ჰააგის სისხლის სამართლის საერთაშორისო სასამართლო ქართულ და რუსულ სამხედრო ძალებს შორის 2008 წელს მომხდარ შესაძლო საომარ დანაშაულს იძიებს, კერძოდ, გამოძიება 2008 წლის 1-ელი ივლისიდან ამავე წლის 10 ოქტომბრამდე ქვეყანაში შექმნილ ვითარებას ეხება. აღნიშნულ ინფორმაციას BBC ავრცელებს.
ფატოუ ბენსოუდას თქმით, არსებობს მტკიცებულება, რომლის მიხედვითაც სამხრეთ ოსეთის შეიარაღებულმა ძალებმა 113-მდე ეთნიკური ქართველი მოკლეს, ხოლო სამშვიდობო ძალები ორივე მხარეს დაიღუპა.
მისივე თქმით, რუსი სამხედროები, შესაძლოა, მოქალაქეების მკვლელობაში მონაწილეობდნენ.
გავრცელებული ინფორმაციით, საომარი ოპერაციები საქართველომ დაიწყო, რომელიც სამხრეთ ოსეთის უკან დაბრუნებას იმედოვნებდა, მაგრამ რუსულმა არმიამ ტერიტორია სწრაფად დაიკავა და საქართველოში ღრმად შემოიჭრა. ისინი მხოლოდ საქართველოს დედაქალაქ თბილისთან ახლოს შეჩერდნენ.
როგორც ცნობილია, დაახლოებით 1000 ადამიანი დაიღუპა ომის დროს, ხოლო ათასობით ქართველი სადაო ტერიტორიიდან, საკუთარი სახლებიდან გამოაძევეს.
ჰააგის სისხლის სამართლის საერთაშორისო სასამართლოს პროკურორს ომის დროს ჩადენილ ერთ-ერთ დანაშაულად სწორედ ეთნიკური ქართველების განდევნა მიაჩნია.
როგორც ცნობილია, მოსამართლეებმა უნდა გადაწყვიტონ, სრულად გამოიძიებენ თუ არა რუსეთსა და დასავლეთს შორის, განსაკუთრებით სირიის კრიზისის გამო, დაძაბული ურთიერთობის გამომწვევ რისკებს.
როგორც ცნობილია, ჰააგის სისხლის სამართლის საერთაშორისო სასამართლო აღმოსავლეთ უკრაინაში უკრაინის შეიარაღებულ ძალებსა და მოსკოვის მიერ მხარდაჭერილ სეპარატისტებს შორის შეტაკებების დროს მომხდარ დანაშაულსაც იძიებს.
