ჩოხატაურში, 9 აპრილის სკვერში მდებარე საბავშვო გასართობები ერთადერთი ადგილია მთელ მუნიციპალიტეტში, სადაც მშობლებს ბავშვების გაყვანის და გართობის საშუალება აქვთ. თუმცა, მშობლების თქმით, ეს რამდენიმე, “პირობითად ატრაქციონიც” უკვე ისეა დაზიანებული, რომ ბავშვები ხშირად შავდებიან.
“ეს ერთი პარკი ძლივს ეღირსა რაიონს, სადაც შეიძლება ბავშვი გამოიყვანო საღამოს და ცოტა გაერთოს. თუმცა, თქვენც ხედავთ, რა დგას აქ _ 2 “სასრიალო”, 2 “აიწონა-დაიწონა”, რკინის რაღაც კონსტრუქცია, რომელიც ბავშვებმა არც კი იციან რაში გამოიყენონ და ყრია უკვე საშინლად გაჭუჭყიანებული “სილა”. სკამები დამტვრეულია, ვერ მიეყრდნობი. ერთ-ერთ ჩამოსასრიალებელს ისეთი დაქანება აქვს, პატარები, ფაქტობრივად, ვერც იყენებენ, ქვევით მშობელი ან ვინმე უფროსი თუ არ ელოდება. თუ შემთხვევით აგეპარათ, თავი ვერ შეიმაგრა და დაცურდა, ამ დაქანების გამო, ისე დაენარცხება მიწას, კუდუსუნის ძვალს დაიზიანებს. ეს მეორე დახურული ჩამოსასრიალებელიც კიდევ, ხედავთ, რას ჰგავს. ერთი ნაწილი საერთოდ მოტეხილი აქვს. გუშინ ბავშვს ფეხი ჩაუვარდა შიგ და საავადმყოფოში გააქანეს, მგონი მოტეხილი ჰქონდა. ძალიან უყურადღებოდაა აქაურობა, მაგრამ რა ვქნათ, სხვა რომ არაფერია ამ ჩოხატაურში, ისედაც ყოველგვარ გასართობს მოკლებული ბავშვები მოგვყავს აქ”, _ ამბობს ახალგაზრდულ გაზეთთან საუბრისას ნატა სულაკაური.
კიდევ ერთი მშობელი მარინა კალანდაძე პარკში არსებულ მდგომარეობაზე ამახვილებს ყურადღებას.
“მე სოფლიდან გამომყავს ბავშვები საღამოობით, რომ ცოტა მაინც დავისვენოთ და გაერთონ პატარები, მაგრამ რა გვხვდება. ახლა იტყვიან უმადურები არიან, სულ არ ჰქონდათ და რა აქვთ საპრეტენზიოო. მაგრამ ბავშვი, რომ საქონლის ნეხვში ჩავარდება, რა უნდა ვთქვათ და სხვა რა უნდა მოვითხოვოთ. კაი, ბატონო, დარჩა ღია კარი და შემოვიდა ძროხა, ვინმე ხომ უნდა ჰყავდეს პატრონი აქაურობას, რომ ან ეს ურნები გაცალონ, ან საქონლისგან დასვრილი გაწმინდონ, დაასუფთაონ. უფრო აგდებას გავს ეს ყველაფერი. წამოუგდეს ამ საცოდავ ბავშვებს რაღაც და ჰგონიათ, დიდი საქმე გაკეთდა ამით. დაემატებინათ რამე ნორმალური. ახლა ნაწვიმარია და არაა ბევრი ბავშვი. დარში უნდა ნახოთ, რა ამბავია აქ _ 2 რაღაც დგას და ასი ბავშვი ესევა. საწყალი ბავშვები რიგში დგანან, რომ ჩასრიალდნენ. თუ ვინმე ყურადღებას მიაქცევს ჩვენს შვილებს, კარგი იქნება. მუნიციპალიტეტის ხელმძღვანელებმა მოიყვანონ აქ თავიანთი შვილები და შვილიშვილები, ნახავენ, როგორ გაერთობიან. ამოიგანგლებიან ბავშვები ამ “სილაში”, მიიყვან სახლში და წყალი არ დაგხვდება, რომ, ბანაობას ვინღა ამბობს, ხელ-პირი დაბანო ბავშვს _ აბა, ასე ვცხოვრობთ ჩოხატაურში, ასე ცხოვრობენ ჩვენი შვილები. მაგათ რა ენაღვლებათ, წამოსკუპდებიან სავარძლებში და არიან არხეინად”, _ ამბობს მარინა კალანდაძე.
