ისტორიის მანძილზე პირველად, ბახმარომ უცხოელ ტურისტებს ზამთარში უმასპინძლა. თვეზე მეტია, ტურისტები კურორტზე თოვლის ხარისხს სწავლობენ. იანვარ-თებერვალში კურორტი კიდევ 60-მდე უცხოელ ტურისტს მიიღებს, რომელთა დასახვედრად მზადება უკვე დაწყებულია. კურორტზე დაწყებული სხვადასხვა სამუშაოები და არსებული სიტუაცია, გასულ კვირას გურიის გუბერნატორის მოადგილემ სოსო ერქომაიშვილმა და ჩოხატაურის მუნიციპალიტეტის საკრებულოს თავმჯდომარემ ზაალ მამალაძემ მოინახულეს.
_ საკმაოდ დიდი ხანია კურორტზე ინვესტორი და ტურისტები იმყოფებიან, რომელთა მონახულება, სიტუაციის გაცნობა ჩვენი ვალდებულებაა. ამასთან ერთად ტურისტების 60-კაციან ჯგუფს კიდევ ველოდებით და მოსამზადებელი სამუშაოებიც მოვინახულეთ, მოვისმინეთ იქ მყოფების შთაბეჭდილებები. სტუმრებს თოვლის ხარისხი ძალიან მოეწონათ და როგორც აღნიშნეს, არა მარტო ევროპის, არამედ მსოფლიოს მასშტაბით საუკეთესოა "ბურანებისა" და სკუტერებისთვის. ერთადერთი პრობლემა ისაა, რომ სახლები ზამთრისთვის არ არის ადაპტირებული _ ღამით ტემპერატურა -15 გრადუსია და გათბობა რთულია, _ აღნიშნა ჩვენთან საუბრისას ზაალ მამალაძემ.
მისივე ინფორმაციით, აქტიურად მიმდინარეობს სამუშაოები ბახმაროს ინფრასტრუქტურის განვითარებისთვის:
_ ჩოხატაურის საკრებულოში უკვე შემოვიდა ბახმაროს მიწათსარგებლობის გენერალური გეგმის პირველი ეტაპის დოკუმენტაცია. ეს გეგმა "არტ სტუდიომ" გააკეთა _ კომპანიამ, რომელმაც ეკონომიკის სამინისტროს მიერ გამოცხადებულ ტენდერში გაიმარჯვა. დოკუმენტის პირველი ეტაპი კვლევას და ხედვას მოიცავს. ყველანაირი კვლევაა ჩატარებული _ გარემოზე ზემოქმედების, ეკოლოგიური, საკუთრების, როგორც სახელმწიფო, ასევე მუნიციპალური და კერძო.
ამავე დოკუმენტში საუბარია რისკებზე, წყლის რესურსებზე, ელექტროენერგიაზე, ბუნებრივ აირზე. ამ კვლევის საფუძველზე კი დადებულია ხედვა ბახმაროს სამთო სათხილამურო ინფრასტრუქტურის დაგეგმვასთან დაკავშირებით. ამ კვლევის თანახმად, პირველ ეტაპზე 36 ადვილად მოსაწყობი, ნაკლებად ხარჯიანი სათხილამურო ტრასის მოწყობაა შესაძლებელი _ ესაა ძირითადად ჩრდილოეთი ფერდობები, რომლის საერთო ფართობი 75 ჰექტარია. ეს იქნება 35-დამ 60 მეტრამდე სიგანის სათხილამურო ტრასა.
დოკუმენტში ასევე განსაზღვრულია რამდენიმე საბაზო სადგურის გაკეთება, საიდანაც საბაგირო უნდა წავიდეს. სამ კატეგორიად დაიყოფა _ დამწყებებისთვის, საშუალო დონისთვის და პროფესიონალი მოთხილამურეებისთვის, _ აღნიშნა "გურია ნიუსთან" საუბრისას ზაალ მამალაძემ.
მისივე თქმით, დოკუმენტს საკრებულო მალე დაამტკიცებს და გადაიგზავნება ეკონომიკის სამინისტროში, რომელიც შემდეგ დაიწყება მეორე ეტაპი, რაც ხარჯთაღრიცხვას ითვალისწინებს:
_ მას შემდეგ, რაც ჩვენს მიერ მიღებული დოკუმენტი სამინისტროში გაიგზავნება, გვეცოდინება რა დაჯდება კურორტის ინფრასტრუქტურის განვითარება, როგორც ზამთრისთვის, ასევე ზაფხულისთვის. ამის შემდეგ კი ცენტრალურ ბიუჯეტში ჩაიდება საჭირო თანხები, _ ამბობს ზაალ მამალაძე, რომელსაც იმედი აქვს, რომ კურორტის ინფრასტრუქტურის მოწესრიგება მალე მოხდება.
ამის იმედი როგორც ადგილობრივ, ასევე უცხოელ ტურისტებსაც აქვთ, რომლებიც ჩვენთან საუბრისას ბახმაროს იმ უნიკალურ თვისებებზე ამახვილებენ ყურადღებას, რითაც იგი გამოირჩევა და რაც აქამდე ბევრისთვის უცნობი იყო.
