რამდენიმე დღის წინ, ლანჩხუთში დიდი სტუმრიანობა იყო _ მუნიციპალიტეტის კულტურის სახლში კულტურის ცენტრთან არსებული სიმღერისა და ცეკვის სახალხო ანსამბლ "მხედრების" ერთგვარი შემაჯამებელი კონცერტი გაიმართა, სადაც სტუმართა შორის იყო საქართველოს ქორეოგრაფიის მოღვაწეთა შემოქმედებითი კავშირის თავმჯდომარე რევაზ ჭანიშვილი.
კონცერტი, რომელსაც ესწრებოდნენ სტუმრები თბილისიდან, ფოთიდან, ბათუმიდან, ზუგდიდიდან, ოზურგეთიდან, მართლაც შთამბეჭდავი იყო _ რამდენიმე სტილის ერთმანეთთან მაღალოსტატურად შეხამებამ დიდი ეფექტი იქონია პუბლიკაზე.
აღნიშნულ კონცერტს არა ერთი დადებითი გამოძახილი მოჰყვა საზოგადოებასა და პრესის ფურცლებზე. მათ შორის, ლანჩხუთის გამგეობის ოფიციალურ გვერდზეც, სადაც "მხედრები" უკვე სახელმწიფო ანსამბლის სტატუსითაა მოხსენიებული:
"სიმღერისა და ცეკვის ანსამბლმა "მხედრებმა" მაყურებელს დაუვიწყარი სანახაობა აჩუქა. ერთმანეთს ენაცვლებოდა ქართული ხალხური ცეკვები და სიმღერები, შთამბეჭდავი იყო ბენდის მიერ შესრულებული ყველა ნომერი.
საღამოს დასასრულს, სცენაზე ბატონი რეზო ჭანიშვილი ავიდა. მან ანსამბლის ყველა წევრს მიულოცა წარმატებით დასრულებული კონცერტი და საზოგადოებას სასიხარულო ამბავი აუწყა _ "მხედრებს" სახელმწიფო ანსამბლის სტატუსი მიენიჭა!!!" _ ვკითხულობთ ლანჩხუთის გამგეობის მიერ გავრცელებულ ოფიციალურ ინფორმაციაში.
სწორედ, ანსამბლის სტატუსის მინიჭების საკითხმა გამოიწვია აზრთა სხვადასხვაობა, რამაც ბევრი პასუხგაუცემელი კითხვა გააჩინა. იქიდან გამომდინარე, რომ საქართველოს ქორეოგრაფთა კავშირს, საკუთარი დებულებიდან გამომდინარე, უფლება არ აქვს, რომელიმე სუბიექტს მიანიჭოს რაიმე სახის წოდება, გარდა სიგელისა ან ფასიანი საჩუქრისა, საზოგადოების რიგი წევრები ეჭვს გამოთქვამენ ოფიციოზის მიერ "მხედრების" ახალ სტატუსთან დაკავშირებული ინფორმაციის სინამდვილეზე. მათ შორის არის გამგეობის კულტურის სამსახურის ყოფილი უფროსი ირმა მგელაძე, რომელსაც ეს ყველაფერი პიარის ნაწილი ჰგონია:
"მე კარგად ვარ ჩახედული კულტურის შესახებ კანონშიც, კულტურის სამინისტროს დებულებაშიც და ზუსტად ვიცი, რომ სხვადასხვა შემოქმედებით კავშირს უფლება აქვს, დააყენოს მხოლოდ შუამდგომლობა სამინისტროს წინაშე, რომელიც საკმაოდ ხანგრძლივი და რთული პროცესია, რის შემდეგაც შეიძლება მიანიჭონ ეს წოდება და შეიძლება _ არა.
საქართველოს ქორეოგრაფთა კავშირს, წესდების მიხედვით, არ აქვს უფლება, რაიმე წოდება მიანიჭოს არა თუ ანსამბლს, არამედ პიროვნებასაც კი, გარდა საპატიო სიგელისა ან ფასიანი საჩუქრებისა. ამას ვამბობდი შარშანაც, როცა ზარზეიმით მოატყუეს ლანჩხუთელები და სახალხო ანსამბლის წოდება მიანიჭეს "მხედრებსო". მაგრამ პასუხი ამ ტყუილისათვის არავისთვის მოუთხოვიათ. ახლა ბევრად მაღლა ასწიეს თამასა _ სახელმწიფო აკადემიური წოდება ცოტა სხვა რაღაცებს გულისხმობს და მალე გამოჩნდება ამ ტყუილის უაზრობა", _ ამბობს მგელაძე, რომელსაც, ასევე, მიაჩნია, რომ "მხედრებს" მართლაც ეკუთვნის სახელმწიფო ანსამბლის სტატუსი:
"ვინმეს არ ეგონოს, წინააღმდეგი ვარ, "მხედრებს" ეს სტატუსი მიენიჭოს. პირიქით, მიმაჩნია, რომ ამ ანსამბლს მართლაც ეკუთვნის რანგით ამაღლება, მაგრამ ცუდია, რომ რეალურად ეს ასე არ არის და თავად ანსამბლის წევრები შეჰყავთ შეცდომაში", _ დასძინა მგელაძემ.
