ოზურგეთი “მძიმე” შაბათის, საკრებულოები კი, ახალი თავმჯდომარეების მოლოდინში

2 აგვისტო, ოზურგეთისა და ქალაქ ოზურგეთის მუნიციპალიტეტების პოლიტიკური ცხოვრებისთვის, კიდევ ერთი "მძიმე", ემოციებით დატვირთული, დღე იქნება.

ამას თავად ახალი მოწვევის საკრებულოების წევრები და თანამდებობის მომლოდინე პირებიც ადასტურებენ.

საქმე იმაშია, რომ 2 აგვისტოს, ოზურგეთის მუნიციპალიტეტში  საკრებულოს სხდომა გაიმართება, რომელიც  დეპუტატების ნაწილის პროგნოზით, სკანდალური და ხმაურიანი იქნება, ნაწილის თქმით კი, სიურპრიზებით აღსავსე.

ქალაქ ოზურგეთის მუნიციპალიტეტის საკრებულოს თავმჯდომარის პოსტზე, არაოფიციალურად ორი კანდიდატურა სახელდება. ოფიციალურად კი, "ქართული ოცნების" პოლიტსაბჭოს მიერ  "ქართული ოცნების" სიით მესამე ნომერი,  გელა კობალაძის კანდიდატურაა გადაწყვეტილი, რომელსაც ჩვენი წყაროს ინფორმაციით, 15 დეპუტატიდან 11 უჭერს მხარს.

ლევან მგელაძე, რომელიც ქალაქის საკრებულოში,  დამოუკიდებელი დეპუტატია, "გურია ნიუსთან" ამბობს, რომ მას ჯერ კიდევ არ გადაუწყვეტია, დააყენებს თუ არა მის კანდიდატურას ქალაქ ოზურგეთის საკრებულოს თავმჯდომარის პოსტზე.

მას ამის  სურვილი აქვს,  თუმცა,  ჩვენი ინფორმაციით, სათანადო მომხრეები არ ჰყავს.

"არ ვიცი რა გადაწყვეტილებას მივიღებ, ჯერ კიდევ დრო მაქვს, ყველაფერი ორ აგვისტოს გამოჩნდება", _  გვითხრა მგელაძემ.

"გურია ნიუსისთვის" ცნობილი ხდება, ვინ იქნებიან ქალაქ ოზურგეთის საკრებულოს კომისიების თავმჯდომარეები.

საკრებულოს სამანდატო, საპროცედურო საკითხთა და ეთიკის კომისიის თავმჯდომარის პოსტს, "საქართველოს პატრიოტთა ალიანსის" გურიის კოორდინატორი, გოჩა ძიმისტარაშვილი დაიკავებს.

საფინანსო-საბიუჯეტო კომისია, შესაძლოა, ანასეულის დამოუკიდებელმა დეპუტატმა ლავრენტი ბიგვავამ ჩაიბაროს.

სივრცით -ტერიტორიული დაგეგმარებისა და ინფრასტრუქტურის კომისიის თავმჯდომარის პოსტი, შესაძლოა, ასევე დამოუკიდებელ კანდიდატს, ლევან თოიძეს ერგოს.

ქონების მართვისა და ბუნებრივი რესურსების საკითხების კომისიის თავმჯდომარე, "ქართული ოცნების" დეპუტატი, კახა კვაჭაძე გახდება.

სოციალურ საკითხთა კომისიას "თავისუფალი დემოკრატების" ერთ-ერთი ლიდერი, თემურ სალუქვაძე უხელმძღვანელებს.

"რესპუბლიკელი" ნინო გოგუაძე კი, ქალაქ ოზურგეთის საკრებულოს თავმჯდომარედ გელა კობალაძის გახდომის შემთხვევაში, კობალაძის მოადგილის პოსტს დაიკავებს.

ამ ეტაპზე მხოლოდ ერთი ფრაქციის – "ქართული ოცნების" შექმნა სახელდება, რომელსაც სათავეში "ქართული ოცნების" სიით პირველი ნომერი, მედეა მახარობლიძე ჩაუდგება.

ჩვენს ხელთ არსებული ინფორმაციების გადასამოწმებლად, დავუკავშირდით გელა კობალაძეს, რომელმაც ჩვენთან საუბრისას აღნიშნა, რომ კომისიების დაკომპლექტებაზე განხილვები მიმდინარეობს, თუმცა ვინ რომელ კომისიას ჩაიბარებს, ეს ჯერ კიდევ გადაწყვეტილი არ არის.

