითი გითხარით.
ნანა შაინიძე, “ქართული პარტიის” ლანჩხუთის საინიციატივო ჯგუფის წევრი: _ რა თქმა უნდა, აქ თანხაზე კი არ არის საუბარი ან ხელფასის მიღება-არმიღებაზე! მთავარი ისაა, რომ როცა იფიქრა, იქნებ, დამიჭირონო, მე დამავალა მისი მოვალეობის შესრულება, მაგრამ ფული გამოჩნდა თუ არა, ეს შიშიც გადაავიწყდა. ხშირად ამბობდა, რომ არ უღირდა პრობლემების შექმნა თუნდაც ანაზღაურების გამო. შეშინებული იყო უმეტესად. თუ ეშინოდა, ოპოზიციაში რა უნდოდა?
გია ქურიძე: _ პარასკევს ქარჩავამ იცოდა, რომ ორშაბათს ბრიფინგი ტარდებოდა. ვთხოვეთ მოსულიყო, მაგრამ იგი შაბათს, ღამით ოფისში მალულად მივიდა, კარის გასაღები გამოცვალა, ხოლო შემდეგ ტელეფონი გათიშა და საერთოდ არ გამოვიდა კონტაქტზე. პარტიის ოფისში ინახება ყველა დოკუმენტაცია ადგილობრივი ორგანიზაციის წევრების და მათი საქმიანობის შესახებ. საინიციატივო ჯგუფს ერთი თვის განმავლობაში გვქონდა მცდელობა, პარტიის ცენრალურ აპარატში გურიის რეგიონის კურატორთან, ირაკლი დოლაბერიძესთან ერთად გვემსჯელა პრობლემებზე, მაგრამ დოლაბერიძე არც თბილისში შეგვხვდა სალაპარაკოდ და არც ლანჩხუთში ჩამოვიდა. როგორც ადგილობრივი ორგანიზაციის ხელმძღვანელს, ისე ცენტრალურ აპარატს პარტიის წევრების მიმართ სრულ იგნორირებაში ვადანაშაულებთ.
ეკა ალექსაია: _ ჩვენ მართლაც მრავალი მცდელობა გვქონდა, ვითარებაში გავრკვეულიყავით, მაგრამ, როგორც ჩანს, ხელმძღვანელობის ნაწილს სწორედ მერაბ ქარჩავასნაირი თავმჯდომარე სჭირდებოდათ. კაცს, რომელიც ქალს დაუთმობს თანამდებობას საფრთხის დროს, ფაქტობრივად, მას სწირავს თავისი თავის გადასარჩენად, რაზე უნდა ველაპარაკოთ და ან რა ოპოზიციის ლიდერობაზე უნდა ჰქონდეს მას პრეტენზია?!
გია ქურიძე: _ 24 მაისს, პარტიის ლანჩხუთელი წევრები ბათუმში გავემგზავრეთ მიტინგში მონაწილეობის მისაღებად სამი მიკროავტობუსით. სამივე დააჯარიმა პოლიციამ. მიუხედავად იმისა, რომ სოზარ სუბარმა ტელევიზიით გააკეთა განცხადება, რომ ყველა მძღოლის ჯარიმას პარტია გადაიხდიდა, ლანჩხუთელ მძღოლებს ჯარიმის თანხა არ გადაუხადეს. ქარჩავამ თავი ჯერ იმით იმართლა, რომ მან დააგვიანა პარტიის ცენტრალურ ოფისში განაცხადის შეტანა, მერე კი თქვა, მძღოლებმა კარგად იცოდნენ რაზეც მიდიოდნენ, ჩვენ მათ ფული გადავუხადეთ და მათი ჯარიმები არ მაინტერესებსო. მაისის მოვლენების შედეგად დაზარალებულ და დაპატიმრებულ წევრებზეც პარტიამ ყველანაირი პასუხისმგებლობა მოიხსნა. 26 მაისის მერე, ქარჩავა ერთგვარმა შიშმა შეიპყრო და პარტიულ საქმიანობას საერთოდ აღარ ახორციელებდა.
ნანა შაინიძე: _ ჩვენ პარტიული საქმიანობის დასაწყისშივე გავაკეთეთ ხარჯთაღრიცხვის ჟურნალი და შევთავაზეთ ქარჩავას, ყველა ხარჯის შესახებ ეწარმოებინა აღრიცხვა, რაზეც ქარჩავამ კატეგორიული უარი განაცხადა და თქვა, რომ პარტიის ცენტრალური ოფისი წინაშე ფულის განკარგვაზე პასუხისმგებელი თვითონ არის, როგორც უნდა, ისე დახარჯავს და საინიციტიავო ჯგუფის წევრებს არაფერს ჰკითხავს.
ასე დასრულდა “ქართულის პარტიის” ყოფილი წევრების ბრიფინგი, ჩვენ კი კიდევ ერთხელ ვიმეორებთ, რომ მერაბ ქარჩავას დავუთმობთ საგაზეთო ფართს, თუ კი ის მოისურვებს ყოფილი თანაპარტიელების ბრალდებებს პასუხი გასცეს.
