სოციალურ ქსელებში ჩაკარგული ხელისუფლება

უმეტესობა ღვთის მადლიერია, რომ თავის გატანა და ოჯახის გამოკვება როგორღაც მოახერხა, უმცირესობა _ კმაყოფილია, ხელისუფლება კი “საქმენი საგმირონით” თავს იფასებს.
პრემიერმა გილაურმა უკვე ჩააბარა წლის ანგარიში და აღნიშნა, რომ 2010 წელი იყო წარმატებების, მშენებლობის, სიმტკიცის და ა.შ. წელი! პრემიერს არც იმის თქმა დავიწყებია, რომ მიმდინარე წელი კიდევ უკეთესი იქნება. გილაურს დანარჩენმა მინისტრებმაც მიბაძეს და იცოცხლე _ რა არ გავიგეთ: დაიგო ძალიან ბევრი გზა, აშენდა უამრავი დაწესებულება, დახმარება გაეწია ბევრზე ბევრ ადამიანს! თუმცა,  რა გააკეთა ჩვენმა ხელისუფლებამ ხალხის საკეთილდღეოდ, ეს ყველაზე კარგად ხალხმა იცის, რომელიც მხოლოდ არჩევნების დროს ხდება საჭირო და აქტუალური. ეს აქტუალობა კი, შვიდი წელია “ნაციონალების” ტრიუმფით სრულდება.
გასული წელი გურიისთვის ძალიან მნიშვნელოვანი იყო. გაიხსნა საკმაოდ ფართო მასშტაბიანი სისხლის სამართლის დანაშაული და გურიის ხელისუფლების მიერ უკანონოდ დაკანონებული მიწების შესახებ მთელმა საქართველომ გაიგო. რატომღაც, ამ დანაშაულისთვის მხოლოდ რამდენიმე ადამიანმა აგო პასუხი _ ჩოხატაურის მუნიციპალიტეტის აწ უკვე ყოფილმა  გამგებელმა მამუკა დოლიძემ, რომელიც ყოველგვარი ახსნა-განმარტების გარეშე გაუშვეს თანამდებობიდან, ჩოხატაურის  გამგეობის რამდენიმე სამსახურის უფროსმა (ოზურგეთის გამგეობის სამსახურის უფროსები კი სახლებში მხოლოდ რამდენიმე დღით გაუშვეს, სავარაუდოდ, ხალხის თვალის ასახვევად) და ჩოხატაურის საკრებულოს “ნაციონალური მოძრაობის” ფრაქციის თავმჯდომარემ შოთა სირაძემ, რომელიც დღეს ოფიციალურ ძებნილად არის გამოცხადებული. უნდა ითქვას ისიც, რომ სირაძის დანაშაულზე პასუხი მის მეუღლესაც, მაია პაიჭაძეს აგებინეს და სამი შვილის დედა დღემდე უმუშევარია, როგორც ამბობენ, მეუღლის გამოჩენამდე!
2010 წელს გურიის ხელისუფლების თითქმის ყველა მაღალჩინოსანი და რიგითი საჯარო მოხელე სოციალური ქსელების აქტიური მომხმარებელიც გახდა. დღის საკმაოდ დიდ ნაწილს ისინი ოდნოკლასსნიკი.რუ-ს და ფფაცბოოკ.ცომ-ს უთმობდნენ.  ეს უკანასკნელი მსოფლიოს მასშტაბით ყველაზე პოპულარული ქსელია, რომელსაც ნახევარ მილიარდზე მეტი მომხმარებელი ჰყავს. ქართველმა ფეისბუქელებმა, რომელთა რიცხვი ნახევარ მილიონზე მეტია, გასულ წელს ყველაზე პოპულარულ ფოტოდ გიგა ბოკერიას მეუღლის, თამარ ჩორგოლეიშვილის და ყოფილი სახელმწიფო მინისტრის, კახა ბენდუქიძის ფოტო აღიარეს. ფაცებოოკ-ი ცენტრალური ხელისუფლებისთვისაც მისაღები ქსელია. მინისტრი, პარლამენტის წევრი, ოპოზიციონერი, ჟურნალისტი, მხატვარი, ერთი სიტყვით ყველა ცნობილი სახე ამ ქსელს დღის განმავლობაში რამდენჯერმე სტუმრობს. არიან ისეთებიც, რომლებსაც “ფეისბუქში