საპარლამენტო უმცირესობის წევრი, სერგო რატიანი სტატუსშეჩერებულ სტუდენტებთან დაკავშირებით კომენტარს აკეთებს და ამბობს, რომ „ხელისუფლების წარმომადგენლები ცდილობენ, დღეს არსებული პრობლემები მიჩქმალონ“.
_ ტიპური შემთხვევაა ქალბატონი ელისო ჩაფიძის ახსნა "სტუდენტს შეუძლია სტატუსი შეიჩეროს 5 წლით. სტატუსი შეჩერებული აქვს 33,029 სტუდენტს, რაც წარმოადგენს 2010 წლიდან დღემდე შეჩერებულ სტატუსიანი სტუდენტების კუმულატიურ რაოდენობას".
ამასთან დაკავშირებით უნდა ითქვას, რომ დღეს არსებული რიცხვი, მართლაც, 5 წლის სტატუსშეჩერებულთა კუმულატიური რაოდენობაა, ოღონდ აქ პრობლემა დინამიკაშია.
2012 წლის 1 ოქტომბრისთვის სტუდენტის სტატუსი შეჩერებული ჰქონდა 11000 სტუდენტზე ოდნავ მეტს.
2013 წლის იანვარში _ 22000 სტუდენტს.
2013 წლის 1 ოქტომბრის მონაცემებით 28 000-ზე მეტს (მათ შორის, 8000-ზე მეტს ფინანსური დავალიანების გამო).
2014 წლის იანვრისთვის უკვე 33 000-ზე (მათ შორის, 11000-ზე მეტს ფინანსური დავალიანების გამო).
ბოლო დღეებში ვრცელდება მონაცემები, რომ სტუდენტის სტატუსი შეჩერებული აქვს უკვე 38000 სტუდენტს.
ამ საკითხთან დაკავშირებით არაერთხელ მითქვამს, რომ ყველაზე მარტივი გამოსავალია, შექმნილი ვითარება განათლების სამინისტროს დაბრალდეს, მაგრამ საქმე გაცილებით რთულადაა. მიმაჩნია, რომ მთავარი პრობლემა მოსახლეობის ეკონომიკური მდგომარეობის გაუარესებაა. ეს რიცხვებიც ამ ტენდენციის მაჩვენებელია. საქართველოში შვილების განათლებაზე გაწეული დანახარჯი ოჯახების ერთ-ერთი უმთავრესი პრიორიტეტია და ამ მიმართულებით ტენდენციის ცვლილება, მოსახლეობის შემოსავლების აშკარა კლებაზე მეტყველებს. განათლების სამინისტროს მხოლოდ მის ხელთ არსებული ფინანსური რესურსების უფრო რაციონალური და სამართლიანი გადანაწილება შეუძლია, რაც, თავის მხრივ, შეამსუბუქებდა არსებულ ვითარებას, მაგრამ ამ სავალალო დინამიკის შეჩერება, ეკონომიკური ფონის შეცვლის გარეშე, უბრალოდ, წარმოუდგენელია, _ ამბობს რატიანი და საკუთარი სიტყვების დასტურად "გურია ნიუსს“ საკუთარი სიტყვების დამადასტურებელ დოკუმენტებს აწვდის.
შეგახსენებთ, რომ საპარლამენტო უმრავლესობის წევრმა, ელისო ჩაფიძემ განცხადება გაავრცელა, რომელშიც აღნიშნულია, რომ „დღეს ბაზაში რეგისტრირებულია 144,487 სტუდენტი, ზოგი აქტიური, ზოგი შეჩერებული და ზოგი შეწყვეტილი სტატუსით. სტუდენტს შეუძლია, სტატუსი შეიჩეროს 5 წლით.
სტატუსი შეჩერებული აქვს 33,029 სტუდენტს, რაც წარმოადგენს 2010 წლიდან დღემდე შეჩერებულ სტატუსიანი სტუდენტების კუმულატიურ რაოდენობას. 2013 წლამდე, სტუდენტთა ბაზა იყო იმდენად მოუწესრიგებელი და აღურიცხავი, რომ წინა წლების ინფორმაციას დღემდე სხვადასხვა დოკუმენტებიდან ვიღებთ. ამის გამო 2013 წლამდე ინფორმაციაზე თავს ვერ დავდებთ. გასაგებიცაა, რატომაც არ აწესრიგებდნენ ბაზას.
33, 029–ში შედის აგრეთვე უცხო ქვეყნის მოქალაქე სტუდენტებიც. ეს ციფრი მუდმივად და სწრაფად იცვლება, რადგან პარალელურ რეჟიმში სტუდენტები იდგენენ სტატუსს. სტატუსი შეიძლება შეიჩერონ რამდენიმე მიზეზით _ავადმყოფობა, ფინანსური დავალიანება, საზღვარგარეთ გამგზავრება, საგნების ჩაუბარებლობა. სტუდენტი თვითონ აკეთებს განაცხადს და უთითებს მიზეზს (რაც სუბიექტურია)“.