პარკში მოსული მშობლები ახალგაზრდულ გაზეთთან მიუსაფარი ძაღლების პრობლემაზეც საუბრობენ. მათი თქმით, სკვერში უამრავი ძაღლია, რომლებიც ხშირად აგრესიულები არიან.
“გავსებულია სკვერი ძაღლებით. აქედანაც საფრთხე ექმნებათ ჩვენს ბავშვებს. განსაკუთრებით, ერთი თეთრი ძაღლი გამოირჩევა აგრესიულობით, რომ დაკბინოს, მერე ვინ აგებს პასუხს?! პატრონი რას აკეთებდაო, _ იტყვიან. რას ვაკეთებთ და დავდევთ ბავშვებს, აქეთ _ ძაღლებმა არ დაკბინონ და იქით _ ღელეში არ გადაცვივდნენ. შეხედეთ, ნახეთ _ თავისუფლად შეიძლება გაძვრეს ბავშვი აქ. ალბათ, ეკონომია გააკეთეს და შორ-შორს “მიასვარკეს”. ძალიან საფრთხილო და საყურადღებოა ამ მხრივაც”, _ ამბობს გასართობად მოსული ერთ-ერთი ბავშვის ბებია ციცო ბაქანიძე.
თუმცა, მშობლებისგან განსხვავებით, ლაღად გრძნობენ თავს ბავშვები. ამბობენ, რომ ძალიან მოსწონთ აქ ყოფნა და როგორც ჩანს, არც პარკში შემოსული ძაღლები უქმნიან დისკომფორტს.
ანდრია და გუგა ყაველაშვილები: ჩვენ ყოველ საღამოს მოვდივართ აქ. ძალიან მოგვწონს, კარგად ვერთობით. უფრო მეტი რამე რომ იყოს, კარგია, მაგრამ… ხან “ტურნიკზე” ვეჯიბრებით ბავშვები ერთმანეთს, ვინ უფრო დიდხანს დაეკიდება ფეხებით თავდაყირა, ან ვინ უფრო მეტჯერ აიწევს, ხან ვჭიდაობთ…
ნია კალანდაძე: თითქმის ყოველ საღამოს მოვდივარ. უფრო მეტი რამე რომ გვქონდეს, რა თქმა უნდა, კარგი იქნება, თუმცა, რაცაა იმაზეც ვერთობით.
9 აპრილის სკვერში არსებულ მდგომარეობაზე კომენტარისთვის ჩოხატაურის მუნიციპალიტეტის მერს, ირაკლი კუჭავას დავუკავშვირდით.
კუჭავას თქმით, ზოგიერთი უპასუხისმგებლო თანამოქალაქე გამიზნულად აზიანებს დასასვენებელ სკვერებსა და პარკებს.
“გასულ კვირას, ინსპექტირების ჯგუფთან და სამშენებლო კომპანიის წარმომადგენლებთან ერთად, პირადად ვიყავი 9 აპრილის სკვერში, მშენებლებს გაეგზავნათ ოფიციალური წერილი აღმოჩენილი დაზიანებების აღმოსაფხვრელად, ვინაიდან მათ, ხელშეკრულების მიხედვით, სამი წლის განმავლობაში აქვთ ხარვეზების გამოსწორების ვალდებულება. თუმცა, სკვერში ისეთი დაზიანებებიცაა, რომლებსაც ბავშვების ხელი ვერ გააკეთებდა _ ფეხით დალეწილი ნაგავშემკრები ურნები, საბავშვო ატრაქციონის მოგლეჯილი სახელურები და ეს პირველი შემთხვევა არ არის, როცა ჩვენი ზოგიერთი უპასუხისმგებლო თანამოქალაქე გამიზნულად აზიანებს დასასვენებელ სკვერებს და პარკებს. ამის მაგალითია ანა კალანდაძისა და ნოდარ დუმბაძის სახელობის სკვერია, სადაც ბანერები ბასრი იარაღის გამოყენებით არის დაჭრილი. როგორც 9 აპრილის სკვერში, ისე ნოდარ დუმბაძისა და ანა კალანდაძის სკვერებში, მალე შეიცვლება სკამები, განახლდება ბანერები და მოწესრიგება ტერიტორია”, _ გვითხრა მუნიციპალიტეტის მერმა.
