სუფსის მაცხოვრებელმა, ალეკო ევგენიძემ თანასოფლელ მარინა გუჯაბიძესა და ზვიად სარალიძესთან ერთად პრესკონფერენცია გამართა, რომლის თემა კარგად ნაცნობი – სუფსის ტერიტორიაზე გამავალი ავტომაგისტრალის მშენებლობასთან დაკავშირებული სადაო საკითხები იყო.
ევგენიძემ მედიასთან საუბარი იმით დაიწყო, რომ ქალბატონ მარინას, კუთვნილ ფართობში, ყოველგვარი ნებართვის გარეშე შეიჭრა სამუშაოების მწარმოებელი ჩინური კომპანია, რის გამოც, სათიბი ფართობი გაუნადგურდა.
" მაშინ ასევე დაზიანდა სხვა საყანე ფართობებიც. ჩვენ ადგილზე მივედით და კომპანიის წარმომადგენლებს ვთხოვეთ დაუყოვნებლივ დაეტოვებინა ფართობი. ექვს აგვისტოს საპროტესტო აქცია სწორედ ქალბატონ მარინას მხარდასაჭერად გავმართეთ. ფაქტთან დაკავშირებით განცხადებით მივმართეთ სუფსის პოლიციას, თუმცა, იქედან ასეთი პასუხი მივიღეთ: -" თქვენი 2015 წლის ექვსი აგვისტოს ზეპირი შეტყობინების (არადა, წერილობითი შეტყობინებით მივმართეთ) საფუძველზე შევისწავლეთ თქვენსა და ჩინურ კომპანიას შორის, სათიბი ფართობის დაზიანების გამო უთანხმოება და გაირკვა, რომ იგი წარმოადგენს სამოქალაქო დავის საგანს და უნდა მიმართოთ სასამართლოს".
ჩვენთვის ისედაც გასაგები იყო, პოლიცია ამ საკითხს ვერ მოაგვარებდა, მისგან მხოლოდ მოკვლევას ველოდებოდით – უნდა დაეკითხათ ქალბატონი მარინა, ჩინური კომპანიის წარმომადგენლები, ქართული მხარე, რომელიც აკონტროლებს ამ გზის მშენებლობას. სწორედ ამ მოკვლევის საფუძველზე ქალბატონი მარინა მიმართავდა სასამართლოს, რომელიც თავის მხრივ გამოითხოვდა პოლიციის მიერ დადებულ მოკვლევას და დადგინდებოდა სიმართლე. ვფიქრობ, პოლიციის განყოფილებაზე ხელისუფლების გარკვეული ეშელონების მხრიდან ზეწოლა განხორციელდა", _ განაცხადა ევგენიძემ.
აღსანიშნავია, რომ აღნიშნულ ფაქტთან დაკავშირებით 20 აგვისტოს შეხვედრაზე მყოფმა საავტომობილო გზების დეპარტამენტის თავმჯდომარის მოადგილემ, ირაკლი ლითანიშვილმა აქციის მონაწილეებს განუცხადა, რომ კომპანიას ამის უფლება არ ჰქონდა და თუ ეს ფაქტი სინამდვილე იყო, ამისთვის პასუხიც მოეთხოვებოდა.
დღევანდელ პრესკონფერენციაზე ევგენიძემ ასევე მეორე დაზარალებულზეც გაამახვილა ყურადღება. კერძოდ, როგორც მან აღნიშნა, ზვიად სარალიძის კუთვნილი მიწის ნაკვეთი საავტომობილო გზების დეპარტამენტს ეკონომიკის სამინისტროსთვის გადაუცია, იმ მოთხოვნით, რომ მისი ექსპროპრიაცია მოხდეს.
"ყველაფერი ამ ადამიანის დაშინების მიზნით განხორციელდა. ეკონომიკის სამინისტროში ისე მოითხოვეს ექსპროპრიაცია, აუდიტის დასკვნა არ წარუდგენიათ. ასევე სამინისტროს გააცნეს ცრუ ინფორმაცია, თითქოს ეს ადამიანი წინააღმდეგი იყო ავტობანის მშენებლობის. ამ დროს არანაირი წინააღმდეგობა არ არსებობდა, იყო მხოლოდ შეუთანხმებლობა რამდენიმე საკითხში. მოსახლეობის მთავარი მოთხოვნა იყო მისცემოდა საშუალება პროექტს გაცნობოდა და მომხდარიყო მიწების შეფასების აუდიტორული დასკვნის შეცვლა.
