"ოზურგეთის მუნიციპალიტეტის გამგებლის მოვალეობის შემსრულებელს, ბატონ ილია ვაშაყმაძეს:
"ბატონო ილია, შპს "ფიროსმანს" სურვილი აქვს, თავისი წვლილი შეიტანოს ოზურგეთის მუნიციპალიტეტის განვითარებაში და 1 მილიონ 300 ათასი ლარის ფარგლებში განახორციელოს კეთილმოწყობის სამუშაოები, რომლის დამთავრების შემდეგ, შესრულებულ სამუშაოს გადმოგცემთ უსასყიდლოდ.
პატივისცემით, "ფიროსმანის" დირექტორი მ. ბერიძე".
"ნაციონალური მოძრაობის" დროს "გაჩუქებული" სამუშაოს თუ ქონების კიდევ ერთი რეალური ისტორია ასეთია: ზემოთ აღნიშნული განცხადებით, 2012 წლის 2 მარტს, ბიზნესმენმა მერაბ ბერიძემ ოზურგეთის ყოფილ გამგებელს მიმართა, რაზეც ოფიციალურად უმალვე პასუხობს გამგეობა: "არ ვართ წინააღმდეგი და გთხოვთ, ჩაატაროთ ქალაქ ოზურგეთში კეთილმოწყობის სამუშაოები".
ოფიციალური დოკუმენტების საფუძველზე, ქალაქ ოზურგეთში, რუსთაველის ქ. #4-ში მდებარე მრავალბინიანი შენობის, რუსთაველის ქ. # 6 და ჭავჭავაძის ქ. #2 -ში მდებარე შენობის რეაბილიტაცია, ასევე, თეატრის წინა მოედანზე არსებული სკვერის რეკონსტრუქცია, რუსთაველის ქუჩისა და თეატრის ტროტუარების კეთილმოწყობის სამუშაოების ხარჯთაღრიცხვა ასე გამოიყურება: "რუსთაველის ქ. #4-ში მდებარე შენობის რეაბილიტაცია _ 75 232, 70 ლარი; რუსთაველის #6 და ჭავჭავაძის ქ.42-ში მდებარე შენობის რეაბილიტაცია _ 585 784, 51 ლარი; თეატრის წინა მოედანზე არსებული სკვერის რეკონსტრუქციის, რუსთაველის ქუჩისა და თეატრის ტროტუარების კეთილმოწყობა _ 436 911, 05 ლარი. სულ _ 1 307 355, 35 ლარი.
ამის შემდეგ, 2012 წლის 28 სექტემბერს, შპს "ფიროსმანის" დირექტორი მერაბ ბერიძე კვლავ ოფიციალურად მიმართავს ოზურგეთის მუნიციპალიტეტის საკრებულოს თავმჯდომარეს ალეკო მამეშვილს:
"გაცნობებთ, რომ სახელმწიფო რწმუნებულ-გუბერნატორის ადმინისტრაციის მიერ მოწოდებული საპროექტო-სახარჯთაღრიცხვო დოკუმენტაციის საფუძველზე, ოზურგეთის ცენტრში შპს "ფიროსმანმა" განახორციელა სამშენებლო-სამონტაჟო სამუშაოები ერთი მილიონ სამას შვიდი ათასი სამას ორმოცდათხუთმეტი ლარის ოდენობით. გაბარებთ საპროექტო დოკუმენტაციას. გთხოვთ, მიიღოთ უსასყიდლოდ შპს "ფიროსმანისგან" აღნიშნული სამუშაოები".
2012 წლის 28 სექტემბრის მიღება-ჩაბარების აქტით დადგინდა, რომ "ქალაქ ოზურგეთში საცხოვრებელი სახლების რეკონსტრუქციის და პარკის კეთილმოწყობის სამუშაოების მოცულობის დადგენის მიზნით, ერთის მხრივ, ინსპექტირების ჯგუფმა შემდეგი შემადგენლობით: ოზურგეთის მუნიციპალიტეტის გამგეობის ეკონომიკის, ინფრასტრუქტურისა და საინვესტიციო გარემოს განვითარების უფროსმა მერაბ წივწივაძემ, ეკონომიკის, ინფრასტრუქტურისა და გარემოს განვითარების სამსახურის ეკონომიკისა და საინვესტიციო განყოფილების უფროსმა თემურ გიორგაძემ, სპეციალისტმა ზურაბ ვაშალომიძემ, ზედამხედველობის სამსახურის მთავარმა სპეციალისტმა სევერიან საჯაიამ, არქიტექტურისა და ურბანული დაგეგმარების უფროსმა თემურ მურვანიძემ, ა(ა)იპ კეთილმოწყობისა და არქიტექტურული დაგეგმარების ცენტრის დირექტორმა კახა გაგუამ, ოზურგეთის ტერიტორიული ორგანოს ხელმძღვანელმა კახა მეგრელიშვილმა და მეორეს მხრივ, სამუშაოების შემსრულებელმა შპს "ფიროსმანის" დირექტორმა მერაბ ბერიძემ, შეამოწმეს შესრულებული სამუშაოების მოცულობების შესაბამისობა, რომელიც სწორი იყო შედგენილ სახარჯთაღრიცხვო დოკუმენტაციასთან".
