რეალობა თუ გამიზნული პიარი

_ ყველა პოლიტიკოსი, გუბერნატორი, საკრებულოს წევრობის, თავმჯდომარეობის და გამგებლობის კანდიდატი “აპირებს ძალები არ დაზოგოს ამ ისტორიულად მნიშვნელოვანი საქმის გასაკეთებლად და ჩოხატაურში კულტურის სახლი აღადგინოს”.  ფაქტებიდან გამომდინარე,  ადვილი სავარაუდოა, რომ კულტურის სახლის აშენების პირობა ამჯერადაც ვიღაცის გამიზნული პიარია.
ახლადარჩეული გამგებლის, გია გიორგაძის წინასაარჩევნო პროგრამის ერთ-ერთი მთავარი ნაწილიც კულტურის სახლის აშენების თემაა. გამგებელს ამ პირობის შესასრულებლად მისეული ხედვა აქვს: 
_ ბატონო გია, თქვენს მიერ წინასაარჩევნოდ წარმოდგენილი პროგრამის დიდი ნაწილი ჩოხატაურის კულტურის სახლის აღდგენაზე იყო გათვლილი. როგორ აპირებთ ამას?
_ ვითარების შესახებ მივწერ სხვადასხვა სამინისტროებს, ყველა შესაბამის უწყებას დახმარებას ვთხოვ. ადგილობრივ ბიუჯეტს არ აქვს ამდენი ფუფუნება, ამიტომ ზემდგომებს უნდა მივმართოთ. გეგმაში მაქვს, წერილობითი თხოვნები გავუგზავნო იმ სამინისტროების ხელმძღვანელებს, რომელთა კომპეტენციაშიც ამ საკითხის მოგვარებაა.
_ წერილის მიწერა ახსენეთ. ამ ხნის განმავლობაში რომ ყველა ტყუილ დაპირებას იძლეოდა, ფაქტია, მაგრამ თქვენი სიტყვებიდან გამომდინარე, ნათელი ხდება, რომ წერილიც კი არავის გაუგზავნია არსად.
_ სხვამ რა გააკეთა, ვერ გეტყვით. თუმცა, ჩემს მიერ მსგავსი სახის წერილი არ დაწერილა.
ჩოხატაურის მუნიციპალიტეტის საკრებულოს თავმჯდომარე ანტონ ხუნდაძე ერთ-ერთია იმ მრავალთაგან, რომელმაც თავის დროზე ჩოხატაურელებს კულტურის სახლის ასაშენებლად “ძალების არდაზოგვას შეჰპირდა” . პირობა დღესაც ძალაშია, თუმცა, შეუსრულებელი:
_ ეს ის საკითხია, რომელზეც მუდმივად ვმუშაობთ, _ გვითხრა ხუნდაძემ
_ მუშაობის შედეგი უკვე წლებია, არ ჩანს, ბატონო ანტონ!
_ მიმდინარე წელს წერილი მივწერეთ ინფრასტრუქტურის სამინისტროს, კონკრეტულად კი მინისტრს რამაზ ნიკოლაიშვილს. სამინისტროდან მივიღეთ პასუხი, რომ ამ საკითხს სამხარეო ადმინისტრაციასთან ერთად განიხილავენ მომავალი წლის ბიუჯეტის დაგეგმვისას,.
სამხარეო ადმინისტრაციაში გვითხრეს, რომ 2011 წლის ინფრასტრუქტურული პროექტები ჯერ არ განუხილავთ, რომელთა შორისაც ჩოხატაურის კულტურის სახლის აშენების საკითხიც უნდა მოხვდეს: 
_ ჩოხატაურის კულტურის სახლის მშენებლობის საკითხი აუცილებლად განიხილება 2011 წლის ინფრასტრუქტურულ პროექტებზე მუშაობისას. სამინისტროდან რეკომენდაცია ამის თაობაზე უკვე არსებობს, _ აღნიშნა ჩვენთან საუბრისას გუბერნატორის მოადგილემ ლელა თავართქილაძემ.
ინფრასტრუქტურის მინისტრი, რამაზ ნიკოლაიშვილი, რომლის გუბერნატორიბისას ეს საკითხი ძალზე აქტუალური იყო, ამბობს, რომ ჩოხატაურელებს აუცილებლად ექნებათ კულტურის სახლი:
_ გურიის მიმართ რომ განსაკუთრებული დამოკიდებულება მაქვს, უცხო არავისთვის არის. ყველა პოსტი, რომელიც აქამდე მეკავა, შეძლებისდაგვარად, გამოვიყენე გურიის სასიკეთოდ. ასე იქნება ამჯერადაც. მე ყველაფერს გავაკეთებ იმისთვის, რომ ჩოხატაურელებს მალე ჰქონდეთ კულტურის სახლი, _ თქვა ნიკოლაიშვილმა.
ჩვენი წყაროს ინფორმაციით, მინისტრის მიერ უკვე გაიცა დავალება, რომ გაკეთდეს თანამედროვე ტიპის კულტურის სახლის პროექტი, რომლის გახორციელებაც  სამინისტროს დაფინანსებით გახდება შესაძლებელი. კულტურის სახლის აშენება ჩოხატაურის ცენტრში, მხარეთმცოდნეობის მუზეუმის მოპირდაპირე მხარეს იგეგმება.
ჩოხატაურელი კულტურის მუშაკები, რომლებმაც არაერთ უწყებას მიმართეს კულტურის სახლის აშენების თხოვნით, ამბობენ, რომ ამ საკითხის დადებითად გადაწყვეტა საშვილიშვილო საქმეა:
_ დღე არ გავა, ამაზე არ ვიფიქრო. ეს ის თემაა, რომელიც ყველა ჩოხატაურელს აწუხებს. როდესაც თანამდებობაზე ვმუშაობდი, ბევრი ხელმძღვანელი პირი შევაწუხე, თუმცა, შედეგი ვერ მივიღეთ. თუკი ახლა მოახერხებს ვინმე ამ საკითხის გადაწყვეტას, ყველა ჩოხატაურელის მადლობას დაიმსახურებს, _ აღნიშნა ჩვენთან საუბრისას კულტურის დამსახურებულმა მუშაკმა, რეზო თედორაძემ.
როგორც ზემოთ აღვნიშნეთ, ინფრასტრუქტურის სამინისტრომ გურიის სამხარეო ადმინისტრაციას  ჩოხატაურის კულტურის სახლის აშენებაზე თანხმობა განუცხადა. ახლა ჯერი გუბერნიაზეა _ თუ ადმინისტრაციაში მიზანშეწონილად მიიჩნევენ, რომ ჩოხატაურელებს დიდი ხნის დანაპირები უნდა აუსრულონ და რომ ჩოხატაური მხოლოდ არჩევნების მოსაგებად არ სჭირდებათ, მიმდინარე წელს ჩოხატაურის ცენტრში კულტურის სახლის მშენებლობა დაიწყება.