"ერთიანი ნაციონალური მოძრაობის" მტკიცებით, "ალფა ბანკში" გახსნილ ანგარიშებზე კორცხელის ინციდენტში მონაწილე სპორტსმენების – ვლადიმერ გეგეშიძისა და გიორგი გიგაურის სახელზე "კალა კაპიტალ ლიმიტედისგან" და რუსეთში მცხოვრები დავით ქარსელაძისგან იგივე "კალატოზასგან", თანხები გადაირიცხა.
ამის შესახებ "ნაციონალური მოძრაობის" წარმომადგენლებმა ირმა ნადირაშვილმა და ოთარ კახიძემ დღეს გამართულ ბრიფინგზე განაცხადეს.
"საზოგადოებისთვის უკვე კარგად არის ცნობილი, რომ ა.წ. 21 მაისს, ზუგდიდის რაიონის სოფელ კორცხელში მიმდინარე გამოტოვებული არჩევნებისას, მთავრობის მიერ ორგანიზებულ მოძალადეთა დანაშაულებრივი ჯგუფი, უშუალოდ საარჩევნო უბანთან, თავს დაესხა პარლამენტის წევრებს, ამომრჩევლებს, "ნაციონალური მოძრაობის" მომხრეებს, ლიდერებსა და რიგით პოლიციელებს.
აღნიშნული ფაქტიდან თითქმის ერთი თვე გავიდა. ხელისუფლებას ამ ძალადობის დამკვეთის გამოსავლენად ქმედითი ნაბიჯები არ გადაუდგამს, ხოლო თავად მოძალადეები დღემდე თავისუფლებაში რჩებიან, მიუხედავად იმისა, რომ ისინი დანაშაულის შემდეგაც განაგრძობდნენ აგრესიულ მოწოდებებსა და ძალადობის მუქარას.
ჩვენ თავიდანვე წარმოვადგინეთ აღნიშნულ ძალადობრივ ჯგუფთან ვიცე პრემიერ კახა კალაძის უშუალო კავშირის დამადასტურებელი არაერთი ფაქტი. აღნიშნულს ადასტურებდა როგორც მოძალადეთა კავშირები ვიცე პრემიერთან და "ქართულ ოცნებასთან", ისე თავად კალაძის რეაქცია და უშუალოდ მისი განცხადებები კორცხელის ძალადობის შეფასებისას, კერძოდ, იგი ამართლებდა თავდასხმას, ცდილობდა, ძალადობის მსხვერპლი წარმოეჩინა დამნაშავეებად და ხელს აფარებდა თავდამსხმელებს. გარდა ამისა, თითქმის ყველა თავდამსხმელი დაკავშირებულია იმ სპორტ-კლუბთან, რომელსაც უშუალოდ ბ-ნი კალაძის ცოლის ძმა მართავს.
ჩვენს მიერ წარდგენილი დოკუმენტაცია აღნიშნულ კავშირს უტყუარად ადასტურებს:
რუსული სააქციო საზოგადოება "ალფა ბანკის" მხრიდან 31 მაისს გაცემული ოფიციალური წერილების N0978-NRB/017 და N0979-NRB/017 – თანახმად, რომელსაც ხელს აწერს ბანკის მთავარი ფინანსური ოფიცერი მარია შევჩენკო ირკვევა, რომ კრიმინალურმა ავტორიტეტმა დავით ქარსელაძემ, იგივე "კალატოზამ" "ალფა ბანკში" ორი ანგარიში გახსნა კორცხელში "გამოჩენილი" ორი მოძალადის ვლადიმერ გეგეშიძისა და გიორგი გიგაურის სახელზე.
ერთი დოკუმენტის მიხედვით, თავდასხმამდე 4 დღით ადრე, 2016 წლის 17 მაისს, 16 საათსა და 08 წუთზე, "კალა კაპიტალ ლიმიტედისგან" ვლადიმერ გეგეშიძის ანგარიშზე გადაირიცხა 15 000 (თხუთმეტი ათასი) აშშ დოლარი, ხოლო დავით ქარსელაძის, იგივე კალატოზასგან 17 საათსა და 54 წუთზე გადაირიცხა 10 000 (ათი ათასი) აშშ დოლარი.
