2014 წლის 14 აგვისტოს "გურია ნიუსში" გამოქვეყნდა სტატია სათაურით დაარღვია თუ არა კანონი პროკურატურამ ჯანმრთელობის შესახებ ინფორმაციის გამოქვეყნებით, სადაც საუბარი იყო, დაარღვია თუ არა მთავარმა პროკურატურამ კანონი, საკუთარ ოფიციალურ ვებგვერდზე ედურდ სააკაშვილის ჯანმრთელობის შესახებ ინფორმაციის გამოქვეყნებით. აღსანიშნავია, რომ საბუთის მიხედვით, ედუარდ სააკაშვილი ექიმთან ვიზიტის დროს არასრულწლოვანი, 15 წლის იყო.
"კოსმეტიკური პროცედურებისთვის" მიმაგრებულ pdf საქაღალდეში დევს ინფორმაცია მიხეილ სააკაშვილის შვილის, ედუარდ სააკაშვილის ჯანმრთელობის შესახებ, რითიც დგინდება რომ, იგი 2010 წლის 5 იანვარს იმყოფებოდა გერმანიაში, კერძოდ კი ბერლინის ერთ-ერთ ოტოლარინგოლოგიულ კლინიკაში, პროფესორ ბერგჰაუზთან, სადაც გარკვეული სამედიცინო გამოკვლევები ჩაიტარა და დაუდგინდა შესაბამისი დიაგნოზი. აქ პირდაპირ მითითებულია, რომ გადამხდელი მიხეილ სააკაშვილია, პაციენტი კი – ედუარდ სააკაშვილი.
მიეკუთვნება თუ არა განსაკუთრებული კატეგორიის პერსონალური მონაცემებს ედუარდ სააკაშვილის ჯანმრთელობის შესახებ ინფორმაცია, რომელიც გამოქვეყნებული საბუთის მიხედვით, იმ პერიოდისთვის არასრულწლოვანი იყო, ამის შესახებ რამდენიმე დღეში გახდება ცნობილი.
როგორც "გურია ნიუსისთვის" გახდა ცნობილი, პერსონალურ მონაცემთა დაცვის ინპექციამ, მთავარი პროკურატურის ოფიციალურ ვებ-გვერდზე გამოქვეყნებულ ედუარდ სააკაშვილის ჯანმრთელობის შესახებ ინფორმაციასთან დაკავშირებით, მოკვლევა დაიწყო.
საქართველოს პარლამენტის წევრმა, დეპუტატმა ჩიორა თაქთაქიშვილმა, საქართველოს მთავარი პროკურატურის მიერ არასრულწლოვან ედუარდ სააკაშვილის ჯანმრთელობის შესახებ ინფორმაციის გამოქვეყნებასთან დაკავშირებით, პერსონალურ მონაცემთა დაცვის ინსპექტორს, თამარ ქალდანს მიმართა.
"საქმის მასალებში საჯაროდ ხელმისაწვდომია განსაკუთრებულ კატეგორიას მიკუთვნებული პერსონალური ინფორმაცია მიხეილ სააკაშვილის შვილის, ედუარდ სააკაშვილის შესახებ. კონკრეტულად საქმეზე დართულია ედუარდ სააკაშვილის სამედიცინო დიაგნოზი, სამედიცინო გამოკვლევის ანგარიში. ეს ინფორმაცია მთავარმა პროკურატურამ საჯაროდ გახადა ხელმისაწვდომი საკუთარ ვებ-გვერდზე განთავსებულ ინფორმაციაში მიხეილ სააკაშვილის მიმართ ბრალდების წაყენების შესახებ. კერძოდ "კოსმეტიკური პროცედურებით" დასათაურებულ გრაფაში.
მთავარი პროკურატურის ვებ-გვერდზე განთავსებული დოკუმენტიდან ისიც ირკვევა, რომ საქმე ეხება არასრულწლოვანის ჯანმრთელობის მდგომარეობას. რადგან მითითებული ედუარდ სააკაშვილის დაბადების თარიღი და სხვა პერსონალური მონაცემები და სამედიცინო დასკვნის თარიღი. აღნიშნული სამედიცინო პროცედურის დროს ედუარდ სააკაშვილი იყო 15 წლის", _ წერს დეპუტატი.
პერსონალურ მონაცემთა დაცვის ინსპექტორ თამარ ქალდანის პასუხიდან, რომელიც მან 2014 წლის 19 აგვისტოს, დეპუტატ ჩიორა თაქთაქიშვილს გაუგზავნა, ირკვევა:
"№8456/-34 წერილის საფუძველზე პერსონალურ მონაცემთა დაცვის ინსპექტორმა კანონით განსაზღვრული უფლებამოსილების ფარგლებში დაიწყო საქართველოს პროკურატურის მიერ ედუარდ სააკაშვილი განსაკუთრებული კატეგორიის პერსონალური მონაცემების გასაჯაროების კანონის შესწავლა.
საქმის გარემოებების სრულყოფილად გამოკვლევის მიზნით აპარატმა უკვე გამოითხოვა ინფორმაცია შესაბამისი უწყებისგან. ინსპექტორის მიერ მიღებული გადაწყვეტილების, სამართალდარღვევის გამოვლენის შემთხვევაში კანონის აღსრულების მიზნით გამოყენებული ღონისძიებების შესახებ გაცნობებთ საკითხის შესწავლის დასრულებისთანავე."
გამოითხოვა თუ არა ინფორმაცია მთავარი პროკურატურიდან და დაიწყო თუ არა აღნიშნულ ფაქტთან დაკავშირებით მოკვლევა პერსონალურ მონაცემთა დაცვის ინსპექციამ, ამასთან დაკავშირებით "გური ნიუსი" პერსონალურ მონაცემთა დაცვის ინსპექციას დაუკავშირდა. უწყებაში გვითხრეს:
"მიმდინარეობს საკითხის შესწავლა. შესწავლის შედეგად მიღებული გადაწყვეტილებები ეცოდინება შესაბამის უფლებამოსილ პირებს."
შეგახსენებთ, რომ საქართველოს მთავარმა პროკურატურამ 2014 წლის 13 აგვისტოს, საქართველოს ყოფილი პრეზიდენტი მიხეილ სააკაშვილი და სახელმწიფო დაცვის სპეციალური სამსახურის ყოფილი უფროსი თეიმურაზ ჯანაშია დიდი ოდენობით საბიუჯეტო თანხების, ანუ სახელმწიფოს კუთვნილი 8 837 461 ლარის გაფლანგვის ფაქტზე, ბრალდებულის სახით სისხლის სამართლის პასუხისგებაში მისცა.
