ოზურგეთის მუნიციპალიტეტის სოფელ ბახვში მცხოვრებ მაიზერ ლიპარტელიანს საკარმიდამო ნაკვეთში 200 ძირი პავლონია აქვს გაშენებული.
_ ეს არის ჩემი მეგობრის. მე და ჩემს ძმას კიდევ 650 ძირი გვაქვს. პავლონიები, ძირითადად, გაშენებული გვაქვს ქვედა ბახვში და ძიმითშიც, _ გვითხრა მაიზერ ლიპარტელიანმა.
პავლონიის შესახებ მან საბერძნეთში გაიგო: _ სიმართლე გითხრათ, არც მე არ ვიცნობდი ამ მცენარეს. საბერძნეთში გავეცანი პავლონიის ისტორიას _ მას ჰქვია “პავლონია ტორონტოზა”. როგორც ვიცი, არის ძვირადღირებული. როცა ჩამოვედი უცხოეთიდან, ვეძებდი ამ ჯიშს. იგი იაპონიიდან არის შემოტანილი _ იქ გამოყვანილი კულტურაა. იქაური წესით, როცა ქალიშვილი იბადება, მაშინ რგავენ, როცა თხოვდება, ამ კულტურით აკვანს უმზადებენ.
საქართველოში 5 წელზე მეტი არ იქნება, რაც გაშენებული აქვთ პავლონია. ისე, ძალიან სწრაფად იზრდება _ ერთწლიანი ნერგი, დაახლოებით, 5-6 მეტრი სიმაღლისაა.
პავლონიას მოვლის თავისი წესები აქვს. როგორც გვასწავლეს, ისე ვუვლით და ველით, რომ შედეგი კარგი იქნება. ძალიან შრომატევადი საქმეა.
_ რამდენი წელი სჭირდება ამ კულტურას, რომ მისი რეალიზაცია მოახდინოთ?
_ ერთი ხიდან ნახევარი კუბური მეტრი მასალა უნდა მივიღოთ, რასა, მინიმუმ, 8 წელი სჭირდება.
_ რა ფასად შეიძლება გაიყიდოს?
_ 800-900 დოლარად.
ჩვენი მეორე რესპონდენტი საკმაოდ ფიცხი აღმოჩნდა და თავიდან ინტერვიუზე არ გვთანხმდებოდა:
_ ვერ მოგცემთ ინტერვიუს. ვიცი, რაც ხდება დღეს. რომ დაგვჭირდეს პავლონიის თურქეთში გადატანა, არ გადაგვატანინებენ. დარწმუნებული ვარ, პრობლემები შეგვექმნება _ კონტრაბანდააო, გვეტყვიან. რატომ უნდა იყოს კონტრაბანდა საკუთარი ნაშრომი? ჩემი მოწეული თხილი გადამქონდა და ის არ გადამატანინეს ერთხელ.
_ და ამას ვის აბრალებთ, ჟურნალისტებს?
_ ჟურნალისტები რა შუაშია? მთავრობას. თქვენ რომ დაწერთ და ყველა გაიგებს ჩემი საქმიანობის შესახებ, იქნებით პასუხისმგებელი, რომ არ შეგვაწუხებენ?
ამის შემდეგ, ჩვენმა რესპონდენტმა, იმ პირობით, რომ მის ვინაობას არ გავამხელდით, პავლონიის შესახებ რამდენიმე სიტყვა მაინც გვითხრა: _ პავლონია სწრაფად მზარდი ხეა, 7-8 წელიწადში უკვე მოსაჭრელია. ერთი ძირი ხე იძლევა ნახევარ კუბურ მეტრ მასალას. სამასალედ ძალიან კარგია, არ ვარგა მხოლოდ იატაკისთვის, გამოდგება ავეჯის დასამზადებლად. ულამაზესი ხეა. სხვა მცენარეებს ხელს არ უშლის, პირიქით, აუმჯობესებს მათ მოსავალს.
