ე.წ. კორტების სპეცოპერაცია გახსნილია. 9 წლის შემდეგ პროკურატურამ სპეცოპერაციის მონაწილე 11 პირს ბრალი წარუდგინა და დააკავა.
გამოიკვეთა თუ არა საქმეში ოჯახისთვის უცნობი დეტალები და როგორ აფასებენ ისინი პროკურატურის მიერ დადებულ შედეგს, – ამ საკითხებზე „გურია ნიუსს“ ვაზაგაშვილების ოჯახის ადვოკატი ირმა ჭკადუა ესაუბრა:
_ პროკურატურამ, ფაქტობრივად, დღეს თქვა ის, რასაც ბოლო 9 წლის განმავლობაში ბატონი იური ვაზაგაშვილი ამბობდა, ახალი პრაქტიკულად არაფერი არ თქმულა.
_ თუ ეს გარემოებები გამოძიებისთვის უკვე ცნობილი იყო და იური ვაზაგაშვილმაც იცოდა ამის შესახებ, მაშინ რატომ ვერ მოხერხდა აქამდე საქმის დასრულება?
_ ამაზე შემიძლია გიპასუხოთ, რომ 2012 წლის 1 ოქტომბრამდე ნება არ იყო გარკვეული მიზეზების გამო, 2012 წლის 1 ოქტომბრის შემდეგ კი რაოდენ სამწუხაროც არ უნდა იყოს ჩვენმა კოლეგამ არჩილ კბილაშვილმა ერთი წლის განმავლობაში ამ მიმართულებით არაფერი გააკეთა. მოგვიანებით მთავარი პროკურორის შეცვლის შემდეგაც, დაახლოებით, 6 თვის განმავლობაში არაფერი შეცვლილა, ბოლო 4 თვის განმავლობაში კი ინტენსიური მუშაობა მიმდინარეობდა ბატონი შოთაძე უშუალოდ იყო ჩართული პროცესში და ბატონმა იურიმაც იცოდა რომ უახლოეს მომავალში საქმე უნდა გახსნილიყო. უახლოეს მომავალში ათვლის წერტილად 20 იანვარს ვგულისხმობ, როცა ბატონი იურის მკვლელობა მოხდაა. დაახლოებით 2-3 კვირაში ვიცოდით, რომ საქმე გაიხსნებოდა. გარკვეული ექსპერტიზები იყო დანიშნული და მის პასუხებს ველოდებოდით.
ძალიან სამწუხაროა, რომ პროკურატურამ არ იაქტიურა და ამას შეეწირა ბატონი იური ვაზაგაშვილის სიცოცხლე. დღეს ოჯახისთვის შინაარსი დაკარგა ამ ყველაფერმა, რადგან ამას ბატონი იური ვერ მოესწრო.
იმედს ვიტოვებ, რომ სხვა გახმაურებული საქმეები, მაგალითად, აფრასიძეები, გია გვიჩიანის საქმე და ა.შ, რომლის გამოძიებაც დაწყებულია, მაგრამ ბოლომდეა მისაყვანი, არ დასრულდება ისე, რომ ვინმეს მსხვერპლი გახდეს საჭირო.
_ ე.წ. კორტების სპეცოპერაციის მონაწილე პირების დაკავება ოპოზიციამ პოლიტიკურ პროცესად და „კუდიანებზე დევნად“ შეაფასა…
_ რა შუაშია აქ პოლიტიკა, როდესაც სახეზე იყო, რომ შეჯახებულ ავტომანქანას დაახლოებით 10 ადამიანი მიზანმიმართულად ესროდა?! ყოფილი ხელისუფლების საქმეც ეს არის, რომ პოლიტიკური შეფასება მისცენ ყველაფერს. მათ არა აქვთ არგუმენტი რითაც გაამყარებენ იმას, რომ ეს დანაშაული რეალურად ბუნებაში არ არსებობდა. ქუჩაში რომ ხვრეტდნენ ხალხს, თუკი ეს არ იყო პოლიტიზირებული, მაშინ არც ეს საქმეა პოლიტიზირებული. მაგრამ თუ ისინი ხალხს პოლიტიკური ნიშნით ხოცავდნენ, მაშინ იმის გაგრძელებაც ავტომატურად პოლიტიზირებული იქნება. სხვა საქმე არაფერი დარჩენიათ, გარდა პიარის და ტყუილისა. მაგრამ მეორე საკითხია, ამის რამდენად სჯერა სამოქალაქო საზოგადოებას.
კონკრეტული პირების ბრალეულობაზე ვერაფერს ვიტყვი მათი უდანაშაულობის პრეზუმპციიდან გამომდინარე. არ ვყოფილვარ შემთხვევის ადგილზე, მაგრამ ბრალდების მხარეს აქვს უფლება განცხადებები გააკეთოს. აქედან გამომდინარე, თუკი პროკურატურამ მოიპოვა შესაბამისი მტკიცებულებები, რომ ბრალი წაეყენებინათ ამ პირებისთვის, ყველაზე მნიშვნელოვნად კი ის მენიშნა, რომ ყველა ამ პირის დაკავება განხორციელდა სასაამართლო განჩინებით. ე.ი. ბრალდების მხარეს აქვს უტყუარი მტკიცებულებები საიმისოდ, რომ სასამართლომ გასცა განჩინება ამ ადამიანების დასაკავებლად. წინ გვაქვს კიდევ სასამართლო პროცესი, სადაც დაკავებულმა პირებმა თუკი ისინი უდანაშაულოები არიან, ეს უნდა დაამტკიცონ.
თუკი ეს პოლიტიკური ჭრილია, თქვან რატომ აქვს მას პოლიტიკური კონტექსტი. რაც შეეხება „კუდიანების“ დევნას, , „ნაციონალური მოძრაობა“ სულ იძახდა, რომ კუდიანებს დასდევდნენ, ბოლოს კი აღმოჩნდა, რომ კუდიანები თავად ყოფილან.
_ შესაძლებელია თუ არა, გარდა იმ პირებისა, რომლებიც დღეს პროკურატურამ დააკავა, სხვა პირების ბრალეულობის საკითხიც დადგეს?
_ დიახ, გარკვეული გვარები დღეს პროკურატურამ არ გამოაცხადა, რაზეც ოჯახს ჰქონდა ინფორმაცია, როგორც ჩანს მათზე არ არის საკმარისი მტკიცებულებები, ან პროკურატურა კიდევ აწარმოებს მათ მიმართ გამოძიებას. რა თქმა უნდა, შესაძლებელია, გამოძიების ეტაპზე კიდევ სხვა გვარ-სახელები გამოიკვეთოს.
_ ეთანხმაბა თუ არა ვაზაგაშვილების ოჯახი პროკურატურის ვერსიას სამიქს გამოძიებასთან დაკავშირებით?
_ ოჯახი გახარებულია იმით, რომ საზოგადოებამ გაიგო, რომ მათი შვილი ყაჩაღი და მკვლელი არ იყო.თუმცა, ამ დღემ მათთვის მაინც აზრი დაკარგა, რადგან რადგან ბატონი იური არ არის ცოცხალი, რომელიც ამ საქმეს შეეწირა.
_დაკითხულია თუ არა მოწმე, რომელზეც იური ვაზაგაშვილი გარდაცვალებამდე საუბრობდა?
_ საზღვარგარეთ მყოფი მოწმე, პროკურატურამ უკვე დაკითხა.
