"ერთიანი ნაციონალური მოძრაობის" ოზურგეთის ოფისში, პარტიის ერთ-ერთმა ლიდერმა, დავით მჟავანაძემ დღეს პრესკონფერენცია გამართა და ჟურნალისტებთან ოზურგეთის მუნიციპალიტეტის გამგებლის, მერაბ ჭანუყვაძისა და საკრებულოს თავმჯდომარის, დავით დარჩიას მიერ წინასაახალწლოდ შეძენილი ძვირადღირებული ავტომანქანების ყიდვასთან დაკავშირებით ისაუბრა.
მისი თქმით, ავტომანქანების შეძენის დროს, კორუფციული გარიგების ნიშნები შეიმჩნევა, რაც დანაშაულებრივი ქმედებაა.
"2014 წლის 25 დეკემბერს ხელშეკრულება N135-ის საფუძველზე ოზურგეთის მუნიციპალიტეტის გამგეობამ გამარტივებული შესყიდვის საშუალებით ფიზიკურ პირს – ნინო ნადარეიშვილისგან შეისყიდა ავტოსანტრასპორტო საშუალება TOYOTA FJ CRUISER. მუნიციპალიტეტმა ასევე, გამარტივებული შესყდვების საშუალებით 2014 წლის 29 დეკემბერს გაფორმებული ხელშეკრულების N139-ის საფუძველზე ინდმეწარმე ფრიდონ ირემაშვილისგან შეიძინა "ლექსუსის" მარკის ავტოსანტრასპორტო საშუალება.
პირველ შემთხვევაში, ოზურგეთის მუნიციპალიტეტმა ავტომობილის შესაძენად ბიუჯეტიდან გადარიცხა 43 700 ლარი, ხოლო მეორე შემთხვევაში 40 000 ლარი.
ორივე შემთხვევა არის დანაშაულებრივი ქმედება და შეიმჩნევა კორუფციული გარიგების ნიშნები. ვინაიდან არ არსებობდა არცერთი საფუძველი, რაც გამგებელს მისცემდა იმის საშუალებას ერთ პირთან მოლაპარაკების საფუძველზე შეეძინა აღნიშნული ავტომობილი, გარდა ამისა ჩემთვის გაუგებარია რა აუცილებლობას წარმოადგენდა ბიუჯეტის სახსრებით მაღალი გამავლობის ავტომობილის შეძენა.
ყოველივე ამის გათვალისწინებით მივმართავ შესაბამის ორგანოებს დაინტერესდნენ აღნიშნული საკითხით რადგან საქმე გვაქვს ბიუჯეტის არამიზნობრივ ხარჯვასთან. ეს ფაქტი კიდევ ერთხელ ადასტურებს იმას, რომ "ქართული ოცნება" ნაცვლად საქმის კეთებისა განაგრძობს ბიუჯეტის სახსრებით პირადი კეთილდღეობის მოწყობას",_ აღნიშნა მჟავანაძემ პრესკონფერენციაზე.
აღნიშნულთან დაკავშირებით "გურია ნიუსთან" კომენტარს აკეთებს ოზურგეთის მუნიციპალიტეტის გამგებლის მოადგილე არჩილ ყაზაიშვილი:
"საზოგადოებისათვის ცნობილია, რომ მუნიციპალიტეტის გამგეობას ბალანსზე ერიცხებოდა 2003 წელს გამოშვებული ავტომანქანა "მერსედეს ბენც 320", რომელიც ფაქტობრივად ამორტიზირებული იყო და მუნიციპალიტეტის როგორც აღმასრულებელი ორგანო მოკლებული იყო შესაძლებლობას იმისა, რომ დროულად მოეხდინა რეაგირება და გადაადგილება საჭირბოროტო საკითხების გადასაწყვეტად.
აღნიშნული პრობლემის გამო, ხშირ შემთხვევაში ხელი ეშლებოდა მუნიციპალიტეტის ფუნქციონირებას და ამ მიზნით მუნიციპალიტეტმა დაგეგმა შეესყიდამაღალი გამავლობის ავტოსატრანსპორტო საშუალებები.
ოზურგეთის მუნიციპალიტეტის საკრებულომ განიხილა აღნიშნული საკითხები და გადაუდებელი აუცილებლობიდან გამომდინარე, "სახელმწიფო შესყიდვების შესახებ" საქართველოს კანონის 101 მუხლის მე-3 პუნქტის "ბ" ქვეპუნქტის და "გამარტივებული შესყიდვის, გამარტივებული ელექტრონული ტენდერისა და ელოქტრონული ტენდერის ჩატარების წესის დამტკიცების შესახებ" სახელმწიფო შესყიდვების სააგენტოს თავმჯდომარის 2011 წლის 7 აპრილის N9 ბრძანების მე-3 მუხლის მე-2 პუნქტის "ბ" ქვეპუნქტის შესაბამისად, ზემოთ აღნიშნული საქონლის შესყიდვა განხორციელდა გამარტივებული შესყიდვის საშუალებით" _ აღნიშნავს ყაზაიშვილი.
ამავე თემაზე: ძვირადღირებული ავტომობილები _ წინასაახალწლოდ
