ოზურგეთში, ანდღულაძის ქუჩაზე მცხოვრებ 85 წლის ლეილა ანდღულაძეს სოციალური დახმარება მოუხსნეს _ ორი ქათამი ერთ-ერთი მიზეზია, რის გამოც მას სასიცოცხლოდ საარსებო შემწეობა აღარ ეძლევა.
160-ლარიანი პენსიისგან მოხუცს, სულ ცოტა, 120 ლარი წამლების შესაძენად სჭირდება _ მას 20 წელია, გლაუკომა აქვს, მარცხენა თვალით საერთოდ ვერ ხედავს, მარჯვენა თვალითაც ნახევრად არჩევს საგნებს. მოხუცს მოციმციმე არითმია დიდი ხნის წინ დაუდგინეს. როგორც თვითონ ამბობს, სხვის დანატოვარ სახლში ცხოვრობს, სადაც წვიმის დროს, ოთახში წყალი ჩამოდის.
_ სახლიც არაა ჩემი. 15 წლის წინ, აქ მცხოვრებმა, ეროვნებით უკრაინელებმა შეგვიშვეს და თვითონ წავიდნენ. ეს სახლი დღემდე მათ საკუთრებაშია. ღმერთმა გაახაროს ისინი _ ჯერ არ მაწუხებენ. რომ ჩამოვიდნენ და გაყიდონ, ღია ცის ქვეშ დავრჩები ეს დაბრმავებული ქალი. რა დავუშავე ამ ხელისუფლებას, დახმარება რომ მომიხსნა?! ორი ქათამი ეწერა დეკლარაციაში. სულ ავად ვარ და ერთხელ მთისპირელმა დისშვილისშვილმა მომინახულა, საჩუქრად მომიყვანა და არ დავკალი. სამაგიეროდ, მე წამაკლეს ზედ, _ გვეუბნება ლეილა ანდღულაძე.
ვიდრე ქალბატონი ლეილა საკუთარ გაჭირვებაზე საუბრობდა, მეზობლები შემოვიდნენ, რომლებიც აღშფოთებას ვერ მალავდნენ:
ინგა მამაკაიშვილი, მეზობელი: "მეზობლები ვპატრონობთ. წვიმიან ამინდში მოდით აქ და ნახავთ, როგორ ჩამოდის ჭერიდან წყალი. ერთი შვილი ჰყავს და მტერს გაუჭირდეს ისე, როგორ დღეშიც ისაა _ ურთულესი პრობლემის გამო, ბანკმა სახლი გაუყიდა, ქირით ცხოვრობს და თავს ძლივს ირჩენს. ამ უსინათლო მოხუცს, რომელსაც წამლის ფულად არ ჰყოფნის პენსია, დახმარება მოუხსნეს. ქალი ავადმყოფია, სხვის სახლში ცხოვრობს. სანახავად მოსულმა ნათესავმა ორი ქათამი მოუყვანა, არ დაკლა და ამიტომ უნდა მოეხსნათ დახმარება?! რა გადამოწმება უნდა იმას, რომ ბევრად უმჯობეს მდგომარეობაში მყოფთ აქვთ დღეს დახმარება, ვიდრე ლეილა ანდღულაძეა? ვერა და ვერ მოისპო ეს უსამართლო პრაქტიკა ამ სისტემაში! 114 ათასი ქულა რაში დაუწერეს _ ბრმა რომ არის, გული, ჩიყვი და ყველაფერი ერთად რომ აწუხებს? სიკვდილი უნდა მოანატრონ? ისეც ნატრობს, მადლობა ასეთი დახმარებისთვის სოციალურ სამსახურს!!!"
ლეილა ანდღულაძემ გვაჩვენა გურიის სოციალური მომსახურების სამხარეო ცენტრის უფროსისგან მიღებულ წერილი, სადაც წერია, რომ: "წარმოდგენილი სამედიცინო ცნობა ჯანმრთელობის მდგომარეობის შესახებ, არ ექვემდებარება სოციალურად დაუცველი ოჯახების მონაცემთა ერთიან ბაზაში განთავსებულ დეკლარაციაში კორექტირებას".
ჩვენს კითხვაზე, თუ არ ეთანხმებოდა, რატომ მოაწერა აგენტის მიერ შევსებულ დეკლარაციას ხელი, ლეილა ანდღულაძე ამბობს, რომ ის ვერ ხედავს და რაც უთხრეს, დაიჯერა: _ რა ვიცი, რა დაწერა?! მეგონა, არ მატყუებდა და მოვაწერე ხელი. მერე სხვებმა წამიკითხეს და მითხრეს, რომ ორი ქათამი იყო მითითებული.
"გურია ნიუსი" დაუკავშირდა სოციალური მომსახურების სააგენტოს გურიის სამხარეო ცენტრის უფროსს ვასილ ხომერიკს:
_ ერთადერთი, რაც მინდა გითხრათ, არის ის, რომ სააგენტოს მიერ შესწავლილია მოქალაქე ლეილა ანდღულაძის საქმე და მას კანონმდებლობის შესაბამისად დაენიშნება დახმარება.
_ ბატონო ვასილ, ლეილა ანდღულაძე ამბობს, რომ 114 ათასი ქულით შეაფასეს და დახმარება მოუხსნეს. აქვს სააგენტოსგან მიღებული წერილიც.
_ გეუბნებით, რომ შესწავლილია მისი მდგომარეობა და მალე დაენიშნება დახმარება.
იმედია, ხომერიკის დაპირება მალე შესრულდება, "გურია ნიუსი" კი თვალს მიადევნებს ლეილა ანდღულაძის საქმეს და დეტალებს მკითხველს გავაცნობთ.