ორშაბათს, 31 აგვისტოს ჩვენთან შეხვედრაზე იმყოფებოდა გურიის გუბერნატორის მოადგილე ბატონი სოსო ერქომაიშვილი, რომლისგანაც ჩვენს მიერ წაყენებულ მოთხოვნებზე პასუხად მივიღეთ უარი. ამიტომ სოფლის მოსახლეობის მოთხოვნით გადაწყდა ამ პრესკონფერენაციის გამართვა.
ქობულეთსა და ნატანებში საშუალო არითმეტიკულიდან გამომდინარე მისცეს მოსახლეობას მიწის საფასური, ჩვენთან კი სამწუხაროდ, ასე არ მოხდა. სხვათა შორის, ქალბატონ მარინასთან მისულები იყვნენ ჩინური კომპანიის წარმომადგენლები და შესთავაზეს, თუ სასამართლოს არ მიმართავდა, ზარალს დაახლოებით ერთ კვირაში აუნაზღაურებდნენ, თუმცა, ექვსი აგვისტოს შემდეგ არავინ გამოჩენილა. 250 ადამიანია დაზარალებული მთლიანად, აქედან 80 – მა გაყიდა კუთვნილი ფართობი, ზოგი შეცდომაში შეიყვანეს, ზოგისთვისაც მისაღები იყო შეთავაზებული სამი ლარი", _ აღნიშნა ევგენიძემ.
გაზეთ "ჰო და არას" ოფისში გაართულ პრესკონფერეციაზე სუფსის თემის მაცხოვრებლებმა ლანჩხუთის მუნიციპალიტეტის გამგებელს, ზაზა ურუშაძე ტყუილშიც დასდეს ბრალი, ხოლო საკრებულოს თავმჯდომარეს, გოგი ხელაძეს მშიშარა უწოდეს.
" 17 აგვისტოს აქციის წინა დღეს ჩვენ კონფიდენციალური შეხვედრა გვქონდა ბატონ გამგებელთან, რომელსაც თან საკრებულოს თავმჯდომარის მოადგილე გელა კილაძეც ახლდა. გამგებლის პირდაპირი მოთხოვნა იყო, რომ აქციაზე ტელევიზიები, განსაკუთრებით კი "რუსთავი 2" არ ყოფილიყო. ჩვენ ეს მოთხოვნა ვერ შევუსრულეთ, რადგან შეტყობინება აქციასთან დაკავშირებით ყველასთვის დაგზავნილი გვქონდა უკვე. ეტყობა, ამან გააღიზიანა ურუშაძე და გაბრაზებულმა ვეღარ გააკონტროლა რას ამბობდა, როცა ტელეკომპანია "იმედის" ეთერში გაუგონარი ტყუილი იკადრა – ვითომდა ჩვენ ცრუ ინფორმაციას ვავრცელებთ ნატანებსა და ქობულეთში მოსახლეობისთვის გაცემულ თანხასთან დაკავშირებით. თითქოს მან მოიკვლია და დაადგინა, რომ ეს ტყუილი იყო. სუფსაში გამგებელს მატყუარას ეძახიან.
რაც შეეხება საკრებულოს თავმჯდომარეს, მასთანაც გვქონდა შეხვედრა და ერთი შემიძლია განვაცხადო – ეს არის ყოვლად მშიშარა ადამიანი", _ განმარტა ევგენიძემ.
როგორც პრესკონფერენციაზე ითქვა, მიმდინარე პროცესებთან დაკავშირებით საქმის კურსშია სახალხო დამცველის აპარატი, რომელიც ამიერიდან პროცესის სრულ მონიტორინგს განახორციელებს. ასევე აღინიშნა, რომ სუფსელები აღნიშნულ ფაქტთან დაკავშირებით არ აპირებენ სასამართლოს მიმართონ, რადგან მათი თქმით, საამისოდ გარკვეული ობიექტური მიზეზები გააჩნიათ და პერმანენტული აქციების მოწყობას გეგმავენ.
"ეს არ არის მხოლოდ სუფსის თემის პრობლემა, ეს მთლიანად მუნიციპალიტეტის გასაჭირია. ამიტომაც ვაპირებთ, შევისწავლოთ როგორია სხვადასხვა სოფლებში მოსახლეობის განწყობა, რისთვისაც შეხვედრებს გავმართავთ სხვადასხვა თემში. საამისოდ გრაფიკიც გვაქვს შედგენილი. ეს იქნება საინფორმაციო სახის შეხვედრები მოსახლეობასთან. რვა სექტემბრიდან კი იქ, სადაც ჩინური კომპანიას ბაზა აქვს, ვიწყებთ ყოველდღიურ აქციას. გადავკეტავთ კომპანიასთან მისასვლელ გზას და არ მივცემთ სამუშაო საათებში ტექნიკას გადაადგილების საშუალებას", _ დასძინა ალეკო ევგენიძემ.
