გიორგი მარგველაშვილი არის დღევანდელ ხელისუფლებაში ერთ-ერთი, თუ ერადერთი ადამიანი არა, რომელიც დემოკრატიული ინსტიტუტების ჩამოყალიბების კუთხით დგამს გამიზნულ და შთამბეჭდავ ნაბიჯებს, – ეს განცხადება საქარტველოს პრეზიდენტის ახალმა მრჩეველმა ფიქრია ჩიხრაძემ წარდგენისას გააკეთა.
როგორც ჩიხრაძემ აღნიშნა, ის პრეზიდენტის ადმინისტრაციის მიერ აღებულ კურსს გააგრძელებს.
"მადლობა მინდა გადავუხადო საქართველოს პრეზიდენტს იმ შეთავაზებისთვის, რომელიც არის მართლა ძალიან მნიშვნელოვანი ჩემთვის. ცხადია, ძალიან მნიშვნელოვანია ის ყველაფერი, რისთვისაც ჩვენ 30 წლის წინ მოვედით პოლიტიკურ ასპარეზზე, მაშინ ძალიან ახალგაზრდები, სავსე ვიყავით იდეალებით, ეს იდეალები უკავშირდებოდა, რა თქმა უნდა, საქართველოს თავისუფლებას. გავიდა 30 წელი, ჩვენ ვართ თავისუფალი საქართველოს შვილები, მაგრამ, სამწუხაროდ, სახელმწიფოს ჩამოყალიბებამდე ჯერ კიდევ ბევრი გზა გვაქვს გასავლელი, ჩვენ ძალიან ბევრი დრო დავკარგეთ ამ გზაზე. ჩემი ეს გადაწყვეტილება, მიმეღო გიორგი მარგველაშვილის შემოთავაზება და გავმხდარიყავი პოლიტიკური მრჩეველი პრეზიდენტის ინსტიტუტში, განაპირობა სწორედ იმანაც, რომ მე ვფიქრობ, გიორგი მარგველაშვილი არის ხელისუფლებაში, არა მარტო დღევანდელ ხელისუფლებაში, ერთ-ერთი, თუ ერადერთი არა, ადამიანი, რომელიც სწორედ ამ მიმართულებით დემოკრატიული ინსტიტუტების ჩამოყალიბების კუთხით დგამს გამიზნულ და შთამბეჭდავ ნაბიჯებს. ვფიქრობ, ეს ნაბიჯები არის წარმატებული და იმედი მაქვს იქნება უფრო წარმატებული, იმისათვის, რომ ჩვენ შევქმნათ მართლაც დემოკრატიულ ღირებულებებზე დაფუძნებული სახელმწიფო, სადაც სახელისუფლო შტოები იქნება მართლაც სერიოზულად ურთიერთდაბალანსებული, შეიქმნება გარემო, რათა არსებობდეს თავისუფალი სასამართლო, არსებობდეს თავისუფალი მედია და არავითარი საფრთხე არ ემუქრებოდეს მას ამ კუთხით, არსებობდნენ ძლიერი პოლიტიკური ძალები, რომლებიც დამყარებული იქნებიან მსოფლმხედველობაზე, ახალ იდეებზე, ახალ პოლიტიკურ ხედვებზე და არა იმაზე, რაზედაც მთელი ამ ხნის განმავლობაში, როგორც მოჯადოებულ წრეზე ტრიალებს, როგორც პოლიტიკური სპექტრი, ისე მთელი საზოგადოება. ბუნებრივია, ძალიან დიდ პასუხისმგებლობად და პატივად მიმაჩნია ეს შემოთავაზება და ამ გუნდთან ერთად მუშაობა. ძალ-ღონეს არ დავიშურებ, რომ ეს ყველაფერი აღმოჩნდეს წარმატებული და დარწმუნებული ვარ, რომ ეს წარმატება იქნება მთელი საქართველოს წარმატება", _ განაცხადა ჩიხრაძემ წარდგენისას.
მისივე განმარტებით, ის დღეიდან ტოვებს ყველა პოლიტიკურ თანამდებობას, რომელიც პრეზიდენტის მრჩევლის საქმიანობასთან შეუთავსებელია.
"მოქმედი პოლიტიკოსი გახლავართ და ალბათ, გაინტერესებთ, ჩემი მიმართება "ახალ მემარჯვენეებთან", ჩემს პოლიტიკურ ძალასთან, რომელთან ერთადაც მე ძალიან მნიშვნელოვანი წლები გამოვიარე ბრძოლის, გამარჯვების, ხანდახან შეიძლება მარცხისაც, მაგრამ, ბუნებრივია, ძალიან მნიშვნელოვანი წლები. ცხადია, როდესაც ეს შემოთავაზება მივიღე, პირველი კონსულტაციები გავიარე ჩემს თანაგუნდელებთან, შაბათს მე მქონდა გაფართოებული შეხვედრა "ახალი მემარჯვენეების" მთავარ საბჭოსთან და მინდა გითხრათ, რომ ისინი არა მარტო გაგებით შეხვდნენ ამ ამბავს, არამედ სერიოზული თანადგომით. ბუნებრივია, მე მათ წინაშე მოვიხსენი პოლიტიკური თავმჯდომარის მოვალეობა და პასუხისმგებლობა. ამ პოზიციის გამო, ბუნებრივია, ვაჩერებ ყველანაირ პარტიულ მოღვაწეობას და პარტიული წესრიგით მე აღარ ვიმუშავებ, მაგრამ მექნება ძალიან მჭიდრო ურთიერთობა "მემარჯვენეებთან". ვითანამშრომლებთ პარტიებთან, ქართულ საზოგადოებასთან, მედიასთან, საერთაშორისო პარტნიორებთან, იმისთვის, რომ ჩვენ განვახორციელოთ ის იდეები, ის იდეალები, რომლებზეც ჩვენ ვლაპარაკობდით და ის, რაც გულსა და გონებაში უკვე დიდი ხანია არის. იმედია, ეს რეალიზდება უახლოეს ხანში", _ განაცხადა ჩიხრაძემ.
შეგახსენებთ, რომ საქართველოს პრეზიდენტმა გიორგი მარგველაშვილმა თავისი ახალი მრჩეველი, ფიქრია ჩიხრაძე ცოტა ხნის წინ წარადგინა.
