გასულ კვირას ცნობილი გახდა, რომ სკოლის მასწავლებელთა უმრავლესობამ, ატესტაციის დროს, მინიმალური კომპეტენციის ზღვარის გადალახვა ვერ მოახერხა.
პედაგოგთა ბოლო საგნობრივი გამოცდა მიმდინარე წლის იანვარში ჩატარდა, სადაც სულ 10 552 პრაქტიკოსი პედაგოგი დარეგისტრირდა, მათგან ტესტირება 6 477-მა გაიარა, მინიმალური კომპეტენციის ზღვარი კი, რომელიც 60%-ით განისაზღვრებოდა, მხოლოდ 1 101-მა გადალახა.
ოფიციალური მონაცემების თანახმად, ყველაზე სავალალო შედეგი დაწყებითი საფეხურის მასწავლებლებს აქვთ. კერძოდ, გამოცდაზე მისული 1 167 პედაგოგიდან კომპეტენციის დადასტურება მხოლოდ 94-მა პედაგოგმა, ანუ დაახლოებით 8.%-მა შეძლო.
381-დან მხოლოდ 26-მა, ანუ საერთო რაოდენობის თითქმის 7%-მა ჩააბარა მათემატიკის გამოცდა; რაც შეეხება ქართული ენისა და ლიტერატურის გამოცდას, 317-დან ზღვარის გადალახვა მხოლოდ 15%-მა მოახერხა.
საერთო რაოდენობის 9%-მა გადალახა ზღვარი ბუნებისმეტყველებაში, 19.%-მა ფიზიკაში და 17%-მა _ ქიმიაში.
რაც შეეხება უცხო ენის გამოცდას, ინგლისური ენის გამოცდაზე სულ 458 პედაგოგი გავიდა, საიდანაც ზღვარის გადალახვა 83-მა შეძლო, 29-დან 10-მა დაამტკიცა თავის კომპეტენცია გერმანულ ენაში, რაც შეეხება რუსულს, ამ შემთხვევაში ზღვარის გადალახვა გამოცდაზე გასული საერთო რაოდენობის ნახევარზე მეტმა მოახერხა.
ამ საგანგაშო შედეგებს ბევრი გამოხმაურება მოჰყვა. ეროვნული ბიბლიოთეკის დირექტორი გიორგი კეკელიძე მიიჩნევს, რომ ამის მიზეზი რეფორმის არარსებობაა:
_ მიკვირს იმ ადამიანების, ვისაც უკვირთ. საკითხი ისედაც ცხადია და კიდევ უფრო მძიმედ გაცხადდება წლების შემდეგ რამდენიმე მიზეზის გამო: ქვეყანაში რეალურად არ მომხდარა განათლების სისტემის ზედმიწევნითი რეფორმა, მათ შორის, პედაგოგთა კვალიფიკაციის თვალსაზრისით.
ვთქვათ, მწარე სიმართლე: მასწავლებელთა თემი საარჩევნო თვალსაზრისით მომგებიან ჯგუფად ითვლებოდა და ითვლება. ეს რყვნის დამსაქმებელსაც: თვალს ხუჭავს და ინერციას ინარჩუნებს და დასაქმებულსაც: იცის, რომ ამის გამო მათ სკოლიდან არავინ გააგდებს:
ა) ხმების დაკარგვის შიშით ბ) არ არის კადრი, რომლითაც ჩაანაცვლებენ. ეს ბ) პუნქტი შეიძლება გაცილებით მნიშვნელოვანი და კომპლექსურია.
ჩემი ორასი კურსელიდან, რომელთა კვალიფიკაციაც ქართული ენისა და ლიტერატურის მასწავლებელია, მხოლოდ 5 პროცენტი მუშაობს ამ პროფილით და ისიც პარალელურად რეპეტიტორია.
მიზეზი მარტივად ამოსაცნობია: დაბალი ანაზღაურება. იმედს ვიტოვებ, რომ გუშინდელი, მორიგი მკაფიო მარცხის შემდეგ, დაიწყება ფიქრი კომპლექსურ ცვლილებებზე. საკითხი ქვეყნის მომავალს ეხება, ამ სიტყვების უკიდურესად რაციონალური გაგებით, _ წერს კეკელიძე ფეისბუქის საკუთარ გვერდზე.
პუბლიცისტი ვასილ მაღლაფერიძე წერს, რომ "ეს არის შედეგი წლების განმავლობაში განათლების სისტემის ნგრევისა და მასწავლებლის პროფესიის გაუფასურებისა."
_ თან ვითარებას ამძიმებს ისიც, რომ ეს "ჩაჭრილი" მასწავლებლები გააგრძელებენ სწავლებას, _ წერს მაღლაფერიძე.
გასულ კვირაში ფეისბუქზე აქტუალური ქალთა დღესასწაულებიც იყო.
საქართველოს თავდაცვის მინისტრის თინა ხიდაშელის თქმით, კარგი იქნებოდა მამის დღეც რომ იყოს დაწესებული:
_ დედის დღე მესმის. მამის დღეც რომ გვქონდეს, ძალიან კარგი იქნებოდა, ასე მგონია, ბევრ ქვეყანაში აქვთ. კიდევ ბევრი დღე მესმის, 8 მარტი არ მესმის და მომკალით.
