"საერთაშორისო გამჭვირვალობა-საქართველო" 2014-2016 წლებში სამეგრელო-ზემო სვანეთში რელიგიური ორგანიზაციებისათვის გადაცემული ქონებისა და თანხების შესახებ მორიგ კვლევას აქვეყნებს, სადაც აღნიშნულია, რომ რეგიონის ათივე მუნიციპალიტეტმა ფინანსური დახმარება მხოლოდ საქართველოს მართლმადიდებელ ავტოკეფალურ ეკლესიას გაუწია და გაცემული თანხის ჯამურმა ოდენობამ 1 267 604,3 ლარი შეადგინა.
"გურია ნიუსი" ორგანიზაციის კვლევას უცვლელად გთავაზობთ:
"საერთაშორისო გამჭვირვალობა-საქართველო" პერიოდულად აქვეყნებს ინფორმაციას სახელმწიფო და ადგილობრივი თვითმმართველობის ბიუჯეტიდან რელიგიური ორგანიზაციების დაფინანსების, მათთან დაკავშირებული ბიზნესკომპანიებისა და მათთვის გადაცემული ქონების შესახებ.
ამჯერად წარმოგიდგენთ ინფორმაციას, თუ რა მოცულობის თანხა მიიღეს რელიგიურმა ორგანიზაციებმა სამეგრელო-ზემო სვანეთის რეგიონში მუნიციპალიტეტებისაგან და ასევე, რა სახის ქონება გადაეცათ სახელმწიფო ქონების ეროვნული სააგენტოდან. კვლევა მოიცავს პერიოდს 2014 წლის 1 იანვრიდან 2016 წლის ივლისის ჩათვლით.
როგორც მიღებული ინფორმაციით დგინდება:
-
სამეგრელო-ზემო სვანეთის ათივე მუნიციპალიტეტმა ფინანსური დახმარება მხოლოდ საქართველოს მართლმადიდებელ ავტოკეფალურ ეკლესიას გაუწია;
-
მუნიციპალიტეტების მიერ გაცემული თანხის ჯამურმა ოდენობამ 1 267 604,3 ლარი შეადგინა;
-
სახელმწიფომ უძრავი ქონება (მიწის ნაკვეთები და შენობა-ნაგებობები) საკვლევ პერიოდში მართლმადიდებლურ ეკლესიასა და საქართველოს ებრაელთა კავშირს გადასცა (სინაგოგები მარტვილსა და სენაკში);
-
სახელმწიფო ქონების ეროვნული სააგენტომ საქართველოს მართლმადიდებელ ეკლესიას ქონება საკუთრებაში გადასცა, საქართველოს ებრაელთა კავშირს კი სარგებლობის უფლებით.
სამეგრელო-ზემო სვანეთში რელიგიური ორგანიზაციებისათვის გადაცემული ქონება
-
საქართველოს მთავრობის 2014 წლის 13 იანვრის განკარგულებით საქართველოს მართლმადიდებელ ეკლესიას სიმბოლურ ფასად – 1 ლარად პირდაპირი მიყიდვის გზით, გადაეცა ქალაქ ფოთში, ნავსადგურის სარეჟიმო ტერიტორიაზე მდებარე ორი მიწის ნაკვეთი (ს/კ N04.01.07.604 ს/კ N04.01.07.603) და მასზე არსებული 2 შენობა-ნაგებობა. როგორ საქართველოს კათოლიკოს-პატრიარქის ქორეპისკოპოს მიტროპოლიტ თეოდორეს მიერ ეკონომიკის სამინისტროსთვის 2013 წლის ნოემბერში გაგზავნილი წერილის თანადართულ დოკუმენტებშიაგანმარტებული, ეკლესიამ აღნიშნული ქონების გადაცემა იმ მიზეზით მოითხოვა, რომ ფოთის ნავსადგურის ტერიტორიაზე საკონტეინერო ტერმინალის აშენების შედეგად იკეტებოდა ამავე ტერიტორიაზე მდებარე ეკლესიამდე მისასვლელი გზა.
-
სახელმწიფო ქონების ეროვნულმა სააგენტომ 2015 წლის მაისში "საქართველოს ებრაელთა კავშირს" მარტვილის მუნიციპალიტეტის სოფელ ბანძაში და ქალაქ სენაკში მდებარე სინაგოგები სარგებლობის უფლებით გადასცა .
