დღეს ლანჩხუთის მუნიციპალიტეტის შუხუთის ადმინისტრაციულ ცენტრში ადგილობრივები დღის 12-ის ნახევრისთვის შეიკრიბნენ სოფლის გაზიფიცირების მოთხოვნით. მოსახლეობასთან შესახვედრად მუნიციპალიტეტის ხელმძღვანელებიც იყვნენ მოწვეულები, თუმცა მათ მოსახლეობა ორ საათზე მეტი ელოდებოდა. ორი საათის დაგვიანებით ადგილზე გამგებელი ზაზა ურუშაძე და მისი მოადგილე, ნუგზარ ცინცაძე გამოცხადნენ.
შუხუთელები ხელმძღვანელი პირებისგან ითხოვენ პასუხს ერთ კონკრეტულ კითხვაზე, თუ რატომ შეჩერდა სოფლის გაზიფიცირება და როდის დამთავრდება ეს პროექტი.
"შუხუთი მუნიციპალიტეტის მასშტაბით ერთ-ერთი ყველაზე მჭიდროდ დასახლებულია, თან ქალაქზე მიბმული სოფელია. გაზის მაგისტრალი შემოყვანილია, თუმცა მოსახლეობის მხოლოდ 10% -ს მიეწოდება ბუნებრივი აირი. ვითხოვთ, პროექტი დასრულდეს და გაზი ყველა ოჯახამდე მივიდეს. გვაიმედებდნენ, 2013 წელს იქნებაო, მერე 2014 წელს, აგერ სადაცაა 2017 წელიც მოვა და არაფერი ჩანს,"- ცხარობდნენ გამგებლის მოსვლამდე შუხუთელები. თუმცა, უშუალოდ პირველ პირთან საუბრებში შედარებით მოკრძალებულები ჩანდნენ.
მოსვლისთანავე გამგებელმა აღნიშნა, რომ მათზე არანაკლებადაა დაინტერესებული შუხუთში გაზის შეყვანით, მაგრამ ამის გადაწყვეტა მის ძალებს აღემატება და ენერგეტიკის სამინისტროსა და "სოკარისკენ" მიანიშნა.
"სოკარის" წარმომადგენლობასთან მე არ მქონია შეხვედრა, ამიტომ დაახლოებით 10 დღეში შემეძლება გითხრათ რა ვადებში შეიძლება ამ პროექტის დამთავრება. ყველა შესაბამისი სამინიტრო ჩაყენებული მყავს საქმის კურსში, მომავალ კვირას ჩამოვლენ და უშუალოდ მათ შეგახვედრებთ. მაქსიმალურად ვარ დაინტერესებული ამ პროექტის დასრულებით, დაპირება მოგვცა ენერგეტიკის სამინისტრომაც. აუცილებლად დავაყენებ ამ საკითხს მთავრობაში. თუ სხვა გზა არ დარჩა, მუნიციპალიტეტი ეცდება, მთავრობასთან შეთანხმებით, გამოყოს საჭირო თანხები. საბოლოო პასუხს ვერ გეტყვით რა ვადაში, თუმცა პირობას გაძლევთ მაქსიმალურად ვეცდები, წელს გადაწყდეს ეს საკითხი. აქედან ათი დღის ვადაში გეტყვით, რა და როგორ იქნება,"- უთხრა გამგებელმა მოსახლეობას, რომელმაც სოფელში პირად წარმომადგენელს ხელწერების შეგროვება მოთხოვა, თუ ვის სურს გაზის შეყვანა.