"მხედრებისთვის" სახელმწიფო ანსამბლის სტატუსის მინიჭებას არ ადასტურებს საქართველოს ქორეოგრაფთა კავშირის წევრი, რეზო ჭანიშვილის შვილი, გელა ჭანიშვილიც:
_ სახელმწიფო ანსამბლის სტატუსის მინიჭება ჩვენს კავშირს არ შეუძლია, ჩვენ შესაძლებლობებში შედის მხოლოდ შუამდგომლობით მივმართოთ კულტურის სამინისტროს, რომლის პრეროგატივაცაა სტატუსის მინიჭება.
_ ბატონო გელა, რის საფუძველზე მოიხსენია ბატონმა რეზომ "მხედრები", როგორც სახელმწიფო ანსამბლი და არის თუ არა შესული კულტურის სამინისტროში თქვენგან შესული შუამდგომლობის წერილი ამასთან დაკავშირებით?
_ წერილი ამის თაობაზე კულტურის სამინისტროში გადასაგზავნად მომზადებული გვაქვს, თუმცა, რამდენადაც მე ვფლობ ინფორმაციას, ჯერ გადაგზავნილი არ არის. ასე მარტივად არ ხდება სტატუსის მინიჭება, ეს შემდგომში შესაბამისმა კომისიამ უნდა განიხილოს. ბატონი რეზო არანაირად არ იტყოდა, რომ "მხედრებს" მიენიჭა სახელმწიფო აკადემიური ანსამბლის წოდება _ ერთადერთი, რასაც იტყოდა, ისაა, რომ შევიდოდა შუამდგომლობით სამინისტროში ანსამბლისთვის სახელმწიფო აკადემიური სტატუსის მინიჭებასთან დაკავშირებით. წერილი არ არის ჯერ შესული სამინისტროში და როგორ იქნება "მხედრები" უკვე სახელმწიფო ანსამბლი?
ქორეოგრაფიის მოღვაწეთა შემოქმედებითი კავშირის თავმჯდომარის მოადგილის, ოლეგ ალავიძის თქმით, ინფორმაცია, თითქოს, "მხედრებს" სახელმწიფო სტატუსი უკვე მიენიჭა, მცდარია და საამისოდ ბევრი საფეხურია გასავლელი:
_ ბატონმა რეზომ იმ დღეს, კონცერტის დამთავრების შემდეგ ბრძანა, რომ ანსამბლის გამოსვლის დონე აჩვენებს იმას, რომ თუ ხელშეწყობა იქნება, იგი უკვე იმსახურებს უფრო მაღალ აკადემიურ წოდებას. ამ ეტაპზე მცდარია ინფორმაცია, თითქოს, "მხედრებს" სახელმწიფო აკადემიური სტატუსი მიენიჭა. ჩვენ, ამასთან დაკავშირებით, ვაპირებთ შუამდგომლობით შევიდეთ კულტურის სამინისტროში, _ გვითხრა ოლეგ ალავიძემ.
უხერხულობას, რომ ოფიციალურ ინფორმაციებში "მხედრები" უკვე სახელმწიფო ანსამბლად მოიხსენიება, ვერ ხედავს მუნიციპალიტეტის საკრებულოს შესაბამისი კომისიის თავმჯდომარე ია ჩხაიძე, რომლის თქმითაც, ანსამბლისთვის ახალი სტატუსის მისანიჭებლად, მხოლოდ ფორმალური მხარე დარჩა მოსაგვარებელი: "ბატონმა რეზო ჭანიშვილმა აღნიშნა, რომ ანსამბლის დონე ნამდვილად იმსახურებს სტატუსის ამაღლებას. ბატონი რეზოს გარდა, ამასთან დაკავშირებით საკუთარი დადებითი პოზიცია გამოხატეს ლანჩხუთში მყოფმა საკმაოდ მაღალი რანგის მქონე ქორეოგრაფებმა. ფაქტობრივად, საკითხი გადაწყვეტილია, მხოლოდ ფორმალური მხარე დარჩა მოსაგვარებელი", _ ამბობს ჩხაიძე.
ლანჩხუთის კულტურის ცენტრის ხელმძღვანელი გია იმნაიშვილი ჩვენთან საუბარში ამბობს, რომ "ოფიციალური დოკუმენტი "მხედრების" სახელმწიფო აკადემიური ანსამბლის სტატუსთან დაკავშირებით, ჯერ ხელთ არ აქვთ, თუმცა, ამაზე შესაბამის უწყებებში მიმდინარეობს მუშაობა".