გარდა ზემოაღნიშნულისა, სახელმწიფო ქონების ეროვნულ სააგენტოს 2014-2016 წლებში საქართველოს საპატრიარქოსგან გაეგზავნა ხუთი წერილი რამდენიმე სხვა ქონების გადაცემის მოთხოვნით, თუმცა მოთხოვნილი მიწები დღემდე სახელმწიფო საკუთრებაშია:
-
ხობის მუნიციპალიტეტის სოფელ პირველ მაისში მდებარე 12 414 კვ.მ. მიწა და მასზე განთავსებული შენობა-ნაგებობები. როგორც სააგენტოსთვის მიერ გაგზავნილ წერილშიააღნიშნული, მიწაზე ფოთისა და ხობის ეპარქიას ზოგადსაგანმანათლებლო სკოლის გახსნა აქვს დაგეგმილი;
-
ჩხოროწყუს მუნიციპალიტეტის სოფელ ნაფიჩხოვოში მდებარე 8 300 კვ.მ. მიწის ტაძრის მშენებლობისათვის;
-
ზუგდიდის მუნიციპალიტეტის სოფელ რუხში მდებარე სასოფლო-სამეურნეო დანიშნულების მიწა(1 44 867 კვ.მ.), კათოლიკოს-პარტიარქის ქორეპისკოპოსის მიერ 2015 წლის ნოემბერში ქონების ეროვნული სააგენტოსთვის გაგზავნილ წერილში არ არის განმარტებული, თუ რა მიზნით ითხოვს ეპარქია აღნიშნულ ტერიტორიას;
-
არც ისაა განმარტებული, თუ რა მიზნით მოითხოვა საპატრიარქომ მარტვილის მუნიციპალიტეტის სოფელ ინჩხურში არსებული 7 797 კვ.მ. მიწის გადაცემა;
-
სენაკის მუნიციპალიტეტის სოფელ ნოქალაქევში მდებარე ყოფილი სასწავლო დაწესებულება და მიმდებარე ტერიტორია (10 342 კვ.მ.) ახალგაზრდებისა და სოციალურად დაუცველი ბავშვებისთვის სკოლა-ბანაკის მოსაწყობად;
სამეგრელო-ზემო სვანეთის რეგიონის მუნიციპალიტეტების მიერ მართლმადიდებლური ეკლესიებისთვის გადაცემული თანხები
ქალაქი ზუგდიდი
ქალაქ ზუგდიდის მუნიციპალიტეტმა 2014 წლიდან 2016 წლის ივლისის რელიგიური დღესასწაულების აღნიშვნასა და ეკლესია-მონასტრების რეკონსტრუქცია-მშენებლობაზე სულ 329 896 ლარი დახარჯა, კერძოდ:
-
ვლაქერნობის დღესასწაულის აღნიშვნა – 29 996 ლარი
-
საკათედრო ტაძრის მშენებლობისათვის – 279 900 ლარი
-
ზუგდიდში, თამარ მეფის ქუჩაზე მდებარე ეკლესიის მშენებლობისათვის – 20 000 ლარი
თემი ზუგდიდი
თემი ზუგდიდის მუნიციპალიტეტის ბიუჯეტიდან საკვლევი პერიოდის განმავლობაში, "რელიგიის ხელშეწყობის მიზნით", თანხა სამჯერ გაიცა – 2015 წელს ვლაქერნობის დღესასწაულთან დაკავშირებით 9 599.3 ლარი და ამავე დღეს საზეიმო მსვლელობის ბაირაღების შესაძენად 400 ლარი, 2016 წელსაც ვლაქერნობის დღესასწაულთან დაკავშირებით მოწვეული სტუმრებისთვის სადღესასწაულო სადილის მოსაწყობად 10 000 ლარი.
ხობი
ხობის მუნიციპალიტეტის მიერ 2014 წლიდან 2016 წლის ივლისის ჩათვლით, სულ 15 500 ლარი იქნა გახარჯული, თანხა ხობის წმინდა სამების ეკლესიის რეაბილიტაციისა და ნოჯიხევის მონასტრის ელექტროენერგიის ხარჯების ასანაზღაურებლად გამოიყო.
სენაკი
სენაკის მუნიციპალიტეტმა 2014 წლის სექტემბერში საპატრიარქოს დაქვემდებარებაში არსებული წმინდა ალექსი შუშანიას სახელობის სკოლა-გიმნაზიის რეაბილიტაციისათვის ადგილობრივი ბიუჯეტიდან 65 000 ლარი გამოყო.
