რუსული გაზის საქართველოში შემოსვლას მკვეთრად აპროტესტებს საზოგადოება, სამოქლაქო სექტორი, საპარლამენტო და არასაპარლამენტო ოპოზიცია. საზოგადოება ენერგეტიკის მინისტრის კახა კალაძის განმარტებებს არ სჯერდება და ხელშეკრულების გასაჯაროებას ითხოვს.
„გაზპრომის“ საქართველოში შემოსვლას ეროვნულ საფრთხედ აღიქვამს „ნაციონალური მოძრაობის“ წევრი პეტრე ცისკარიშვილი და აცხადებს, რომ საქართველოში რუსული გაზის შემოსვლა უკვე დაწყებულია _ 2015 წლიდან რუსული გაზი საქართველოში „ჯეოტრანსგაზს“ შემოაქვს, თუმცა, ხელისუფლება ამაზე დუმს.
"რატომ არის აუცილებელი რუსეთისგან გაზის შემოტანა, დაწყებული იქიდან, რომ აზერბაიჯანული გაზი ძვირია, რაც სინამდვილეში ტყუილია, დასრულებული იმით, რომ ტექნიკურად არ აქვს თურმე აზერბაიჯანს საქართველოსთვის დამატებითი გაზის მოწოდების საშუალება, რაც, ასევე, ტყუილი აღმოჩნდა. გუშინ გავრცელდა ინფორმაცია, აბსოლუტურად შემთხვევით, ერთ-ერთი კომპანიისგან, რომელმაც თვითონ გააკეთა განცხადება და თავი წარმოაჩინა. ბოლო პერიოდის განმავლობაში ეს კომპანია აშკარად იმალებოდა და საზოგადოებამ არ იცოდა ამ კომპანიის არსებობის შესახებ – ეს არის "ჯეოტრანსგაზი", რომელსაც თურმე 2015 წლიდან მოყოლებული, ანუ რამდენიმე თვის განმავლობაში, რუსეთიდან, კერძოდ "გაზპრომიდან" უკვე შემოაქვს გაზი", _ განაცხადა ცისკარიშვილმა.
პარლამენტში უკვე მზად არის „ნაციონალური მოძრაობის“ მიერ მომზადებული რეზოლუციის პროექტი, სადაც ავტორები „გაზპრომთან“ მიღწეული შეთანხმების გამო, მთავრობის პასუხისმგებლობის დაყენებას ითხოვენ.
გაზის ტრანზიტის გადახდის ფორმის შეცვლას საფრთხისშემცველად მიიჩნევენ „საქართველოს პატრიოტებიც“, რომლებიც კახა კალაძეს პარლამენტში მისვლისკენ და ხელშეკრულების გასაჯაროებისკენ მოუწოდებენ.
აზერბაიჯანული გაზის 50% ირანული გაზით ჩანაცვლება შეშფოთების საგანი გახდა არასამთავრობო სექტორისთვისაც, რომელიც, ასევე, „გაზპრომთან“ დადებული ხელშეკრულების გასაჯაროვებას ითხოვს და მიმართვსაც აქვეყნებს, რომელსაც 80-მდე არასამთავრობო ორგანიზაცია უკვე შეუერთდა.
„გასული ორი თვის მანძილზე, პრესაში გავრცელებული ინფორმაციის თანახმად, გრძელდება ბატონი კალაძის შეხვედრები გაზპრომის სხვადასხვა წარმომადგენელთან. პრესაში ვრცელდება, ასევე, ინფორმაცია იმ ხელშეკრულების შესახებ, რომლის მიხედვითაც საქართველოს მიერ წლიურად მოხმარებული აზერბაიჯანული გაზის 50% ირანული გაზით ჩანაცვლდება, რომელიც ქვეყანაში სომხეთის გავლით, "გაზპრომის" საკუთრებაში მყოფი მილსადენის საშუალებით შემოვა. შეშფოთებული ვართ გავრცელებული ინფორმაციით… ქართულ ბაზარზე გაზპრომის რაიმე ფორმით დაბრუნება და ამით მისთვის საქართველოს პოლიტიკაზე გავლენის სერიოზული ბერკეტის გადაცემა სრულიად დაუშვებლად მიგვაჩნია, რადგან ეს ზიანს მიაყენებს როგორც საქართველოს უსაფრთხოებას და სასიცოცხლო ინტერესებს", _ ნათქვამია განცხადებაში, რომელსაც ხელს აწერენ "საერთაშორისო გამჭვირვალობა – საქართველო", "საქართველოს ეკონომიკური განვითარების ცენტრი", "საქართველოს ატლანტიკური საბჭო", "სამოქალაქო განვითარების სააგენტო", "ეკონომიკური პოლიტიკის კვლევის ცენტრი", "საქართველოს რეფორმების ასოციაცია", "დემოკრატიისა და ევრო-ატლანტიკური კვლევების ინსტიტუტი", "საქართველოს სტრატეგიისა და საერთაშორისო კვლევების ფონდი (GFSIS)", "სამოქალაქო საბჭო თავდაცვისა და უსაფრთხოების საკითხებში", "საზოგადოებრივი მოძრაობა ივერია", "სტრატეგიული კომუნიკაციის და დემოკრატიის ცენტრი", "Georgian review" და "საქართველოს დემოკრატიული ინიციატივა".