გამგებელს ადგილობრივებმა დაუსვეს შეკითხვა, თავის დროზე რატომ შეჩერდა შუხუთის გაზიფიცირების პროცესი და რატომ გადაინაცვლა გვიმბალაურში. "სოკარმა" რა იცის, სადაა გვიმბალაური, აცანა, გრიგოლეთი ან მამათი, თუ ადგილობრივმა არ მოაწოდა ინფორმაცია. როგორაა საქმე, მარჯვენა ხელმა არ იცის მარცხენა რას აკეთებს?! რა მოხდა, გამგეობაში გვიმბალაურლები რომ მუშაობდნენ, იმათ აჯობეს ჩვენს დეპუტატს? მასთან მთლად კარგი ურთიერთობა არ გაქვთ და ამიტომ სოფელი იჩაგრება,"– დაიჩივლეს შუხუთელებმა .
ურუშაძემ კატეგორიულად უარყო ეს მოსაზრება.
"რა შუაშია ეს. ვინ თქვა, რომ ცუდი ურთიერთობა მაქვს თქვენს დეპუტატთან, აგერაა ბატონი კაკო და თქვას, მე შუხუთს ყოველთვის გვერდში ვუდგევარ, ახლა საბავშვო ბაღის რეაბილიტაციას ვიწყებთ. ყველანაირად ვცდილობ დაგეხმაროთ და ეს ჩვენი ურთიერთანამშრომლობის შედეგია. რაც შეეხება გვიმბალაურს, მე რომ მოვედი ეს პროექტი დამხვდა და რა უფლება მქონდა რამე შემეცვალა," – იყო გამგებლის პასუხი.
ჩვენ დავინტერესდით, ურუშაძის წინამორბედის დროს შუხუთის ნაცვლად მართლაც იყო თუ არა გვიმბალაური გაზიფიცირების პროექტში გათვალისწინებული და კომენტარი ყოფილ გამგებელს კახა ასკურავას ვთხოვეთ.
"რა თქმა უნდა, ეს ტყუილია, პრინციპში ისეთივე როგორიც ჩვევია ბატონ ზაზას თავისი უნიათობის გადასაფარად. მაგალითად ისეთის, როგორიცაა ცარიელი ბიუჯეტის დახვედრება, რომელიც შემდგომ თავადვე უარყო. მთელი პასუხისმგებლობით მინდა განვაცხადო, რომ ჩვენი ხელისუფლების პირობებში ახლა გაზიფიცირება დასრულებული იქნებოდა არამარტო შუხუთში, არამედ ჯაპანის ჩათვლით ყველა სოფელში, რადგანაც ჩვენ დავტოვეთ პროექტი, რომლითაც გაზიფიცირება უნდა გაგრძელებულიყო, როგორც შუხუთის, ასევე გვიმბალაურის მიმართულებით, ამათ კი გააჩერეს. გვიმბალაურში გაგრძელების ერთადერთი მიზეზი კი ოცნების მაღალჩინოსანთა ინტერესი აღმოჩნდა, რადგანაც აღნიშნულ მილს მათ სახლებთან უნდა გაევლო, შუხუთს და დანარჩენ სოფლებს კი ამდენად არ "გაუმართლათ," –გვითხრა ასკურავამ.
საბოლოოდ შუხუთის მოსახლეობამ იმ იმედით დატოვა აქცია, რომ მომდევნო 10 დღეში მიიღებენ კონკრეტულ და არგუმენტირებულ პასუხს, დასრულდება თუ არა შუხუთში გაზიფიცირების პროცესი და როდის. სხვათაშორის, აქცია ანალოგიური მოთხოვნით შუხუთელებმა დაახლოებით ორიოდე კვირის წინ გამართეს, მაგრამ მაშინ მათ გამგებლის მოადგილე ნუგზარ ცინცაძე შეხვდა.
დღევანდელი თავყრილობის შემდეგ ბევრისთვის გაუგებარი დარჩა, კიდევ ათი დღე რატომ ითხოვა გამგებელმა, როცა პირველი აქციიდან საკმაო დრო გავიდა. ადგილობრივმა ხელისუფლებამ კარგად იცოდა ხალხის მოთხოვნა რა იყო და გასარკვევი, წესით, აქამდეც უნდა გარკვეულიყო.
