წითელ ჯიშად წოდებულ კომბოსტოს იისფერი და ლურჯი შეფერილობა აქვს და მას ხშირად ლურჯსაც უწოდებენ. წითელ კომბოსტოში დიდი რაოდენობითაა კალიუმი, ფოსფორი, რკინა, თუთია… სავსეა ვიტამინებით.
ხალხურ მედიცინაში ოდითგან მიღებული იყო მისი გამოყენება ტუბერკულოზის, გულსისხლძარღვთა და ლეიკემიის დაავადების საწინააღმდეგოდ. იგი, ასევე, აახალგაზრდავებს კანის ქსოვილებს. ხველებისა და გრიპის სხვა გამოვლინებისას, საუკეთესოა თაფლისა და კომბოსტოს წვენის ნაზავი, რომელიც ასევე ძალიან კარგი საშუალებაა დასუსტებული კაპილარების გასაძლიერებლად.
აგრონომი აკაკი ღლონტი ამბობს, რომ მან საკუთარ საკარმიდამო ნაკვეთში გამოიყვანა წითელი კომბოსტოს ჩითილი და ეს დიდ სიძნელეს არ წარმოადგენს:
_ ყველა ბოსტნეული საუკეთესოა. მე რომ მკითხოთ, წითელ კომბოსტოს ყვავილოვანს და ბროკოლს ვამჯობინებდი. თუმცა, ვისაც სურვილი აქვს და სხვა ჯიშები მოჰყავს, რატომ არ უნდა დავთესოთ და დავრგოთ ჩვენს ბოსტნებში წითელი კომბოსტო? ადამიანმა, რაც შეიძლება, მეტი ბოსტნეული და ხილი უნდა მიირთვას და ნაკლებად მიეტანოს ხორცეულს, _ ამბობს აკაკი ღლონტი.