ამის შემდეგ, ოზურგეთის მუნიციპალიტეტის გამგებლის მოვალეობის შემსრულებლის კონსტანტინე შარაშენიძის მიერ, 2012 წლის 31 დეკემბერს ხელმოწერილი ბრძანებით და ოფიციალური დოკუმენტებით დასტურდება, რომ "შპს ფიროსმანმა" 2012 წლის 5 მარტის #306 წერილის საფუძველზე, ბალანსიდან ბალანსზე მუნიციპალიტეტს გადმოსცა უვადოდ, უსასყიდლოდ საკუთრებაში რუსთაველის ქ.#4 არსებული შენობის (ღირებულებით _ 75 232, 70 ლარი) და თეატრის წინა მოედანზე არსებული (ღირებულებით _ 436911,0 5ლარი) სამშენებლო-სამონტაჟო სამუშაოები და რუსთაველის ქ.# 2-ში მდებარე შენობაზე მე-5 სართულის დაშენება (ღირებულებით _ 595784,54, საერთო ღირებულებით _1 307 355, 35 ლარი).
საჯარო ინფორმაციებს ამ გასაიდუმლოებული მშენებლობის შესახებ "გურია ნიუსი" 2012 წლიდან ითხოვს, თუმცა, ის ჩვენთვის ხელმისაწვდომი ახლა გახდა.
აქ მცხოვრები მოსახლეობა "გურია ნიუსს" 3 წლის განმავლობაში სთხოვდა დახმარებას, "გურია ნიუსიც" აქტიურად აშუქებდა მათ პრობლემებს:
"გაგვაგებინეთ, ბოლოს და ბოლოს, ვინაა პასუხისმგებელი ოზურგეთში, რუსთაველის ქუჩა N6 მდებარე საცხოვრებელი ბინის სარემონტო სამუშაოებზე? მიატოვეს რემონტი, დაგვტოვეს უპატრონოდ, განადგურებული, დაზიანებული ბინების შემყურე, სადაც ისე წვიმს, როგორც გარეთ. იქნებ თქვენ, ჟურნალისტებმა შეძლოთ ჩვენი დახმარება! გააკეთეს "გუმბათი", სადაც მილიონი ლარი იქნება დახარჯული და კაცმა არ იცის, ვისია _ წყალი ჩანჩქერივით ჩამოდის. ბევრს ახალგარემონტებული ბინები ჰქონდა და მთლად გაუნადგურდა ყველაფერი. ჩვენ ხომ ვერ შევძლებთ სახურავის შეკეთებას, არადა, ჭერი საერთოდ ჩამოგვენგრა. დაგვტოვეს და წავიდნენ. არ ვიცით, ვის მივმართოთ, ვინ უნდა გააკეთოს, პასუხს ვერავინ გვცემს", _ ამბობდა მოსახლეობა.
რა მდგომარეობაა ახლა აღნიშნულ ბინაში და აპირებს თუ არა სახელმწიფო, დაუბრუნოს ქონება იმ კომპანიას, რომელმაც "აჩუქა" ოზურგეთის მუნიციპალიტეტს 1 მილიონ 300 ათასი ლარის ფარგლებში გახორციელებული კეთილმოწყობითი სამუშაოები? ამ საკითხზე ქალაქ ოზურგეთის მერი ბეგლარ სიორიძე ამბობს, რომ "რუსთაველის ქუჩის #2-ში მდებარე მრავალბინიან შენობაზე დაშენებულ მე-5 სართულთან დაკავშირებით, ქალაქის მერიამ ეკონომიკის სამინისტროს უკვე მიმართა. როგორც კი ეკონომიკის სამინისტრო ხსენებულ ფართს მუნიციპალიტეტს გადმოსცემს, ის ოზურგეთელ, უნიჭიერეს მხატვარს ქალბატონ მარინა უჯმაჯურიძეს გადაეცემა სახელოსნოს მოსაწყობად".
რაც შეეხება აღნიშნულ ბინას, ქალაქ ოზურგეთის მერიამ აქ სარემონტო სამუშაოები განახორციელა.
