ჩვენში, ციტრუსების მავნებელ-დაავადებებისგან დაცვის სისტემაში მინერალური ზეთების გამოყენების მრავალწლიანი ტრადიცია არსებობს _ მეციტრუსეები მათ “გაშავებული ფოთლის გაწმენდის” საუკეთესო საშუალებად მიიჩნევენ. გარდა ამ ეფექტისა, ბევრმა არ იცის, რომ მინერალური ზეთის ემულსიები, ამავე დროს და უპირველეს ყოვლისა, ინექტო-აკარიციდული პრეპარატებია და მოქმედებენ მცენარის მავნე მწერების (ფარიანები, ცრუფარიანები, ჩრჩილები, ფსილები, ტკიპები) წინააღმდეგ. ამ უკანასკნელი თვისების, განსაკუთრებით ოვოციდური (მავნებლის კვერცხებზე ზემოქმედების) და აკარიციდული (მავნე ტკიპების წინააღმდეგ) ტოქსიკურობის გასაძლიერებლად და საჭირო შედეგის მისაღწევად, იგი საჭიროებს სხვა ინექტო-აკარიციდების დამატებას.
მავნებელთა უმრავლესობის ზრდასრულ ფორმებსა და მატლებში ჰაერცვლა ხდება სასუნთქი სტიგმებით, რომელიც გარეთ გამოდის სხვადასხვა მიმართულებით, ხოლო კვერცხებში სუნთქვა მიმდინარეობს მთელი ზედაპირით. მინერალური ზეთი კაპილარული ძალით ადვილად ბლოკავს სასუნთქ გზებს, რაც საბოლოოდ იწვევს მავნებლის ფიზიკურ მოხუთვას.
მინერალური ზეთის მოქმედების მაღალი ტექნიკური ეფექტის მისაღებად, საჭიროა მავნებლის ორგანიზმის ან მისი კვერცხების მაქსიმალური, მთლიანი დაფარვა აპკით, რათა შეიზღუდოს ტრაქიების გზით სუნთქვა და მწერმა განიცადოს ასფიქსია.
ამიტომ ემულსების ფოთოლზე თანაბარი და სრული განაწილების მიზნით, ახდენენ მის არა ჩვეულებრივ შესხურებას, არამედ “გაბანვას.”
პრეპარატის მოქმედების ეს მექანიზმი გამორიცხავს მასზე რეზისტენტობის (შეგუების) გამომუშავებას მავნებლის მხრიდან, რაც ძალზე მნიშვნელოვანი მახასიათებელია.
ჩვენი რეგიონის მეციტრუსეებს ვთავაზობთ მინერალ ზეთს _ “ტრინოლ 2”. ტექნოლოგიურად პრეპარატი მიიღება ნავთობპროდუქტების ვიწრო ტემპერატურულ დიაპაზონში გამოხდით, თავისუფალია მავნე მინარევებისგან. რეპარატული ფორმა ერთგვაროვანია, არ იწვევს მცენარეზე ფიტოტოქსიკურობას, უვნებელია ცხოველისა და ადამიანისთვის; ითვლება ორგანულ სოფლის მეურნეობის წარმოების პესტიციდად.
“ტრინოლ 2” გამოიყენება სასოფლო-სამეურნეო კულტურების მავნებელთა კომპლექსის მოზამთრე სტადიების (კვერცხი, მატლი) წინააღმდეგ, მცენარის მოსვენების სტადიაში კვირტების დაბერვამდე.
პრეპარატის ხარჯვის ნორმა: ვაშლი, ატამი, ალუბალი, მსხალი _ 17-20 ლიტრი 1000 ლიტრ წყალზე; ციტრუსებში _ 12-15 ლიტრი 1000 ლიტრ წყალზე.
პრეპარატი თავსებადია მრავალ სტანდარტულ პესტიციდთან. დამატებით ინფორმაციას მისი გამოყენების სხვა საკითხების შესახებ, მიიღებთ სპეციალისტებთან.
