ოზურგეთში, წმინდა გაბრიელ ეპისკოპოსის სახელობის სამრევლო სკოლაში, სკოლის პედაგოგმა, სასულიერო პირმა, მამა ვახტანგმა (თოხაძე), საკუთარი მოსწავლე თანატოლებს გააროზგვინა.
აღნიშნულს ფაქტს "გურია ნიუსთან" სკოლის მოსწავლეებიც ადასტურებენ. როგორც გვითხრეს, დასჯის აღნიშნული მეთოდის გამოყენების მიზეზი ბავშვის სკოლაში დაგვიანება გახლდათ.
სკოლის სასწავლო ნაწილი ნინო გოგეშვილი ამბობს, რომ ფაქტი "ცოტა გამუქებულია":
_ სულ ეგრე არ ყოფილა. ბავშვი შევიდა გაკვეთილზე დაგვიანებით, რომელსაც წკეპლა ეჭირა ხელში. მამაოს უკითხავს თუ რატომ დააგვიანა და ხუმრობით უთქვამს ბავშვებისთვის _ მოდით, აბა გაროზგეთო. რამდენიმე ბავშვმა გაროზგა. მამაოს ნამდვილად არ გაუროზგავს.
_ ქალბატონო ნინო, გვიდასტურებთ, რომ თანატოლებმა თანატოლი მოძღვრის მოწოდების შემდეგ გაროზგეს?
_ არ გინდათ ასე ხმამაღალი განცხადება, _ გვითხრა გოგაშვილმა, რომლის თქმით, აღნიშნული შემთხვევის შესახებ დაგვიანებით გაიგო.
სკოლის სასწავლო ნაწილი ვარაუდობს, რომ ეს შემთხვევა მხოლოდ იმ მიზეზით გახმაურდა, რომ "დასჯილ ბავშვს სკოლიდან გადასვლა უნდოდა".
_ მას სკოლიდან გადასვლა სურდა და როგორც ჩანს, ბავშვმა ეს მიზეზი მოიყვანა მშობელთან. როცა ჩვენ გვქონდა ბავშვთან შეხვედრა, რომელსაც მისი მშობელი და მამა ვახტანგიც ესწრებოდა, ბავშვმა ყველაფერი უარყო და თქვა, რომ ეს გასულ სასწავლო წელს მოხდა და მხოლოდ ხუმრობა იყო, _ განმარტა გოგაშვილმა.
სამრევლო სკოლის სასწავლო ნაწილის გამგე ამბობს, რომ მისი მხრიდან კონკრეტული რეაგირება ის იყო, რომ ეს საკითხი სკოლაში გაირკვა:
_ რაც შესაძლებელი იყო გავარკვიე და რა უნდა მექნა სხვა, მამაო უნდა დამესაჯა?!
_ ქალბატონო ნინო, ჩვენ ვსაუბრობთ ადამიანზე, რომელიც სკოლის პედაგოგია. როცა მსგავს შემთხვევასთან გავქვს საქმე, იმის გამო, რომ იგი სასულიერო პირია, პასუხი არ უნდა მოვთხოვოთ?
_ თქვენ როგორ გგონიათ, მე საერო ადამიანს, სასულიერო სკოლაში მამაოს დასჯის უფლება მაქვს?! _ აღნიშნა გოგაშვილმა და დასძინა, რომ ამ შემთხვევის შესახებ საქმის კურსში არც ეპარქიის ხელმძღვანელი მეუფე იოსები ჩაუყენებია, რადგან ეს მას არ ეხებოდა.
გოგაშვილის თქმით, სკოლის რექტორი მამა მათეა (გორდელაძე) და ეს მისი პრეროგატივაა.
მამა მათე (გორდელაძე) "გურია ნიუსთან" საუბრისას ფაქტს არ უარყოფს და ამბობს, რომ მომხდარის შესახებ მეუფეს ცოტა ხნის წინ აცნობა:
_ბავშვისგან ვიცი, რომ ამას ჰქონდა ხუმრობის ტონი და ერთმა დაარტყა წკეპლა. მამაომ უთხრა, რომ ნუ წახვალ ფეხბურთზე, ნუ გააცდენ გაკვეთილს, თორემ ისევ შემოგარტყამ წკეპლასო. სიცილ-თამაშში მოხდა ეს ყველაფერი, მაგრამ მერე გარეთ გამოჟონა და გადაიზარდა დიდი ამბავში.
_ მსგავსი მოწოდება სასულიერო პირისგან, რომელიც ამავე დროს პედაგოგია, მინიმუმ უხერხული არ არის?
_ ვიცი, ყველაფერი ვიცი, მაგრამ მერე გავაფრთხილეთ მამაო, რომელმაც ბავშვიც ნახა და მშობელიც, თუმცა, მოგვიანებით გაიშალა ეს თემა, _ გვითხრა მამა მათემ.
მისივე ინფორმაციით საქმის კურსში მეუფეც ჩააყენა:
_ ვესაუბრე მეუფეს და მას სურს, რომ მშობელს შეხვდეს. ახლა ის ქალბატონი არ იმყოფება გურიაში და როგორც კი ჩამოვა შევახვედრებ, _ დასძინა ჩვენთან საუბრისას სკოლის რექტორმა.
აღნიშნულ ფაქტთან დაკავშირებით მეუფე იოსები (კიკვაძე) კომენტარს არ აკეთებს. გურიის ეპარქიის ხელმძღვანელის თქმით, რეაგირებას მაშინ მოახდენს, როცა მშობელს შეხვდება და დეტალებს დააზუსტებს.
რაც შეეხება მამა ვახტანგს, "გურია ნიუსთან" საუბრისას ამბობს, რომ კომენტარის გაკეთების უფლება მეუფის ბრძანების გარშე არა აქვს და მომხდარზე მას შემდეგ ისაუბრებს, რაც მეუფეს შეხვდება.
როგორც "გურია ნიუსს" სამრევლო სკოლაში უთხრეს, ბავშვი, მშობელმა, რომელთან დაკავშირებაც ამ დროისთვის ვერ ხერხდება უკვე გადაიყვანა სხვა სკოლაში.