მეორე დოკუმენტის თანახმად, იმავე დღეს, 16 საათსა და 37 წუთზე, "კალა კაპიტალ ლიმიტედისგან" გიორგი გიგაურის ანგარიშზე გადაირიცხა 10 000 (ათი ათასი) აშშ დოლარი. საზოგადოებას კიდევ ერთხელ შევახსენებთ, რომ დავით ქარსელაძე არის ცნობილი კრიმინალური ავტორიტეტი – ამჟამად რუსეთის მოქალაქე – რომელიც 2000-იან წლებში საქართველოდან რუსეთში გადაბარგდა. მისი ძმა, ასევე ყოფილი მოჭიდავე, ვასილ ქარსელაძე, კახა კალაძის უშუალო ლობირებით სულ ცოტა ხნის წინ აირჩიეს თბილისის ჭიდაობის ფედერაციის პრეზიდენტად და ასევე მონაწილეობს აღნიშნულ დანაშაულებრივ სქემაში. წარმოდგენილი დოკუმენტები მიუთითებენ ვიცე პრემიერ კალაძის უშუალო კავშირზე კრიმინალურ სამყაროსთან და აგრეთვე მის სავარაუდო მონაწილეობაზე კორცხელში ორგანიზებული ძალადობის დაკვეთასთან, ანგარებითი მოტივით.
მიუხედავად იმისა, რომ ჩვენ არ გვაქვს მიუკერძოებელი და სრულფასოვანი გამოძიების იმედი, როგორც კანონმორჩილი მოქალაქეები, საჭიროდ ვთვლით, საზოგადოებას მივაწოდოთ ეს ინფორმაცია და კიდევ ერთხელ მოვუწოდოთ პროკურატურას – დაუყოვნებლივ მოახდინოს რეაგირება, დაადგინოს წარმოდგენილი დოკუმენტების ავთენტურობა და კახა კალაძის შესაძლო მონაწილეობა ზემოაღნიშნულ დანაშაულში", _ განაცხადა ირმა ნადირაშვილმა.
ნადირაშვილმა და კახიძემ პრესკონფერენციაზე ჟურნალისტებს დოკუმენტაცია წარუდგინეს.
"გურია ნიუსი" ეაცადა "კალა კააპიტალს" დაკავშირებოდა, თუმცა, ვებ-გვერდზე მითითებული ნომრიდან "პროგრეს ბანკში" მოვხვდით, სადაც ამტკიცებენ, რომ "კალა კაპიტალთან" შეხება არ აქვთ.
რაც შეეხება "ქართული ოცნება – დემოკრატიული საქართველოს" პოზიციას აღნიშნულ საკითხთან დაკავშირებით, "გურია ნიუსს" პარტიის პრესსამსახურში უთხრეს, რომ თუ განცხადების გაკეთებას გადაწყვეტენ, დაგვიკავშირდებიან.
შენიშვნა:
მოგვიანებით, გავრცელდა ინფორმაცია, რომ "ნაციონალური მოძრაობის" მიერ დღეს გავრცელებული დოკუმენტი გაყალბებულია.
2030 ავრცელებს წერილს, რომელიც "ალფა ბანკიდან" მიიღეს. მასში არნიშნულია, რომ: "თქვენს მიერ ბანკის პრესსამსახურისადმი მიწოდებული დოკუმენტი არის გაყალბებული, ყალბია ასევე ბანკის თანამშრომლის ხელმოწერა. გვსურს ასევე აღვნიშნოთ, რომ დოკუმენტში დაშვებულია უხეში შეცდომები, რომლებიც ბანკის მუშაობის სპეციფიკას ეხება, კერძოდ ანგარიშების გახსნას", _ ნათქვამია "ალფა-ბანკის" პრესსამსახურის განცხადებაში.
