კალმახელიძის სამინისტროში არასამთავრობოებისა და ჟურნალისტების წერილი უგზო-უკვლოდ გააქრეს

ათასობით პატიმრის მშობლისა თუ ახლობლების კორესპონდენციები, განსაკუთრებით ხათუნა კალმახელიძის სახელზე დაწერილი, როგორი “გულისყურით იკითხება და იხილება” ამ უწყებაში, ალბათ, მარტივად მისახვედრია…

ჩვენი უამრავი მცდელობის მიუხედავად, სამინისტროში ერთი ადამიანიც არ აღმოჩნდა, რომელიც ორი სიტყვით მაინც გაგვარკვევდა, თუ რა ბედი ეწია აქციის მონაწილე მედია-საშუალებების მიერ შეტანილ წერილს, რომლითაც ხათუნა კალმახელიძესთან შეხვედრას ვითხოვდით.

2012 წლის 4 მაისს სასჯელაღსრულების, პრობაციისა და იურიდიული დახმარების საკითხთა სამინისტროს წინ აქცია მოეწყო, რომლის მონაწილე არასამთავრობო და მედია-ორგანიზაციები გლდანის #18 საპყრობილეში პატიმარ ზურაბ დელიანიძის გარდაცვალების ფაქტს გმობდნენ. პატიმრის გარდაცვალების ოფიციალურ მიზეზად აღნიშნული უწყება გულის შეტევას ასახელებდა, რასაც ოჯახი კატეგორიულად არ ეთანხმებოდა.

აქციის ორგანიზატორებმა, მედიის წარმომადგენლებთან ერთად, მინისტრ ხათუნა კალმახელიძესთან მოითხოვეს შეხვედრა.

“ადმინისტრატორი”, რომელიც აქციის ორგანიზატორებს მინისტრთან შუამავლობას შეპირდა, ისე “დაიკარგა”, რომ პასუხის გამცემი აღარავინ დარჩა. მისაღებში კი გაგვიმარტეს, თუ განცხადებას არ დაწერთ, მინისტრს ვერ შეხვდებითო.

“გურია ნიუსმა” ხათუნა კალმახელიძის სახელზე იმავე დღეს შეიტანა წერილი: “გთხოვთ, დღევანდელი აქციის მონაწილეებთან, სხვა მედია საშუალებებთან ერთად, შეგხვდეთ რათა გაგესაუბროთ ზურაბ დელიანიძის საქმის ირგვლივ”.

ამ წერილს, აქციის გასაშუქებლად მისულმა ყველა მედიასაშუალებამ მოაწერა ხელი, გარდა “რუსთავი 2”-ისა და საზოგადოებრივი მაუწყებლისა. ხათუნა კალმახელიძესთან შეხვედრა არც განცხადების დაწერის შემდეგ მოხერხდა, რადგან კანცელარიის განმარტებით, წერილი მინისტრთან შეხვედრასთან დაკავშირებით გვიან შევიდა.

4 მაისი პარასკევი იყო, აქედან გამომდინარე, ვიფიქრეთ, რომ კალმახელიძის უწყებისგან პასუხს, სავარაუდოდ, ორშაბათს მივიღებდით, თუმცა, მას შემდეგ რამდენიმე ორშაბათი გავიდა, წერილზე პასუხი კი არავინ გაგვცა.

“გურია ნიუსი” სამკვირიანი ლოდინის შემდეგ, წერილის ბედით დაინტერესდა და საქართველოს სასჯელაღსრულების, პრობაციისა და იურიდიული დახმარების საკითხთა სამინისტროს კანცელარიას დაუკავშირდა. იქიდან საქმის წარმოების სამმართველოსთან გადაგვამისამართეს, სადაც ასევე არაფერი იცოდნენ. შემდეგ, პრესასთან ურთიერთობის სამსახურის უფროსს თეა სუხაშვილს დავუკავშირდით, მაგრამ პასუხი ვერც მისგან მივიღეთ..

სასჯელაღსრულების, პრობაციისა და იურიდიული დახმარების საკითხთა სამინისტროს კანცელარიის პასუხი ასეთი გახლდათ:

_ “გურია ნიუსიდან” გაწუხებთ. თქვენთან 4 მაისს დავტოვეთ განცხადება ქალბატონ ხათუნა კალმახელიძესთან შეხვედრასთან დაკავშირებით. პასუხი როდის იქნება?

