_ გვყავს რამდენიმე სული მსხვილფეხა რქოსანი პირუტყვი. გთხოვთ, გვიამბოთ ბიოგაზის დანადგარის ამუშავების, რეგულირების და უსაფრთხო ექსპლოატაციის წესების შესახებ. ძალიან გვსურს, ეს დანადგარი ჩვენს ოჯახში გავაკეთოთ და მივიღოთ როგორც გაზი, ისე უნიკალური ორგანული სასუქი.
რომან ნაცვალაძე, რევაზ ცვიტინიძე, ოზურგეთი, სოფელი ასკანა
ჩვენ დავუკავშირდით აღნიშნული საქმის მცოდნეს, ქობულეთის მუნიციპალიტეტში მცხოვრებ თემურ ირემაძეს და ვთხოვეთ, დაინტერესებული ფერმერებისთვის მოეწოდებინა ინფორმაცია, თუ როგორ დაიწყონ ბიოგაზის დანადგარის მშენებლობა.
_ ალბათ, ბიოგაზის მიღების ყველა მსურველმა იცის ელემენტარული საჭიროების შესახებ, რომ საწყის ეტაპზე საჭიროა ავზის შეძენა ან სასურველი სიღრმის ორმოს ისე ამოშენება, რომ სითხემ არ გაჟონოს. ეს ავზი ბოლომდე უნდა აივსოს ახალი ან 1-2 თვის ნაკელის ხსნარით. ნაკელი ზავდება წყალთან წილით 1:1. თუ ნაკელი მშრალია, მაშინ პროპორციით _ 2:1. მიღებული ხსნარი უნდა იყოს ფაფისებური და ერთგვაროვანი. გაზავებისას კი, გარემო ტემპერატურის მიუხედავად, იხმაროთ 30-40 გრადუსის მქონე წყალი. განსაკუთრებით უნდა მიაქციოთ ყურადღება იმას, რომ დანადგარის ამუშავებისთვის საჭიროა ბიოგაზის დანადგარში გადამუშავებული ბიო-მასის გამოყენება განსაზღვრული რაოდენობით, რათა სწრაფად მოხდეს მეთანგამომყოფი ბაქტერიების გამრავლება და ამოქმედება. ბიოგაზის დანადგარის ნორმალური ექსპლუატაციისთვის უცილობელი პირობაა ასევე დანაგარის ტემპერატურული რეჟიმის დაცვა. გაზის წარმადობის გაზრდისთვის ტემპერატურის გარდა, დიდი მნიშვნელობა ენიჭება ნაკელის ხსნარის პერიოდულ არევას. რაც შეეხება გაზქურის რეგულირებას, ამისთვის არსებობს სპეციალური ლიტერატურა და ახლა ამაზე საუბარი შორს წაგვიყვანს. რაც ყველაზე მთავარია, უნდა გვახსოვდეს უსაფრთხოების ღონისძიებების დაცვა. მუდამ უნდა გვახსოვდეს ასევე, რომ ბიოგაზის დანადგარი არის ფეთქებადი და აალებადი აირი.
აღნიშნულ დანადგარზე ვრცელდება საწვავი გაზების აპარატების ექსპლოატაციის უსაფრთხოების წესები. ბიოგაზიც, ისევე, როგორც სხვა საწვავი გაზი, ჰაერთან 6-8%-ით შერევისას ფეთქებადი ხდება. ამიტომ ძალიან საშიშია მისი დაგროვება ოთახში და სპეციფიური სუნის შემთხვევაში სასწრაფოდ უნდა გადაკეტოთ გაზქურა, გააღოთ ფანჯრები და გაანიავოთ ოთახი ასანთის ანთების და ნათურის ჩართვის გარეშე.
