ოფიციალური დოკუმენტების საფუძველზე ოზურგეთის მუნიციპალიტეტის სოფელ ნატანების თემს სოფლის პროგრამის ფარგლებში 105 ათასი ლარი გამოეყო, რომელიც მოსახლეობის მიერ არჩეული პრობლემის გადაჭრას უნდა მოხმარდეს. როგორც გამგებლის წარმომადგენელი ნატანების თემში ილია თავაძე აღნიშნავს, მოსახლეობამ უპირატესობა სოფლის კრებაზე ნატანების ცენტრის კეთილმოწყობას მიანიჭა.
ოზურგეთის მუნიციპალიტეტის ნატანების თემში ყველაზე მეტი ამომრჩეველი ცხოვრობს. ის მრავალრიცხოვანი სოფელია. მოსახლეობას ყოფითი პრობლემებიც მრავლად აქვს.
აქვთ წყლის პრობლემა. ადგილობრივების თქმით, წყალი მხოლოდ სოფლის ცენტრში მიეწოდება მოსახლეობას. მოუწესრიგებელია შიდა გზები, ითხოვენ გაზის შეყვანას და ძალიან წუხან სოფლის ცენტრში მდებარე დანგრეული, უფუნქციო შენობების გამო.
გამგებლის წარმომადგენელთან დილის 10 საათზე მივედით. სამუშაო საათების მიუხედავად ის ადგილზე არ დაგვხვდა. თუმცა მალევე მოვიდა და დაგვიანების მიზეზი დილიდანვე მოუცლელობით ახსნა.
ჩვენს მიერ დასმულ კითხვებზე – რას მოხმარდა სოფლის პროგრამის ფარგლებში გამოყოფილი თანხა, მიიღო თუ არა ადგილობრივმა მოსახლეობამ მონაწილეობა პრიორიტეტის შერჩევაში, გვპასუხობს, რომ 2015 წელს გამოყოფილი 105 ათასი ლარიდან 60 ათასი ლარი იუსტიციის სახლის გარეპერიმეტრის კეთილმოწყობისთვის გაიხარჯა, დანარჩენი თანხა შენახულია და გარეგანათების მოწყობას უნდა მოხმარდეს.
ილია თავაძე ამბობს, რომ იუსტიციის სახლის მშენებლობა დაახლოებით 450 000 ლარი დაჯდა. გასულ წლებში კი გარემონტდა კლუბი შიგნით, რაშიც 84 000 ლარი დაიხარჯა, დარჩენილი 12 000 ლარით კლუბი გადაიხურა, სახურავი შეიცვალა. წინა წელს 72 000 ლარით საბავშვო ბაღის პირველი ფლიგერი გარემონტდა:
"გამოყოფილია დაახლოებით 104 ათასი ლარი. ამ თანხით ჩვენ გვინდოდა სოფლის ცენტრის კეთილმოწყობა. რადგან სოფელში აშენდა იუსტიციის სახლი, საზოგადოებრივი ცენტრი, მასთან მისასვლელი გზა იყო მოუწყობელი და გადავწყვიტეთ, რომ სოფლის პროგრამების გარკვეული ნაწილით დაგვეფინანსებია ამ ტერიტორიის კეთილმოწყობა.
ამიტომ მოვაწყვეთ იუსტიციის სახლის მიმდებარე ტერიტორია და სამუშაოები მალე დამთავრდება. ამასთან ერთად, უნდა განათდეს სოფლის ცენტრი მთლიანად, შეიცვალოს ძველი ბოძები ახლით, თანამედროვე განათებებით, ეს დაახლოებით 20 ივლისისთვის დასრულდება."
_ბატონო ილია, სოფლის ცენტრში პარკის მოწყობა აღარ იგეგმება?
_ როგორ არა. სოფლის ცენტრში ასფალტი დაიგო, პარკი მოეწყო, სკამები გაკეთდა ხალხის მოსასვენებლად. დაიგო 1300 კვ.მ ასფალტი, 400 კვ.მ ფილა. გაკეთდა ღობე, რომლის მშენებლობაზე 1 600 ბლოკი გაიხარჯა. მოეწყო განათებები 6 ბოძით. დაიგო ეკლესასიასთან მისასვლელ გზაზე ასფალტი. ახლა დავიწყებთ განათებების გაკეთებას, სოფლის პროექტებზე მორჩენილია 30 000 ლარი და გარეგანათების პრობლემა სრულად მინდა მოვაგვაროთ.
_იყო თუ არა მოსახლეობის აზრი გათვალისწინებული ამასთან დაკავშირებით?
_ კი, რა თქმა უნდა.
_ შეგიძლიათ გვაჩვენოთ სოფლის კრებების ოქმი, ვინ ესწრებოდა, ხელი ვინ მოაწერა?
_ ეს მე არ მაქვს. ეს ბატონ მერაბს ჩავაბარე, კრებას ესწრებოდა მერაბი და მოადგილეები, იქნება ინფრასტრუქტურის სამსახურში და იქ მოიკითხეთ.
_ ანუ თქვენ ამბობთ, რომ 60 000 ლარის დახარჯვა პარკის კეთილმოწყობისთვის მოსახლეობამ გადაწყვიტა, თუ თქვენი ინიციატივა იყო?
_კი სოფლის კრებაზე გადაწყვიტა მოსახლეობამ, თანხაზე არ ყოფილა საუბარი, ეს იყო ძირითადი მოთხოვნა.
_სოფელში სხვა პრობლემები არაა?
