პედაგოგ ლადო აფხაზავას აქტივობითა და ფრაქცია "ლანჩხუთი ევროატლანტიკური მომავლისთვის" ინიციატივით ლანჩხუთის საკრებულოს სხდომათა დარბაზში ახალგაზრდებთან შეხვედრა მოეწყო.
სხდომაზე სტუმრის სტატუსით იმყოფებოდა საქართველოს სასოფლო დარბაზის აღმასრულებელი დირექტორი ამირან გიგინეიშვილი, რომელმაც დამსწრეებს ლექცია წაუკითხა, თუ რატომ არის ჩვენი ქვეყნისთვის უმჯობესი ევროკავშირსა და ნატოში ინტეგრაცია და დამატებით რა სარგებლის მიღება შეგვიძლია მათგან.
"თანამედროვე ეტაპზე საქართველოს უმთავრეს პოლიტიკურ ამოცანას წარმოადგენს ნატოში ინტეგრაცია, რაც საიმედოდ უზრუნველყოფს ქვეყნის უსაფრთხოებასა და დემოკრატიულ განვითარებას. ნატო არა მხოლოდ კოლექტიური თავდაცვისთვის შექმნილი ალიანსია, არამედ მის წევრებს აერთიანებთ საერთო ფასეულობები – დემოკრატიის, ადამიანის უფლებათა პატივისცემისა და კანონის უზენაესობის", – აღნიშნა ფრაქცია "ლანჩხუთი ევროატლანტიკური მომავლისთვის" თავმჯდომარემ ელგუჯა ჩხაიძემ.
შეხვედრის დასაწყისშივე ამირანმა გიგინეიშვილმა ახალგაზრდებს კითხვით მიმართა – რა არის ევროკავშირი და აქვს თუა არა საერთო კონსტიტუცია ევროპას? დადებითი პასუხიც დარბაზიდან მალევე მიიღო, თუმცა თავის მხრივ საკითხი უფრო განავრცო: "ეს არის ევროპის ქვეყნების გაერთიანება, რომელიც შეიქმნა მაშინ, როცა მოხდა სოციალისტური სისტემის კოლაფსი. ჩვენი ქვეყნისთვის ძალიან კარგი იქნება, თუ ევროპას შევუერთდებით. ხშირად საუბრობენ, რომ ევროკავშირის წევრობა ნიშნავს ერთმანეთში ქალთა ქორწინებას, კაცთა ქორწინებას, რაც აბსოლუტურად ტყუილია. ევროკავშირში ისეთი ტრადიციული ქვეყნები არიან, რომელთათვისაც ეს კატეგორიულად მიუღებელია. აქედან გამომდინარე, არავინ არავის აძალებს, კანონში ჩაწერონ რომ ეს ნებადართულია.
ევროპა ძირითადად ქრიასტიანული ქვეყნებისგან შედგება, აქედან რამდენიმე მართლმადიდებლურია, რომელთა მრწამსი იგივეა რაც ჩვენი. ამ კავშირში მთავარი ადამიანის უფლებებია. როცა ევროკავშირი შეიქმნა, მასში აღმოსავლეთ ევროპის ქვეყნებიც გაერთიანდნენ, ისეთები, რომლებიც თავის დროზე სოციალისტურ ბანაკში იყვნენ. დღეს ევროკავშირში 850 მილიონი ადამიანი ცხოვრობს, რომელთაც აქვთ უდიდესი ფინანსური და ეკონომიკური შესაძლებლობა. როცა ყოფილი სოციალისტური ბანაკი გაწევრიანდა ევროკავშირში, მათ გრანტებით მოახერხეს წინსვლა. შეიმუშავეს 10 წლიანი განვითარების გეგმა და იმის მიხედვით იმოქმედეს. ასე მოხდა ბულგარეთის მაგალითზე, ასე განვითარდა ქალაქები კრაკოვი და ლობჟანა.
ჩვენთვის ევროკავშირში გაერთიანებას მოაქვს უდიდესი ბაზარი, თუმცა უნდა ითქვას ისიც, რომ ჩვენი პროდუქტის დამკვიდრება ძნელი იქნება, მაგრამ პერსპექტივაში ამას ძალიან დიდი მოგების მოტანა შეუძლია და ვიყოთ ისეთი წარმატებულები, როგორიც აღმოსავლეთ ევროპის ქვეყნებია".
ამირან გიგინეიშვილი ახალგაზრდებს ნატოს შესახებაც ესაუბრა. განუმარტა, თუ რატომ შეიქმნა თავის დროზე ეს ალიანსი და რა სარგებლობის მომცემია ის ჩვენთვის.
