დიდთოვლობის გამო შეფერხდა მოძრაობა ცენტრალური მაგისტრალის, მათ შორის თბილისისა და ბათუმის მიმართულებით, არ მოძრაობდნენ სამარშრუტო ტაქსები, შესაბამისად, არც ერთ სოფელში არ იყო გზა გაწმენდილი და არ დადიოდა საზოგადოებრივი ტრანსპორტი.
ოზურგეთის მუნიციპალიტეტის სოფლების: გურიანთის, ვაკიჯვრის, თხინვალის, შრომის, ლაითურის, ბაილეთის, ნაგომრის, ნატანების, ცხემლისხიდის, ასკანის, ნარუჯის, ძიმითის რწმუნებულები და სპეციალისტები “გურია ნიუსთან” მათ სოფლებში არსებულ პრობლემებზე საუბრობენ. მათი თქმით, ელექტროენერგია სოფლებს ორი დღის განმავლობაში არ მიეწოდებოდა და არც სამარშრუტო ტაქსები მოძრაობდნენ.
მიუხედავად ამისა, გურიის გუბერნატორი ვალერი ჩიტაიშვილი “გურია ნიუსთან” საუბარში აღნიშნავს, რომ ადგილობრივი ხელისუფლება სრულიად მობილიზებულია.
_ იცით, რომ ძალიან დიდი თოვლი მოვიდა, თუმცა, შესაბამისად, მუნიციპალიტეტები მუშაობენ, ყველა სოფელში გაშვებულია ტექნიკა, იწმინდება გზები. რაც შეეხება ელექტროენერგიას, დაახლოებით ერთ საათში იქნება შუქი. სოფლებში 35 მაღალი ძაბვის ხაზია გაწყვეტილი. დასავლეთიდან გამოშვებულია დამატებითი ჯგუფები, რომლებიც მუშაობენ და დღის განმავლობაში ეტაპობრივად აღდგება შუქის მიწოდება. სოფლებშიც დღის განმავლობაში აღდგება ტრანსპორტირებაც.
_ მოქალაქეებს დახმარებისთვის ხომ არ მოუმართავთ?
_არა, ჩემთვის არავის მოუმართავს. სამივე მუნიციპალიტეტი საგანგებო რეჟიმში მუშაობს. საწვავით მარაგდება ტექნიკა, საგზაო დეპარტამენტი წმენდს ცენტრალური მაგისტრალს. ველაპარაკე ჩოხატაურის ადგილობრივი ხელისუფლების წარმომადგენლებს _ ბურნათზე გასულია ტექნიკა, თუმცა, იქ მთელი ღამის განმავლობაში იწმინდებოდა გზა. რაც შეეხება ჩოხატაურის სოფლებს, სურებსა და ზოტში ძალიან დიდი თოვლი არ არის. დიდი თოვლია ძირითადად ოზურგეთის მუნიციპალიტეტში, განსაკუთრებით, ვაკიჯვარში. ლანჩხუთშიც მუშაობენ საგანგებო რეჟიმში. რაც შეეხება ელექტროენერგიას, ამ მხრივ პრობლემებია ჩოხატაურშიც, მაგრამ იქაც გასულები არიან “ენერგო პრო ჯორჯიას” საავარიო ჯგუფის წარმომადგენლები და იქაც მალე აღდგება ელექტროენერგია.
ოზურგეთის მუნიციპალიტეტის გამგებლის მოვალეობის შემსრულებელი ილია ვაშაყმაძე ამბობს, რომ “თოვლის საფარი დაახლოებით 50 სანტიმეტრი იქნება, რამდენიმე სოფელს შუქი არ მიეწოდება, გასულია მუშა ჯგუფები, მიმდინარეობს აღდგენითი სამუშაოები, არის მძიმე სიტუაცია. დაზიანებულია ელექტროგადამცემი ხაზები, რაც შეეხება გზას, მუშაობს გრეიდერი და გაიწმინდება გზები”.
_ ჩვენ გვიკავშირდებიან სოფლებიდან და გვეუბნებიან რომ გზები არ არის გაწმენდილი.
_ წუხელ მუშაობდა ტექნიკა, მაგრამ დღეს ისევ თოვს და ანალოგიური სიტუაციაა. თოვლი არის ძალიან მძიმე. გარკვეული სოფლის გზები გავწმინდეთ. არ შეიძლება ერთდროულად გაიწმინდოს 28 სოფელი და 115 ქუჩა. თუმცა, ვცდილობთ რომ მალე აღმოვფხრათ ეს პრობლემები.
“ენერგო-პრო ჯორჯიას” ოზურგეთის სერვისცენტრის ხელმძღვანელმა გია ნაკაიძემ “გურია ნიუსთან” სატელეფონო საუბარში გაიკვირვა, ვინ გითხარათ რომ ოზურგეთის მუნიციპალიტეტში შუქი არ არისო(?!).
თოვლი ოზურგეთში _ გიორგი გირკელიძის ფოტორეპორტაჟი
