არის თუ არა საზოგადოება უფლებამოსილი, ჰქონდეს ინფორმაცია მუნიციპალიტეტის დაქვემდებარებაში მყოფი ორგანიზაციების პრიორიტეტების შესახებ ან რამდენად მნიშვნელოვანია მუნიციპალიტეტის ხელმძღვანელობისთვის, იცოდეს მის დაქვემდებარებაში მყოფი ორგანიზაციების პრიორიტეტები?
როგორც “საქართველოს დემოკრატიული განვითარების კავშირის” ეკონომისტი ლევან ჩხაიძე ამბობს, მუნიციპალიტეტის ბიუჯეტი მოსახლეობის მიერ გადახდილი თანხებით ივსება. შესაბამისად, მოსახლეობას უფლება აქვს, მიიღოს დეტალური ინფორმაცია იმის შესახებ, თუ რაში იხარჯება მათ მიერ გადახდილი თანხები. მსგავსი ინფორმაციის მიღების საუკეთესო საშუალებაა, დაინტერესებულმა პირმა გადახედოს მხარჯავი სუბიექტების საბიუჯეტო განაცხადებს და გაიგოს, კონკრეტულად რას უნდა მოხმარდეს ბიუჯეტით გამოყოფილი თანხები.
ჩხაიძის თქმით, საქართველოს საბიუჯეტო კოდექსის თანახმად, ბიუჯეტის მომზადების მიზნით, საფინანსო ორგანო მხარჯავ დაწესებულებებს (ანუ იმ სამსახურებს და მუნიციპალიტეტის მიერ შექმნილ არასამეწარმეო იურიდიულ პირებს) უგზავნის საბიუჯეტო განაცხადის ფორმებს. აღნიშნული ფორმა მოიცავს არანაკლებ შემდეგ ინფორმაციას: დასაგეგმი საბიუჯეტო წლისთვის და შემდგომი სამი საბიუჯეტო წლისთვის მხარჯავი დაწესებულებისთვის გათვალისწინებული ასიგნებებიდან, გასახორციელებელ პრიორიტეტებს და მათ მისაღწევად საჭირო იმ პროგრამებისა და ღონისძიებების დაფინანსებას, მიზნებსა და მოსალოდნელ შედეგებს:
“ოზურგეთის მუნიციპალიტეტის საკრებულომ 2008 წლის 22 დეკემბრის #59 დადგენილება მიიღო “მხარჯავი სუბიექტებისთვის საბიუჯეტო განაცხადის ფორმის დამტკიცების შესახებ”. აღნიშნული დადგენილება, დანართის სახით, მოიცავს საბიუჯეტო განაცხადის ფორმას, რომლის შევსებაც სავალდებულოა ყველა მხარჯავი სუბიექტისთვის. დადგენილების თანახმად, შევსებული დოკუმენტი წარდგენილი უნდა იქნას, როგორც გამგეობაში, ასევე საკრებულოში. აღნიშნული დადგენილება მოიცავს ყველა იმ კითხვებზე პასუხს, რომლებიც, კანონმდებლობით, მხარჯავმა დაწესებულებებმა უნდა წარადგინონ მუნიციპალიტეტში. მიუხედავად ამისა, აღნიშნული დადგენილება არ მუშაობს. საბოლოოდ, შეიძლება აღვნიშნოთ, რომ მუნიციპალიტეტის აღმასრულებელი ხელისუფლების მიერ წარმოდგენილი საბიუჯეტო განაცხადები არ შეიცავს საქართველოს კანონმდებლობით დადგენილ ინფორმაციას და მონაცემებს. კერძოდ – ინფორმაციას მხარჯავი დაწესებულებების მიერ, დასახული პრიორიტეტებისა და ამ პრიორიტეტების ფარგლებში, გასახორციელებელი პროგრამებისა და ღონისძიებების შესახებ. ასევე ამ პრიორიტეტების მიზნებსა და მოსალოდნელ შედეგებს. მუნიციპალიტეტის აღმასრულებელი ხელისუფლების მსგავსი მიდგომა, საბოლოო ჯამში, აფერხებს შეფასებას იმის თაობაზე, თუ რამდენად ეფექტურად განახორციელა ადმინისტრირება მხარჯავი სუბიექტების ხელმძღვანელობამ”, _ ამბობს ლევან ჩხაიძე.
ოზურგეთის მუნიციპალიტეტის გამგებლის გიორგი ტაკიძის თქმით კი, აბსოლუტურად ყველა მხარჯავ სუბიექტს, რომელიც ადგილობრივი ბიუჯეტიდან ფინანსდება, გამგეობაში საბიუჯეტო განაცხადი წარდგენილი აქვს: “საბიუჯეტო განაცხადის ფორმა, რომელიც წინა მოწვევის საკრებულოს მიერ იყო დამტკიცებული, კანონში შესული ცვლილებების გამო, გაუქმდა საკრებულოს მიერ. ახალი განაცხადის ფორმა, ჯერჯერობით, დამტკიცებული არ არის. ამდენად, თითოეულმა მხარჯავმა ორგანიზაციამ საბიუჯეტო განაცხადი თავისი შეხედულებისამებრ განსაზღვრული ფორმით წარმოადგინა ჩვენთან და ყველას აქვს მისი გაცნობის საშუალება. აქედან გამომდინარე, ყველა განაცხადი განსხვავებულია. რა თქმა უნდა, თითოეული მათგანის მოთხოვნა ვერ იქნა გათვალისწინებული. ბიუჯეტის თანახმად, გამოინახა, თუ შეიძლება ასე ვთქვათ, ოპტიმალური ვარიანტი, რის საშუალებასაც გვაძლევდა ბიუჯეტი”, _ გვითხრა ტაკიძემ.
სტატია მომზადებულია ევრაზიის თანამშრომლობის ფონდის მიერ დაფინანსებული პროექტის “სახალხო ინიციატივები დემოკრატიისთვის” ფარგლებში.