ჩაკარგულებს” ეძახიან. ცოტა ხნის წინ, ჟურნალისტი ვახო სანაია წინადადებით გამოვიდა, რომ ფეისბუქის პროფკავშირები შეიქმნას, რადგან ჩინოსანი თუ უჩინო თითქმის მთელი დღე ამ ქსელშია. ზოგი ბაასობს, ზოგი _ მეგობრებს ეძებს, ზოგი _ საქმეს აკეთებს, ზოგიც კიდევ თამაშობს. ეს სოციალური ქსელი კი, თამაშების ნაკლებობას ნამდვილად არ უჩივის. მიუხედავად ასეთი პოპულარობისა, ჩვენი ხელისუფლების უმრავლესობა მაინც, რუსულ ოდნოკლასსნიკი.რუ-ს ამჯობინებს, სადაც მათი ნახვა სამუშაო საათებში ხშირად არის შესაძლებელი. არიან ისეთები, რომლებიც ფეისბუქის უპირატესობას აღიარებენ.  მაგალითად, ოზურგეთის მუნიციპალიტეტის გამგებელი გიორგი ტაკიძე, რომლის ინტერესის სფერო სოციალურ ქსელში, როგორც აღმოჩნდა ქალია. ჩოხატაურის მუნიციპალიტეტის გამგებლის მოადგილის, დიმიტრი კორიფაძის ინტერესი ერთ-ერთი პოპულარული თამაშია. ჩოხატაურის მუნიციპალიტეტის საკრებულოს თავმჯდომარე, ანტონ ხუნდაძე “ოდნოკლასნიკების” მოყვარულია. რუსულ საიტს ხშირად ჩოხატაურის გამგებელი გია გიორგაძეც სტუმრობს. “ოდნოებს” ლანჩხუთის და ოზურგეთის ხელისუფლებაც არ ღალატობს. აღნიშნულ საიტებზე თქვენ შეგიძლიათ  ჩინოვნიკების ფოტოები დაათვალიეროთ. მათ შესახებ (განსაკუთრებით, “ოდნოებში”) პერსონალური ინფორმაციის გაგებაც ადვილი შესაძლებელია, ასევე იმისა, თუ ვინ რომელ თამაშს თამაშობს და რაც მთავარია _ რომელ საათზე.
ამ სტატიის წერისას გადავწყვიტეთ შეგვემოწმებინა იყვნენ თუ არა საიტზე “აციმციმებული” ჩინოვნიკები და როდის ჰქონდათ ბოლო ვიზიტი სოციალურ ქსელში. ჩოხატაურის გამგებლის მოადგილე, დიმიტრი კორიფაძე “ოდნოებში” 3 იანვარს 3 საათსა და 15 წუთზე იყო, ოზურგეთის საკრებულოს აპარატის უფროსი, პაატა ბურჭულაძე _ 4 იანვარს პირველის ნახევარზე საიტზე გახლდათ. ამავე დროს “ოდნოებში” “მოღვაწეობდა” ლანჩხუთის კულტურის სამსახურის უფროსი ირმა მგელაძე.  ამავე საიტზე, 4 იანვარს, სამუშაო დღის განმავლობაში სამივე მუნიციპალიტეტის საკმაოდ ბევრი საჯარო მოხელე იმყოფებოდა. ეს ის დროა, როცა ამ ადამიანებს ჩვენ ფულს მუშაობაში ვუხდით და არა თამაშში და გართობაში.
გურიის გუბერნატორი, ვალერი ჩიტაიშვილი, რომელიც არც ერთი სოციალური ქსელის მომხმარებელი არ არის, ჩვენთან საუბრისას ამბობს, რომ საჯარო მოხელეების ვალდებულება მუშაობაა:
_ მე, პირადად, არც ერთი ქსელის მომხმარებელი  არ ვარ. რაც შეეხება საჯარო მოხელეების მიერ სამუშაო საათებში  ინტერნეტის არადანიშნულებისამებრ სარგებლობას, ძალიან ცუდია. მათი საქმე მუშაობაა და არა ინტერნეტში ძრომიალი, _ აღნიშნა გუბერნატორმა და დაგვპირდა რომ ეცდება, პირადად გააკონტროლოს საჯარო სამსახურში დასაქმებული ადამიანები და “იმ შემთხვევაში, თუ აღმოაჩენს, რომ გართობით არიან დაკავებულები, შესაბამის ზომებსაც მიიღებს”.