ლანჩხუთის მუნიციპალიტეტის გამგებელმა და ამავდროულად საფეხბურთო კლუბ ლანჩხუთის "გურიას" პრეზიდენტმა ზაზა ურუშაძემ საკრებულოს დღევანდელ რიგგარეშე სხდომაზე ადგილობრივ ბიუჯეტში განსახორციელებელ ცვლილებებთან დაკავშირებით განმარტებები გააკეთა. მისი თქმით, თანხა, რომელიც ადგილობრივი ბიუჯეტიდან გამოეყო "გურიას", ახლა ქართული ფეხბურთის განვითარების ფონდში, რომელიც გასული წლის 30 დეკემბერს მთავრობის განკარგულებით დარეგისტრირდა არასამეწარმეო (არაკომერციულ) იურიდიულ პირად, გადამისამართდება და სწორედ ამ ფონდის მეშვეობით მოხდება "გურიას" დაფინანსება. ქართული ფეხბურთის განვითარების ფონდში "გურიას"წილი ბიუჯეტიდან ასათვისებელი 735 113 ლარიდან 585 113 ლარი იქნება, დარჩენილი 150 ათასი კი იქიდან გამომდინარე, რომ ზემოთნახსენები ფონდი არ განახორციელებს კლუბის ინფრასტრუქტურის მოვლა-პატრონობის დაფინანსებას, საფეხბურთო ბაზისა და სტადიონის მოვლისთვის საჭირო ხარჯებით უზრუნველყოფას მოხმარდება.
"ერთი რამ გადაჭრით შემიძლია გითხრათ, რომ ამ ფონდის შექმნით ქართული ფეხბურთი მოიგებს. ამ ეტაპზე, ლანჩხუთი წაგებულ მდგომარეობაში კი დარჩა, მაგრამ საბოლოოდ მოგებულები დავრჩებით, რადგან პროგრამა გარკვეულ ბონუსებსაც გულისხმობს. ფონდის ხელმძღვანელობასთან მქონდა საუბარი, რომლებიც თავად ამბობენ, რომ გარკვეული რაღაცეები დასახვეწია. მუშა პროცესში გვექნება მათთან საუბარი და არსებულ პრობლემებს დავაყენებთ მათ წინაშე,"-აღნიშნა ურუშაძემ, რომელიც ბოლომდე კმაყოფილი არც თავად ჩანდა ბიუჯეტში განსახორციელებელი ამ ცვლილებით.
გამგებელ-პრეზიდენტმა ისიც განმარტა, რომ იმ ერთი მილიონ 250 ათასი ლარიდან, რომელიც კლუბს 2016 წლისთვის გამოეყო ადგილობრივი ბიუჯეტიდან, უკვე ათვისებულია 514 887 ლარი, გუნდს დღეის მდგომარეობით, გასტუმრებული აქვს 500 ათას ლარამდე დავალიანება, დაახლოებით გადასახდელია 300 ათასი ლარი.
ბიუჯეტში განსახორციელებელი ამ ცვლილებით იმედგაცრუებული ჩანდნენ ოპოზიციის წარმომადგენლები საკრებულოში, რადგან აღმოჩნდა რომ მიმდინარე წელს იმ 800 ათასი ლარიდან, რომელიც სახელმწიფო პროგრამიდან კლუბებს საბაზისოდ ეძლევათ, "გურია"მხოლოდ 300 ათას ლარს მიიღებს. არადა, ბევრს ეიმედებოდა, რომ სახელმწიფო პროგრამიდან მიღებული დაფინანსება შეღავათს მისცემდა ადგილობრივ ბიუჯეტს.
"ქართული ფეხბურთის განვითარების ფონდიდან" სინამდვილეში ველოდებოდით რომ მიმდინარე სეზონის ბოლოს და გარდამავლ ჩემპიონტაში კლუბი მიიღებდა დამატებით 1 მილონ 400 ათას ლარს, რაც საშულებას მოგვცემდა გამოთავისუფლებული თანხები სხვა პროექტების დასაფინანსებლად მიგვემართა, მივიღეთ რა? ამ ჩვენს თანხებს და კიდევ რამდენიმე მუნიციპალიტეტისას, ფონდი გადაუნაწილებს სხვა გუნდებს, რომლებიც საკუთარი მუნიციპალიტეტების ბიუჯეტებში ან საერთოდ არ იყო გათვალისწინებული ან ძალიან მიზერული თანხით ფინანსდებოდნენ ადგილობრივი ბიუჯეტიდან"-ასეთ დასკვნას აკეთებენ "ნაციონალური მოძრაობის"წევრები საკრებულოში.
დეპუტატმა გია გოგუაძემ შესთავაზა კიდეც კოლეგებს, კენჭისყრაზე ჯერჯერობით არ დამდგარიყო "გურიას" საკითხი და საამისოდ უმრავლესობას მხარდაჭერაც სთხოვა, თუმცა უშედეგოდ. როგორც გამგებელმა თქვა, ამით არაფერი შეიცვლებოდა, პირიქით, აქით დავზარალდებოდითო.
მოკლედ, მიუხედავად პარტიული სხვადასხვაობისა, ოპოზიციამ ერთხმად არ დაუჭირა მხარი წარმოდგენილ ბიუჯეტში განსახორციელებელ ცვლილებას. სამაგიეროდ, ხმის მიცემისას ერთსულოვანი იყო მმართველი გუნდი, თუმცა პირად საუბრებში ზოგიერთი მათგანი ამბობდა, რომ ბოლომდე კარგად გარკვეული ვერ იყო რას დაუჭირა მხარი.