დღესასწაული ასე მესმის — უნდა მიულოცო, ადამიანებს მოეფერო, განსაკუთრებით მოექცე, დააფასო. რაღაც ასეთი. თუმცა, ალბათ, ყველას ჩვენებურად გვესმის ის, რის გამოც 8 მარტი საჭირო გახდა.
ჰოდა, შევეცდები მოგილოცოთ ქალებო.
პირველ რიგში, ქალებო! ძალიან მაგარი სიტყვაა, საქართველოში რატომღაც ეუხერხულებათ — ქალბატონებს, მანდილოსნებს ამბობენ. ქალი თითქოს ცუდი სიტყვა იყოს. არ ვიცი, თუ შეგიმჩნევიათ. დააკვირდით, მე ხშირად მიგრძვნია. შენიშვნაც კი მიმიცია.
ყველაზე მთავარი კი ალბათ მაინც ის არის, ჩვენ რომ ოთახს დავტოვებთ, დარჩენილებმა ამრეზით, ან დანანებით, ან სისუსტის აღმნიშვნელი მიმიკით არ გამოგვაყოლონ მზერა. შენი თანდასწრებით თანასწორს საქმეში, შენს არ ყოფნაშიც თანასწორად განგიხილავდნენ; შენი თანდასწრებით პარტნიორს საქმეში, შენს არ ყოფნაშიც გეპარტნიორებოდნენ; შენი თანდასწრებით — ადვილად მისაღწევი ჩანს უკვე. ეს ბრძოლა მეტნაკლებად მოგებულია. შენს არ ყოფნაში — მიმიკის და მზერის ბრძოლაში გამარჯვებას ვუსურვებ საკუთარ თავსაც და გისურვებთ
ქალებო!!!! _ წერს ხიდაშელი ფეისბუქის საკუთარ გვერდზე.
ორიგინალურად მიულოცა ქალბატონებს 8 მარტი ვიცეპრემიერმა კახი კალაძემ:
_ ყოველი საზოგადოების სახეა ქალების მდგომარეობა და ქალებისადმი დამოკიდებულება.
ჩვენ დღეს ვჩუქნით საჩუქრებს, ყვავილებს, ვუძღვნით ლამაზ სიტყვებს და ვუსურვებთ საუკეთესოს.
დღეს, 8 მარტს არის ის ყოველწლიური შეხსენება, რომ ქალების უფლებები, ქალების პრობლემები და მათი საზოგადოებრივი აქტიურობა არის მამაკაცების ხელში, ჩვენ ვართ ვალდებულები, მივცეთ მათ ასპარეზი, დავუდგეთ მხარში და ვაგრძნობინოთ თავისუფლება.
მხოლოდ თავდაჯერებული, სიყვარულში მყოფი ქალი არის შემოქმედი ბედნიერი მომავლის.
მხოლოდ თავისუფალი ქალი არის ჯანსაღი საზოგადოების დედა!
გვახსოვდეს, რომ მხოლოდ ბედნიერი ქალის გვერდით გრძნობს მამაკაცი თავს სრულყოფილად.
გილოცავთ ქალთა საერთაშორისო დღეს! _ წერს კალაძე ფეისბუქის საკუთარ გვერდზე.
ფეისბუქზე გამორჩეული პოსტებით ცნობილმა სცენარისტმა და ბლოგერმა აკა სინჯიკაშვილმა 8 მარტთან დაკავშირებით სახალისო ფრაზები გამოაქვეყნა:
_ "პერეხადნოი" ხიდთან ვიდექი ერთი საათი და "ნახალოვკელ" ბიჭებს საერთოდ არ უხარიათ 8 მარტი:
"რესტორნის ფულს ვჩალიჩობ, სადამდე ვიაროთ ამ ეკლესიაში"; "ისეთი მოკლე კაბით გამოვიდა დილას, საღამომდე ვინ დაგაცდის შენ"; "კართან ვეღარ დავუტოვებ, შარშან მაგისმა ძმამ ლამის ტრ…ში გამიკეთა ის ბუკეტი"; "რა ყვავილები, კბილი ჩაუსვი, შეჩემა"; "აზრი არა აქ ბიჭო, ხარივით სვამს, ორჯერ გამთიშა"; "ერთი ცოლად როდის მოვიყვან, დავიტანჯე ამ ყვავილების თრევით"; "რა კოჭლი, შეჩემა, სექსუალურად დადის, რა"; "ქალბატონო, ერთი ვარდი მინდა,-თქო, ბიძინას ვგავარ?"; "ყვავილები არ აჩუქო, ეგონება, რომ გიყვარს და აღარ მოგცემს"; "თითქმის ტუჩებში ვაკოცე გადაკოცნისას, აუ, რა გაასწორა"; "არ გამომართმევს და საფლავზე დავულაგებ, ბიჭო!"; "დედამისი წყევლიდა და ძლივს შევიკავე თავი, ხო იცი, რა გიჟი ვარ"; "კაროჩე, ერთი ხუთი დუხი გაასინჯე, მერე სუნს ვეღარ გაიგებს და იაფიანი უყიდე რა"; "სადმე პარკში ვისეირნებთ, მაგდენი ფული სად მაქვს, მამაჩემზე ბევრს ჭამს, იმენნა"; "არ არის სოფლელი, გურჯაანი ქალაქია, შე გოიმო", _ "ნახალოვკელი" ბიჭების სარვამარტო გამონათქვამებს გვაცნობს სცენარისტი "ფეისბუქზე".
