მევენახეს, თუ ამინდი ამის საშუალებას იძლევა, ზამთრის განმავლობაში და განსაკუთრებით გაზაფხულზე, საკმაოდ ბევრი სამუშაო აქვს შესასრულებელი: დაზიანებული ბოძების, სარების და მავთულების გამოცვლა-აღდგენა, ნიადაგის დამუშავება, განოყიერება, სხვლა, აკვრა და სხვა. ყველა სამუშაო უნდა მოესწროს კვირტების გამოღვიძებამდე.
ამ სამუშაოთაგან ერთ-ერთი უმნიშვნელოვანესია ვაზის გასხვლის დროულად და სწორად ჩატარება, რაც პირდაპირ კავშირშია უხვი და ხარისხიანი მოსავლის მიღებასთან.
სხვლის ოპტიმალური ვადის დადგენისთვის მხედველობაში უნდა მივიღოთ მევენახეობის ზონისთვის დამახასიათებელი ეკოლოგიურ-კლიმატური, ვაზის ბიოლოგიური, აგრეთვე ჯიშობრივი თვისებები. სხვლის მომენტისთვის ვაზის ერთწლიანი ნაზარდი პლასტიკურ ნივთიერებებს მინიმალური რაოდენობით უნდა შეიცავდეს და იგი ძირითადად მის მრავალწლიან ნაწილში უნდა იყოს გადასული. ეს ზოგადად მოიცავს პერიოდს: ფოთოლცვენის დამთავრების შემდეგ 2-3 კვირის გასვლიდან წვენის მოძრაობის დაწყებამდე.
ზემოთქმულის გათვალისწინებით, გურიის რეგიონისთვის სხვლის ოპტიმალური ვადა განისაზღვრება დაახლოებით დეკემბრის მეორე ნახევრიდან მარტის შუა რიცხვებამდე.
მხედველობაშია მისაღები გაზაფხულის წაყინვის საშიშროება, რასაც ბოლო წლებში ჰქონდა ადგილი გურიაში, განსაკუთრებით ჩოხატაურის მუნიციპალიტეტის ტერიტორიაზე. მართალია, ჩვენი რეგიონისთვის ეს მაინც იშვიათი შემთხვევაა, მაგრამ კლიმატის ბოლოდროინდელი გლობალური ცვლილება საფრთხეს მაინც შეიცავს და მისი გათვალისწინება სულ უფრო და უფრო საჭირო ხდება.
დადგენილია, რომ ადრე ან გვიან ჩატარებული სხვლა გავლენას ახდენს ვაზის ვეგეტაციის დაწყებაზე _ რაც უფრო ადრე გაისხვლება ვაზი, კვირტებიც შესაბამისად ადრე გაიღვიძებს და პირიქით.
მთლიანობაში, საგაზაფხულო წაყინვებისგან თავის დასაზღვევად, ჩვენი შესაძლებლობის ფარგლებში მხოლოდ იმის გაკეთება შეგვიძლია, რომ სხვა საგაზაფხულო სამუშაოების გათვალისწინებით, სხვლა მოგვიანებით ჩავატაროთ, დაახლოებით, მარტის შუა რიცხვებში (თუმცა, ნაადრევმა ან ნაგვიანევმა გაზაფხულმა ეს ვადაც შეიძლება უკან ან წინ გადასწიოს). ამით ვაზის კვირტების გამოღვიძების პერიოდს გადავწევთ რამდენიმე დღით, რაც გარკვეულ შანსს გვიტოვებს, რომ თავიდან ავიცილოთ ეს უსიამოვნო მოვლენა.
ანდრო ვაშალომიძე, ასოციაცია "გურული ვაზის" გამგეობის თავმჯდომარე