_ დამელოდეთ… ქალბატონო, იცით რა არის? თქვენ ახლა კანცელარიაში რეკავთ, ჩვენთან არაფერი პასუხი ამაზე არ ფიქსირდება. ალბათ, ჯერ ისევ მსვლელობაშია. გეცნობებათ აუცილებლად.

_ ყველა ინსტანციაში, სადაც წერილს ვაბარებთ, შემდეგ მისამართს გვაძლევენ და ტელეფონის ნომერს. როდის გვექნება წერილზე პასუხი?

_ კი, მაგრამ… იცით, რა არის? მსვლელობა მიეცა. მინისტრის სახელზე იყო. რა თქმა უნდა, მინისტრთან შევიდა ეს წერილი, მაგრამ იმის შემდეგ უკვე რა მდგომარეობაა, არ ვიცი.

_ მაშინ გადამამისამართეთ იმ პირთან ან ადამინისტრაციასთან, რომელიც კონკრეტულად ამ საკითხს კურირებს თქვენს სამინისტროში.

_ დამირეკეთ მაშინ ორ-სამ წუთში და გეტყვით ნომერს.

ხუთი წუთის შემდეგ “გურია ნიუსი” ისევ დაუკავშირდა კალმახელიძის უწყების კანცელარიას. გვთხოვეს, დავლოდებოდით. რამდენიმეწამიანი ლოდინის შემდეგ სხვა ქალბატონმა გვიპასუხა:

_ გამარჯობათ, მოგესალმებით. იცით, ამ ეტაპზე ინფორმაცია არ გვაქვს, რა მსვლელობა მიეცა თქვენს განცხადებებს. ახლა ხელმძღვანელობა გავაფრთხილეთ, თქვენ რომ დაინტერესებული ბრძანდებით. თქვენ ტელეფონის ნომერს თუ დამიტოვებთ, დაახლოებით დღის ბოლოს დამირეკეთ და შეგატყობინებთ.

_ უკაცრავად, თქვენ ვინ ბრძანდებით და რას კურირებთ სამინისტროში?

_ მე თამარ გელოვანი გახლავართ. საქმის წარმოების სამმართველოდან.

ამის შემდეგ, საზოგადოებასთან ურთიერთობის სამსახურის უფროსს, თეა სუხაშვილს დავუკავშირდით.

_ თეა გამარჯობათ, “გურია ნიუსიდან” გაწუხებთ. თქვენს უწყებაში 4 მაისს შემოვიტანეთ წერილი ქალბატონ ხათუნა კალმახელიძესთან შეხვედრასთან დაკავშირებით. კონკრეტულად ეს ეხებოდა გლდანის #18 დაწესებულებაში ზურაბ დელიანიძის გარდაცვალების საკითხს. დღემდე წერილთან დაკავშირებით პასუხი ვერ გავარკვიეთ. სამინისტროს კანცელარიაში მეუბნებიან, წერილი მიღებულია, მაგრამ ვერ არკვევენ, რა მსვლელობა მიეცა ამ წერილს. შეგიძლიათ გამარკვიოთ, რა ხდება?

_ 4 მაისს ხომ?!

_ დიახ. 4 მაისიდან დღემდე დიდი დრო გავიდა. უკვე თვის ბოლოა.

_ გავარკვევ. თქვენი სახელი?

_ ირმა მესხია.

_ წერილი თქვენი სახელით არის შემოსული?

_ დიახ.

_ კარგით გავარკვევ.

შემდეგი კითხვის დასმა ვერ მოვასწარით, რადგან პრესსამსახურის უფროსმა ტელეფონი გათიშა. მასთან მოგვიანებით ვცადეთ დარეკვა, მაგრამ ჩვენს ზარებს აღარ პასუხობდა.

პრესსამსახურიდან პასუხი ვერც დღის ბოლოს მივიღეთ, მაგრამ ერთი რამ ნამდვილად გავარკვიეთ _ სამინისტროში, ჩვენი წერილის შესახებ არაფერია ცნობილი და მისი გზა-კვალიც დაუდგენელია…