"თუ გავხდები საკრებულოს თავმჯდომარე, რომლის იმედიც ად დეპუტატების უმრავლესობის მხარდაჭერის იმედიც მაქვს, ეს  ადამიანები ნამდვილად ჩაიბარებენ საპასუხისმგებლო კომისიებს.  ასევე, დავეხმარები დეპუტატებს ფრაქციების შექმნაშიც."

რა ხდება ოზურგეთის მუნიციპალიტეტის საკრებულოში?

საკრებულოს თავმჯდომარის პოსტზე აქაც ორი კანდიდატურა სახელდებოდა. "ქართული ოცნების" სიით პირველი ნომერი დავით დარჩია და სოფელ ნატანების დეპუტატი, დავით სიხარულიძე.

როგორც "გურია ნიუსისთვის" ხდება ცნობილი, დავით სიხარულიძემ ეს პოსტი  დაუთმო დავით დარჩიას და ის გურიის გუბერნატორობისთვის ემზადება.

ვინ გახდება მოადგილე?

დარჩიას მოადგილედ პოლიტსაბჭომ "თავისუფალი დემოკრატების" ლიდერი, დიმიტრი კვერღელიძის  კანდიდატურა დაამტკიცა, თუმცა "გურია ნიუსის" წყაროების ინფორმაციით, კვერღელიძე შესაძლოა დეპუტატებმა არ აირჩიონ.

ასევე, ოზურგეთის მუნიციპალიტეტის საკრებულოში, კომისიების თავმჯდომარეების პოსტზე განიხილებიან შემდეგი დეპუტატები:

სამანდატო, საპროცედურო საკითხთა და ეთიკის კომისიის თავმჯდომარის პოსტზე, ბახვის მაჟორიტარი დეპუტატი, პოლიციის ყოფილი მაღალჩინოსანი, ეროდი გორდელაძე ჩაიბარებს.

საფინანსო- საბიუჯეტო კომისიის თავმჯდომარედ გელა ჩავლეიშვილი დაინიშნება.

ქონების მართვისა და ბუნებრივი რესურსების საკითხების კომისიის თავმჯდომარეობა,  სოფელ ასკანისა და დაბა ნასაკირალის დეპუტატებს, ილია მამალაძესა და შოთა ართმელაძეს სურს.

სოციალურ საკითხთა კომისიის თავმჯდომარეობის პოსტზე ორი ქალბატონი – ინგა დუმბაძე და ლელა საჯაია განიხილებიან.

აღნიშნული ინფორმაციების დასაზუსტებლად დავუკავშირდით "ქართული ოცნების"  რაინული ორგანიზაციის თავმჯდომარე დავით დარჩიას, რომელმაც დაგვიდასტურა, რომ აღნიშნული პიროვნებები მართლაც განიხილებიან ამ პოსტებზე, თუმცა გადაწყვეტილი ჯერ კიდევ არ არის.

რაც შეეხება საკრებულოს თავმჯდომარეობას, დარჩია ამბობს, რომ მას დეპუტატების მხარდაჭერის იმედი აქვს, თუმცა ამ პოსტზე არ გამორიცხავს დავით სიხარულიძის კანდიდატურის დასახელებასაც.

"სამი დეპუტატი საკმარისია იმისათვის, რომ დაასახელონ სხვა კანდიდატურა, გამორიცხული არაფერი არ არის", _ გვითხრა დარჩიამ.

ხოლო კითხვაზე, რამდენად შესაძლებელია, რომ საკრებულოს დეპუტატებმა მის მოადგილედ დიმიტრი კვერეღელიძე აირჩიონ, პასუხობს:  "თუ დავით დარჩიას კანდიდატურას მხარს დაუჭერენ, ასევე დაუჭერს უმრავლესობა დიმიტრი კვერღელიძესაც მხარს, მე ამის იმედი მაქვს."

რაც შეეხება დავით სიხარულიძეს, ის ამჟამად კომენტარის გაკეთებისგან თავს იკავებს. ხოლო, დიმიტრი კვერღელიძე აღნიშნავს, რომ მას დეპუტატების მხარდაჭერის იმედი ნამდვილად აქვს.

"რატომ არ უნდა მქონდეს იმედი? ჩვენ ვართ ერთი გუნდი და დარწმუნებული ვარ ნამდვილად ამირჩევენ", _ გვითხრა დიმიტრი კვერღელიძემ.