რამდენიმე თვეა, რაც ქალაქ ოზურგეთის ცენტრში, ავტომობილები შეფერხებულად მოძრაობენ. გადათხრილია ცენტრალური გზები, დაზიანებულია ასფალტის საფარი.
მოსახლეობას აინტერესებს ვინ არის პასუხისმგებელი ქუჩების მოწესრიგებაზე და როდის აღდგება დაზიანებული ასფალტი.
შპს "გაერთიანებული წყალმომარაგების კომპანიის" გურიის სერვისცენტრის ხელმძღვანელის, დავით ცერცვაძის განცხადებით, საქართველოს რეგიონული განვითარებისა და ინფრასტრუქტურის სამინისტროს "მუნიციპალური განვითარების ფონდი", "გაერთიანებული წყალმომარაგების კომპანიასთან" ერთად, ქალაქ ოზურგეთში, მასშტაბურ ინფრასტრუქტურულ პროექტს ახორციელებს.
30 კილომეტრიან მონაკვეთზე ამორტიზირებული მილების გამოცვლა და სატუმბი სადგურიდან გამომავალი მილსადენისა და ქალაქის ცენტრალური უბნების გამანაწილებელი ქსელების რეაბილიტაცია ხორციელდება.
აღნიშნული სამუშაოები სამი თვეა მიმდინარეობს, თუმცა იმ ადგილას, სადაც უკვე გამოცვლილია დაზიანებული და ამორტიზირებული მილები, ქუჩები გადათხრილია და ისე დატოვებული.
"გურია ნიუსის" კითხვაზე, ვისი ვალდებულებაა ქალაქ ოზურგეთის ქუჩების მოწესრიგება, ქალაქ ოზურგეთის მუნიციპალიტეტის საკრებულოს თავმჯდომარე გელა კობალაძე განმარტავს, რომ ქალაქ ოზურგეთში წყლის მილების სარეაბილიტაციო სამუშაოებთან დაკავშირებით, ცენტრალური გზების მოწესრიგება წყალმომარაგების კომპანიამ უნდა განახორციელოს.
"მიმდინარეობს წყლისამორტიზირებული მილების სარეაბილიტაციო სამუშაოები, შემდეგ უნდა მოხდეს საფარის დატკეპნა, წყალკანალს აქვს ვალდებულება აღებული, რომ მათ გააკეთონ დაზიანებული ასფალტი, ამის შემდეგ ქალაქში იგეგმება სანიაღვრე არხების გაკეთება, რათა განმეორებითი სტიქიის შედეგად არ დაიტბოროს ქალაქის ქუჩები, ამის შემდეგ მოწესრიგდება არხები და გაკეთდება სპეციალური ცხაურები, რაც შეეხება გადათხრილ ქუჩებს, სამუშაოებს ასრულებს წყალკანალი და მათვე აქვთ ვალდებულება მოაწესრიგონ ეს ქუჩები, რა ვადებში უნდა მოხდეს ეს, ზუსტ ინფორმაციას ვერ გეტყვით, დანარჩენი ქუჩების რეაბილიტაცია უკვე ქალაქის მერიამ უნდა მოახდინოს, ამინდებზეა დამოკიდებული, სავარაუდოდ გაზაფხულზე დაიწყება შიდა გზების მოწესრიგება", _ გვითხრა კობალაძემ.
"გურია ნიუსი" დაინტერესდა, რა ვადაში მოხდება ქალაქ ოზურგეთის ცენტრალურ ქუჩებში დაზიანებული ასფალტის აღდგენა, შპს "გაერთიანებული წყალმომარაგების კომპანიის" გურიის სერვისცენტრის ხელმძღვანელი დავით ცერცვაძე განმარტავს, რომ მიმდინარე სამუშაოები მოიცავს წელიწადნახევარს.
"სამი თვეა რაც დაიწყო, ერთი წლის განმავლობაში სამუშაოები გაგრძელდება, მაგრამ სულ ასე გადათხრილი ქუჩები არ იქნება, მეორე თვეში უკვე იგეგმება შეცვლილი მილების გამოცდა, ამას სჭირდება დრო პროცესუალურად გარეცხვა, დეზინფექცია და წნევაზე შემოწმება მოხდება, ეს პროცესები უკვე ჩადებულ მილებზე დაიწყება მომავალი თვიდან და შესაბამისად დადებითი შედეგის შემთხვევაში უკვე წავა ასფალტის მოპირკეთებითი სამუშაოები, რაც მალე დასრულდება კარგია, რადგან დაიწყება მეორე ეტაპის შესრულება, პირველად მოხდება აღმაშენებლის ქუჩის დამუშავება, შემდეგ გადავალთ სხვა ქუჩებზე.
წყალმომარაგების კომპანიამ, სადაც დააზიანა ასფალტი, ის ყველა აღადგინა თავისივე ხარჯებით, რაც დაზიანებაა იყო ის აღდგენილია, რაც შეეხება მიმდინარე სამუშაოებს, კონტრაქტორს უდევს დაზიანებული ასფალტის საფარის აღდგენის პროექტი და თვითონვე აღადგენს, რაც უმოკლეს ვადებში მოხდება", – გვითხრა ცერცვაძემ.
