“გზა არ არის _ პურის საყიდლად ვერ გამოდის ხალხი”

ჩოხატაურის მუნიციპალიტეტის სოფელ ვან-ზომლეთსა და სამებაში ამ დროისთვის მოძრაობა შეჩერებულია. როგორც ადგილობრივი მოსახლეობა ამბობს,  გზა სრულიად გაუწმენდავია:

_ აღარ ვიცით, ვის მივმართოთ. 1 მეტრზე მეტი თოვლია, გზა არ არის _ პურის საყიდლად ვერ გამოდის ხალხი. იქნებ, დაგვეხმაროთ და ხელისუფლებას მიაწვდინოთ ხმა, _ ასეთი თხოვნით ვან-ზომლეთში და სამებაში მცხოვრები არაერთი ადამიანი დაუკავშირდა "გურია ნიუსს".

აღნიშნული გზა ცენტრალური მაგისტრალია და მისი გაწმენდა, საავტომობილო გზების დეპარტამენტის მიერ გამოცხადებულ ტენდერში გამარჯვებულ კომპანიის შპს "გზამშენი 18"-ის ვალდებულებაა.

კომპანიის ხელმძღვანელის თემურ ჯახვას თქმით, გზის ნახევარი უკვე გაწმენდილია:

_ უნდა გაიგოთ, რომ სტიქიაა. ტექნიკა ყველა მიმართულებით მუშაობს. მესმის, რომ რთულია, მაგრამ  მოითმინონ და დღის ბოლომდე გზა სრულად გაიწმინდება, _ აღნიშნა ჩვენთან საუბრისას ჯახვამ.

ასეთ დროს რომ მოთმენა შეუძლებელია, კარგად იცის ადგილობრივმა ხელისუფლებამ, რომელიც აღნიშნულ ინფორმაციას კარგად ფლობს.

ჩოხატაურის მუნიციპალიტეტის საკრებულოს თავმჯდომარის ზაალ მამალაძის თქმით, სამებასა და ვან-ზომლეთში ამ წუთებში მუნიციპალიტეტის ტექნიკა მუშაობს:

_ ახლა არ არის იმის გარკვევის დრო, ვის ეკუთვნის გზის გაწმენდა. ამაზე მას შემდეგ ვისმჯელებთ, რაც პრობლემა მოგვარდება. ამისთვის კი ყველაფერს ვაკეთებთ. მუნიციპალიტეტის ტექნიკა უკვე წმენდს სამებისა და ვან-ზომლეთის გზას, _ გვითხრა მამალაძემ.