"ნატოს წესდების პირველ მუხლში ნათქვამია, რომ მის ერთ წევრზე თავდასხმა ნიშნავს ყველაზე თავდასხმას. ბუნებრივია, ეს ძალიან სერიოზული რამაა, ამიტომაც ცდილობს რუსეთი, რომ საქართველო ნატოში არ გაწევრიანდეს. ბოლო დღეების მაგალითზე შემიძლია გითხრათ, რუსეთმა კასპიის ზღვიდან დაიწყო სირიის ტერიტორიის დაბომბვა. გავრცელებული ინფორმაციით, რამდენიმე ჭურვი ირანის ტერიტორიაზეც ჩავარდა. ასევე მოხდა თურქეთის საჰაერო სივრცის დარღვევა. ეს უკანასკნელი ნატოს წევრი ქვეყანაა და მათი რეაქციაც იყო ბუნებრივი. რუსებმა ბოდიში მოიხადეს და აღიარეს, რომ შემდგომში ასეთ ფაქტს ადგილი აღარ ექნებოდა. ასე რომ, საქართველოს ნატოში გაწევრიანება ნიშნავს იმას, რომ ვერავინ ვერ აღმართავს ხელს ჩვენი ტერიტორიის წინააღმდეგ", – განუმარტა ახალგაზრდებს გიგინეიშვილმა და აქვე დასძინა, რომ ნატოში შესვლისთვის გარკვეული მოთხოვნების დაკმაყოფილება მოგვიწევს, ეს იქნება დემოკრატიის სტატუსის ამაღლება თუ სხვა.
მოწვეულმა სტუმარმა და ლანჩხუთელმა ახალგაზრდება გვერდი არც ადგილობრივ თვითმმართველობას აუარეს და შედარება გააკეთეს ამ მხრივ ევროპასა და საქართველოს შორის.
"თვითმმართველობა- თავად სიტყვა გვკარნახობს თუ რასთან გვაქვს საქმე. ევროპაში სხვა დონეა ამ კუთხით. როცა ბიუჯეტის პროექტი შემოდის განსახილველად, იქ მოსახლეობის ჩართულობა ძალიან დიდია. თქვენ, ახალგაზრდებმა იცით კი რა არის გათვალისწინებული ბიუჯეტში თქვენი კუთხით?! ან მოსახლეობამ იცის რამე საკრებულოს წევრის ფუნქციებისა და უფლება-მოვალეობების შესახებ?!
ლანჩხუთის საკრებულო 31 წევრისგან შედგება, აქედან საკრებულოს თავმჯდომარე და მისი მოადგილე, კომისიებისა და ფრაქციების თავმჯდომარეები ქმნიან ცალკე ბიუროს. ბიუროს წევრს სხვაგან მუშაობა ეკრძალება თუ ის პედაგოგი ან მეცნიერი არ არის.
რაც შეეხება ბიუჯეტს, როცა შემოდის ის უნდა იყოს პროგრამული და შედეგზე ორიენტირებული. მაგალითისთვის, ავიღოთ რაგბის გუნდი. ის ითხოვს 10 ათას ლარს და აცხადებს, რომ დაიკავებს მესამე ადგილს. პირობას ასრულებს და მომდევნო წელსაც იგივე მოთხოვნას აყენებს იგივე პირობით. ამ შემთხვევაში ეს არ იქნება შედეგზე ორიენტირებული, რადგან არ იზრდება და იძლევა უკეთეს შედეგს,გამოდის, ხარჯვაზეა ორიენტირებული. ასეთი ბიუჯეტი კი ბუნებრივია არადამაკმაყოფილებელია. სწორი დაგეგმარება და ხარჯვა შემდეგი წარმატების მომტანი უნდა იყოს"– განაცხადა ამირან გიგინეიშვილმა და იქვე ახალგაზრდებს შესთავაზა, რომ დასხდნენ, ჩამოწერონ საკუთარი იდეები, რამდენიმე საუკეთესო შეარჩიონ და ადვილი შესაძლებელია დაფინანსებაც მიიღოთო.
სხდომა ძირითადად კითხვა-პასუხის რეჟიმში მიმდინარეობდა და იმედი გამოითქვა, რომ მსგავსი შეხვედრები ახალგაზრდებთან კვლავაც მოეწყობა. აქვე დეპუტატებმა პირობა მისცეს ახალგაზრდებს, რომ როცა 2016 წლის ბიუჯეტის პროექტი შემოვა და შესაბამისი კომისიების სხდომები გაიმართება, ერთად განიხილავენ იმ მუხლებს, სადაც ახალგაზრდულ პროექტებსა და მათ დაფინანსებაზე იქნება საუბარი.
