მაშინ მის მრავალმხრივ სამეურნეო საქმიანობაზე ვსაუბრობდით. უმთავრესი საყვარელი საქმე კი, ვაზის უძველესი ქართული ჯიშების მოძიება და გამრავლება იყო. ამ საქმის შედეგი მის საკარმიდამოში უკვე ზენიტს აღწევს.
_ შეგიძლიათ, ჩემი კლარჯულა ნახოთ. მე თვითონ არ მჯერა, ისეთი მსხმოიარეა წელს. ჯერ შეთვალულია, მოგვიანებით მოვკრეფ, ახლა ისეთი სანახავია, თვალს ვერ ვაშორებ, _ შეგვეხმიანა საკუთარი ნაშრომით გახარებული და ჩვენც დაუყოვნებლივ გავეშურეთ ბატონ სოსოსთან.
სოსო ხინთიბიძე წლების წინ შეგვპირდა, რომ ვაზის უძველეს ჯიშებს, რომლებსაც თავს ევლებოდა, მალე ზღაპრულ სამყაროდ აქცევდა და ისე დაგვახვედრებდა… სიტყვა შეასრულა. ნანახმა მართლაც გადააჭარბა მოლოდინს. უნებლიეთ, შეთვალული კლარჯულას ვეება მტევნებისა თუ მსხვილი მარცვლების თვლა დავიწყე. ვერ დავთვალე. დახუნძლული სივრცე თუ ვაზის ლიანები თითქოს სხვა სამყაროდან დაგვყურებდა მაღლიდან.
_ თხუთმეტი წლის წინ დავრგე პირველად კლარჯულას, საკმიელას და ჩხავერის თითო ძირი. მას შემდეგ თავს ვევლები, თუმცა საოცარი მტევნები წელს დაისხა და ეს მოსავალი საგანგებო იქნება ჩემთვის. ნერგები არც ისეც ადვილი გამოსაყვანია, სერიოზული მიდგომა სჭირდება, ამასთანავე ადგილმდებარეობასაც აქვს გადამწყვეტი მნიშვნელობა, სად გააშენებ. მაღლარ და ზეგან ადგილს რა გამოლევს ჩვენში? მთავარია, კაცმა მოინდომოს. ადრეულ წლებში ნერგებს მთხოვდნენ, მეც გაჭირვებით გამომყავდა და მერე აღარ მიჰქონდათ. ნერგი ტირილამდე მეცოდება გასაფუჭებლად. ახლა ყველას უნდა და მიხარია. მეც მზად ვარ, ბევრს მივცე და რჩევით დავეხმარო, თუ როგორ გააშენოს ვაზის ამ უნიკალური ჯიშების ნერგები, _ გვეუბნება ჩვენი მასპინძელი. ხაზგასმით აღნიშნავს, რომ გაზაფხულიდან ზაფხულის ჩათვლით, სამჯერ შეწამვლა აუცილებელია, თუმცა წელს მეოთხედაც შეწამლა, რადგან დაკვირვებით შეატყო, რომ ალაგ-ალაგ ფუჭდებოდა. ნიადაგის მუდამ განოყიერებაც უკეთესია, როგორ კარგი მიწაც უნდაც იყოს, მაინც.
სოსო ხინთიბიძეს ახლა კლარჯულასთან ერთად, საკმიელას და ჩხავერის ნერგები აქვს გამოყვანილი. წელს კლარჯულას მოსავალს კარგი პირი უჩანს. სურს, ყველა დაარწმუნოს და ისეთი განწყობა შეუქმნას, ქართული ვაზის ჯიშების მომრავლებაში რომ დაეხმარება. საქართველოში, სადაც ვაზი შვილივით უყვართ, თვითონ ვაზის შვილობილად თვლის თავს და ამბობს, რომ საგანგებოდ ემზადება ექვთიმობისთვის, დიდი ექვთიმე თაყაიშვილის ხსენების დღისთვის, რომელიც 17 ოქტომბერს გაიმართება სოფელ ლიხაურში.
_ ნერგები მზად მაქვს, რჩევისთვის მზად ვარ! ექვთიმობაზე საქართველოს პატრიარქს ელოდებიან და ჩემს სიხარულს საზღვარი არ აქვს! ის კი არა, ჩემი ლოზუნგიც მაქვს: _ ვაზის შვილებო, თქვენს სამსახურშია ვაზის ტრფიალი სოსო ხინთიბიძე!
