ნაპირსამაგრი სამუშაოების ჩატარება, ჯებირების მოწყობა, გარეგანათება, ეს ის პრობლემებია, რომელიც ქალაქ ოზურგეთში, ე.წ. "ზვანის" უბნის , მერაბ კოსტავასა და კიტა მეგრელიძის ქუჩის მცხოვრებლებმა, ხელისუფლებას, ქალაქ ოზურგეთის მუნიციპალიტეტის საკრებულოს სხდომაზე კიდევ ერთხელ შეახსენეს.
თინა ჯინჭარაძემ, ქეთინო ლომთათიძემ, სკუი ხუგასიანმა , ლამარა სალუქვაძემ საკრებულოს თავმჯდომარეს გელა კობალაძეს და ქალაქ ოზურგეთის მერს ბეგლარ სიორიძეს კოსტავას ქუჩაზე ჯებირების გაკეთება და მდინარე ნატანებზე ნაპირსამაგრი სამუშაოების ჩატარება მოთხოვეს.
"რამდენიმე წელია ვითხოვთ ნაპირსამაგრი სამუშაოების ჩატარებას, ყოველ გაწვიმებაზე მდინარე ნატანები დიდდება და საფრთხეს უქმნის თითოეულ ოჯახს. 2014 წლის 29 სექტემბრის სტიქიამ მთელი საკარმიდამო ნაკვეთები წაგვართვა. ისევ არის საშიშროება, რომ კვლავ ადიდდეს. შემოტანილი გვაქვს 32 კაცის ხელმოწერით განცხადება. რამდენჯერაც მოვედით, ვთხოვეთ ყურადღება მოექციათ, ხან გვეუბნებიან გაკეთდებაო, ხან გვეუბნებიან ბიუჯეტში თანხა არ არისო. როდის დაკმაყოფილდება ჩვენი მოთხოვნა _ განაცხადეს საკრებულოს სხდომაზე ე.წ. ზვანის უბნის მცხოვრებლებმა.
ქალაქ ოზურგეთში, კიტა მეგრელიძის ქუჩის პირველ შესახვევში მცხოვრებლებმა "გურია ნიუსს"აღნიშნული თემით დაინტერესება და გაშუქება სთხოვეს.
თამაზ პაიჭაძე, ზურაბ კილაძე, იამზე სიხარულიძე, ლამარა სალუქვაძე, თინა ჯინჭარაძე 29 სექტემბერს მომხდარი სტიქით დაზარალებულები არიან. მათი თქმით ადიდებულმა მდინარემ და ღვარცოფმა რამდენიმე ოჯახს საკარმიდამო ნაკვეთები წაართვა.
"წყალი რომ ადიდდება, სახლებში შემოდის. მიაქვს საკარმიდამო ნაკვეთები, ბოსტნები, იტბორება ეზოები, მიჰყავს შინაური ფრინველები, ასევე საყანე ფართობები, წაგვართვა სათხილეები.
ეს ყველაფერი ქვის სამტვრევმა დანადგარებმა გამოიწვია, რომელიც ჩვენი ქუჩის ბოლოში მდებარეობს, იცვალა მდინარე ნატანებმა კალაპოტი. ცოტა ხანში ასახლება მოგვიწევს აქედან, წაგვიღო წყალმა და ჩვენი პატრონი არავინ არაა. რამდენჯერ მივმართოთ ხელისუფლებას? ხან გვეუბნებიან გაკეთდებაო, ხან გვეუბნებიან ბიუჯეტში ფული არააო, ჩვენთვის ჩვენი ფული არაა! ხალხის ფული, რომელიც ხალხის კეთილდღეობას უნდა მოხმარდეს?“_ ამბობენ კიტა მეგრელიძის ქუჩის მცხოვრებლები. მათივე განცხადებით, რამდენიმე წელია ითხოვენ ასევე ქუჩის განათების მოწყობას, რომელიც კვლავ მოუგვარებელია.
"გზა ჩვენთვის არ არის, განათება, გაზი, ჩაბნელებულია უბანი. დაუჯერებელია, ნახეთ რა დღეშია ეს წყალი, როგორ ამოსულია? ყველა ზაფხულზე წყალდიდობის საფრთხეა."
ლამარა სალუქვაძე ასევე საუბრობს კიტა მეგრელიძის ქუჩის ბოლოში მდებარე კარიერებზე, რომელიც საფრთხეს უქმნის მოსახლეობას.
"თქვენ თვითონც ხედავთ, სადაც ვხოვრობთ. რამდენიმე მეტრში სასაფლაოა, რომელსაც მდინარე ნატანების კალაპოტის შეცვლის გამო ძირი თანდათან ეთხრება, აქვეა რკინიგზა და ქალაქ ოზურგეთთან დამაკავშირებელი ცენტრალური ხიდი, რომელსაც მდინარე უთხრის საძირკველს"
"სარკინიგზო ხიდი ცუდ მდგომარეობაშია. რა მოხდა თბილისში თქვენ კარგად მოგეხსენებათ. შეიძლება ერთი სანტიმეტრის გამო უბედურება მოხდეს. სანამ უბედურება მოხდება, ძალიან გთხოვთ, მოგვაქციონ ყურადღება.
კაცმა არ იცის რა მოხდება და რას ველოდებით. რკინიგზის ბოძს წყალი ძირს უთხრის. ამ სტიქიაზე 30 მეტრი მიწა წაიღო, რა გახდა ამ ჯებირებისა და ნაპირსამაგრი სამუშაოების ჩატარება? გვითხარით რა გვეშველება?
მიაწვდინეთ ცენტრალურ ხელისუფლებასაც ხმა. ჩვენ დაზღვეული არ ვართ უბედური შემთხვევისგან. კარიერების გამო ხდება ყველაფერი. ოზურგეთი ქვიშად არის ქცეული, თიხის ქალაქი გეგონებათ.
ადგილობრივი მთავრობა არ ინტერესდება ჩვენი პრობლემებით.“-განაცხადეს ქალაქ ოზურგეთში, კოსტავასა და კიტა მეგრელიძის ქუჩის მცხოვრებლებმა.
ქალაქ ოზურგეთის მერიის პოზიცია აღნიშნულთან დაკავშირებით ასეთია: "კოსტავას ქუჩის აღნიშნულ მონაკვეთზე გაბიონის მშენებლობის შესახებ ქალაქ ოზურგეთის მუნიციპალიტეტის მერიის მიერ საპროექტო – სახარჯთაღრიცხვო დოკუმენტაცია უკვე მზად არის. ხარჯთაღრიცხვა 497 900 ლარს შეადგენს. ქალაქის მერია საქართველოს მთავრობის დაფინანსებას ელოდება და აღნიშნული სამუშაო წლის ბოლომდე შესრულდება"