_კი, როგორ არა. არის გზების პრობლემა, რომელიც გვარდება. ჩამოირიცხა მილიონ 600 000 ლარი უკვე ცენტრალური ხელისუფლებიდან. აქედან გარკვეული ნაწილი ჩვენ გვერგება. მთავრდება საკუპრეს გზა მთლიანად, ასევე, ჯაფარეულაში ვაგებთ მთლიანად, ორშაბათს დავიწყეთ ლეკურას გზის მშენებლობა. ამას მუნიციპალიტეტი აკეთებს აბაშმაძის ხელმძღვანელობით.
_სოცილაურად დაუცველები ბევრი გყავთ?
_ ძალიან ბევრს ეხმარება ბატონო მერაბი, ოზურგეთის გამგებელი, ძალიან ბევრი დააფინანსა მისი ფონდიდან.
_წყლის პრობლემე აზე რას გვეტყვით?
_ შეკვეთილი -ურეკის წყალმომარაგების მშენებლობას ფრანგული კომპანია უზრუნველყოფს. 70 მილიონიანი პროექტია. რამოდენიმე დღის წინ დაიწყეს მუშაობა. კეთდება რეზერვუარები. ადგილზე წყლის პრობლემა არის, რა თქმა უნდა.
რამოდენიმე ადგილას წერტილოვანი ჭაბურღილებია, ასე თუ ისე, მოსახლეობას წყალი მიეწოდება. მაგალითად ცენტრში მარაგდება მოსახლეობა. ლეკურას უბანი ნაწილობრივ, სოფლის 50 % წყალი მიეწოდება.
არის სხვა პრობლემები, მაგრამ სოფელი დიდია, 100 000 ლარი არ არის საკმარისი. ცოტ -ცოტა რომ გააკეთო სოფელს არ დაემჩნევა.
იყო თუ არა მოსახლეობის მოთხოვნა იუსტიციის სახლის გარეპერიმეტრის მოწყობა, იციან თუ არა რა ოდენობის თანხა გამოიყო ნატანების თემისთვის სოფლის პროგრამის ფარგლებში, აღნიშნულთან დაკავშირებით ადგილობრივებს გავესაუბრეთ. უმრავლესობამ არც კი იცის რა გაკეთდა ამ თანხის ფარგლებში, არ იციან გამოყოფილი თანხის რაოდენობაც.
ნატანების ცენტრში შეკრებილები „გურია ნიუსთან“ აღნიშნავენ, რომ გამოყოფილი თანხა შიდა გზების მოწყობას ხმარდება. ასევე სოფელში არსებულ ყოფით საკითხებზე საუბრობენ და აღნიშავენ, რომ უმუშევრობა ყველა ოჯახის მოუგვარებელ პრობლემადაა ქცეული.
თინა ცენტერაძე: პირველ რიგში უმუშევრობაა, წამლები ძვირია, პენსიონერი ვარ. ეს ის პრობლემებია, რომელიც ყველაზე მეტად მაწუხებს. რაც შეეხება სოფლის პროგრამის ფარგლებში გამოყოფილ თანხას, ნამდვილად არ ვიცი, ვერც იმაზე გიპასუხებთ თუ რა გაკეთდა, ეს ჩემი საქმე არაა. მე მგონი შეძლებისდაგვარად ყველაფერი კეთდება.
სოსო ცენტერაძე: ვერაფერს ვერ გეტყვით თანხებთან დაკავშირებით. მგონი გზები გაკეთდა, ეს ალბათ სოფლის პროგრამიდან, ვერ გეტყვით. მთავარია გაკეთდა. ძირითადი პრობლემა უწყლოობაა, მაგრამ ვიცი რომ კეთდება.
გენადი გუჯაბიძე: მოსახლეობას აწუხებს უმუშევრობა, უწყლობა ამ ეტაპზე ყველაზე დიდი პრობლემაა. წელს რამდენი იყო გამოყოფილი? მგონი 70 000 ლარი. რა გაკეთდა არ ვიცი , ალბათ გზები, სოფლის კრებაზე არ ვყოფილვარ. ისე როგორც ვიცი რაღაც კრება ჩატარდა.
სერგო ლაღიძე: შეშა არ გვაქვს, არც წყალი გვაქვს. ნამდვილად არ ვიცი რა თანხა იყო გამოყოფილი, არც მაინტერსებს. რად მინდა, მე მომახმარს ვინმე? ჩემი ფული რომ იყოს, ჯიბეში მექნებოდა. პენსია არ მყოფნის წამლებში, თვეში წნევის წამალი 50 ლარი მიჯდება. მე პენსიის მომატება მინდა. მეტს არაფერს არ ვთხოვ ამ მთავრობას.
მზია კილაძე: პრობლემების მეტი რაა, სიდუხჭირე, უფულობა, რა თანხაა გამოყოფილი, არ ვიცი. იუსტიციის სახლი რომ გაკეთდა, ეს კარგია ძალიან.
მერაბ ღლონტი: უმუშევრობა ყველაზე დიდი პრობლემა, სოფლის პროექტებით გზები კეთდება, გაზი გამოჰყვათ.
ლია გიგუაშვილი: ნატანებში იმდენი პრობლემაა საიდან დავიწყო? ნაწილობრივ სასმელი წყალის პრობლემაა, მარტო ცენტრშია, სხვა უბნებში არაა. მოუწესრიგებელი ყველა შენობა, მე საბავშვო ბაღში ვმუშაობ. დაგვპირდნენ, რომ გაგვიკეთებენ. ყველაზე დიდი პრობლემა, ეს უმუშევრობაა, რა ქნას იმ ხალხმა, ვინც არ მუშაობს და პენსიაც არ აქვს?