აბაშა
აბაშის მუნიციპალიტეტის მიერ რელიგიური ორგანიზაციებისათვის გამოყოფილმა თანხამ 132 000 ლარი შეადგინა, კერძოდ:
-
2014 წელს 50 ათასი ლარით დაფინანსდა საქართველოს მართლმადიდებელი ეკლესიის ჭყონდიდის ეპარქიის ეკლესია-მონასტრების რეაბილიტაციის მიზნით;
-
2015 წელს ასევე 50 ათასი ლარით დაფინანსდა ქალაქ აბაშაში მდებარე საკათედრო ტაძრის საკვირაო და სამრევლო სკოლის შენობის კეთილმოწყობის სამუშაოები;
-
2016 წელს კი ადგილობრივი ბიუჯეტიდან 2 000 ლარი იქნა გამოყოფილი 6 მაისს, გიორგობის დღესასწაულზე ჩამოსული სტუმრების სადილით გამასპინძლებისათვის.
ფოთი
ქალაქ ფოთის მუნიციპალიტეტის ბიუჯეტიდან საკვლევი პერიოდის განმავლობაში ფოთის საკათედრო ტაძრის სარეაბილიტაციო სამუშაოებისათვის 280 563.35 ლარი იქნა გამოყოფილი, კერძოდ:
-
2014 წელს – 36 741.08 ლარი
-
2015 წელს – 138 267.45 ლარი
-
2016 წელს – 105 554,85 ლარია დახარჯული.
ჩხოროწყუ
ჩხოროწყუს მუნიციპალიტეტმა 2014 წელს სენაკი-ჩხოროწყუს ეპარქიას გამოუყო 40 000 ლარი ჩხოროწყუში დავით აღმაშენებლის სახელობის ტაძრის მშენებლობისათვის.
წალენჯიხა
წალენჯიხის მუნიციპალიტეტმა 2014 წლიდან 2016 წლის ივლისის ჩათვლით მუნიციპალიტეტის ტერიტორიაზე მდებარე რამდენიმე ეკლესია-მონასტრისათვის ბიუჯეტიდან ჯამში 67 507.35 ლარი გამოყო, კერძოდ:
-
2014 წელს – 23 500 ლარი
-
2015 წელს – 15 007.35 ლარი
-
2016 წელს – 29 000 ლარი
მარტვილი
მარტვილის მუნიციპალიტეტის ბიუჯეტიდან ჭყონდიდის ეპარქიამ საკვლევი პერიოდის განმავლობაში 115 000 ლარი მიიღო – 2014 წელს 40 000 ლარი, 2015 წელს 50 000 ლარი, 2016 წელს კი 25 000 ლარი. თუ რა კონკრეტული საქონელი ან მომსახურების გაწევა იქნა დაფინანსებული, მარტვილის გამგეობის მიერ გამოგზავნილ პასუხში არ არის აღნიშნული.
მესტია
მესტიის მუნიციპალიტეტმა 2014 წლიდან 2016 წლის ივლისის ჩათვლით, 231 141 ლარი გამოყო:
-
2014 წელს მესტიის მამათა მონასტრისა და სოფელ კალის ეკლესიის კელიების მშენებლობისათვის გამოყოფილმა დაფინანსებამ 66 600 ლარი შეადგინა, უშგულის ლამარიას მამათა მონასტერს 2 986 ლარი გამოეყო, სოფელ ნაკიფარის ეკლესიის შემოსაღობად კი 14 250 ლარი დაიხარჯა;
-
2015 წელს მესტიისა და ზემო სვანეთის საეკლესიო საზოგადოების კავშირ "აღორძინებასა" და მესტიაში წმინდა ილია წინასწარმეტყველის სახელობის დედათა სამონასტრო კომპლექსის დამატებითი კელიების მშენებლობისთვის 60 000 ლარი გამოიყო, სოფელ ცხუმარში სვიფის წმინდა მაცხოვრის სახელობის ეკლესიას 7 305 ლარი გადაეცა სამშენებლო მასალების შესაძენად
-
2016 წელს 20 000 ლარით დაფინანსდა მესტიის, წმინდა ილია თეზბიტელის მონასტერში ცენტრალური გათბობის მონტაჟის სამუშაოები, ასევე 60 000 ლარი იქნა გამოყოფილი მესტიის საეპისკოპოსო რეზიდენციის სარეაბილიტაციო სამუშაოებისათვის", _ აღნიშნულია ორგანიზაციის კვლევაში.
