კიევში დაკავებულ ვიცე-პოლკოვნიკ გიორგი ცერცვაძესთან დაკავშირებით, შს სამინისტრო სპეციალურ განმარტებას აკეთებს. და აღიშნავს, რომ ვინაიდან, რუსეთსა და საქართველოს შორის არ ხდება პირდაპირი კომუნიკაცია, ქართული მხარე ამ საქმესთან დაკავშირებით, რაიმე ოფიციალურ ინფორმაციას არ ფლობს.
საქართველოს კონსტიტუციის მე-13 მუხლის მე-4 პუნქტის თანახმად კი, საქართველოს მოქალაქის უცხო სახელმწიფოსათვის გადაცემა დაუშვებელია.
„ინტერპოლით ძებნილი საქართველოს მოქალაქის საქართველოს ტერიტორიაზე დასაკავებლად, იმ ქვეყნის კომპეტენტურ ორგანოს, რომლის ტერიტორიაზეც მოხდა დანაშაულის ჩადენა, უნდა გადმოეგზავნა სისხლის სამართლის საქმის მასალები საქართველოს შესაბამის ორგანოებში შემდგომი რეაგირებისთვის. ამ კონკრეტულ შემთხვევაში, აღნიშნული კომუნიკაცია არ შემდგარა, ვინაიდან, როგორც ზემოთ აღინიშნა, საქართველოსა და რუსეთს შორის საპოლიციო თანამშრომლობა არ ხორციელდება. ამდენად, ქართულ მხარეს არც საკმარისი ინფორმაცია, არც საფუძველი და არც არავითარი მოტივი არ ჰქონდა ზემოთ აღნიშნული პირის დაკავებისთვის ან მისთვის თავისუფალი გადაადგილების შესაძლებლობის შეზღუდვისთვის,-ნათქვამია შს სამინისტროდ განმარტებაში.
შეგახსენებთ, რუსეთის ფედერაციის სპეცსამსახურებისა და პროკურატურის მოთხოვნის საფუძველზე, კიევის ჟულიანის აეროპორტში, საქართველოს შს სამინისტროს განსაკუთრებულ დავალებათა დეპარტამენტის შიდა ქართლის სამმართველოს უფროსის ყოფილი მოადგილე, პოლიციის ვიცე-პოლკოვნიკი გიორგი ცერცვაძე დააკავეს.
რუსეთის მხარე ცერცვაძეს ბრალად 2003 წელს რუსეთში მომხდარ ჯგუფურ მკვლელობას უყენებს და მის გადაცემას მოითხოვს, უკრაინის მხარე დამატებითი მტკიცებულებების წარდგენას ითხოვს.
ბოლო პერიოდშ ვიცე-პოლკოვნიკი გიორგი ცერცვაძე აქტიურად მონაწილეობდა უკრაინის დონეცკის ოლქში რუსეთის საჯარისო ნაწილების წინააღმდეგ საბრძოლო მოქმედებებში.მონაწილეობა აქვს მიღებული საქართველოს ტერიტორიული მთლიანობისთვის ბრძოლებში აფხაზეთსა და შიდა ქართლში, ასევე აქტიურად მონაწილეობდა 2008 წელს რუსეთ-საქართველოს კონფლიქტში.
საზოგადოების ნაწილი საქართველოს მთავრობას ვიცე-პოლკოვნიკ ცერცვაძის დაცვას სთხოვს.
"თუ გია ცერცვაძე გადაეცემა რუსეთს, ეს ნიშნავს იმას, რომ დავსრულდით და ბოლომდე აგვყრია ღირსების გრძნობა ! ეს ნიშნავს იმას, რომ დიდგორის ველზე ვდგამთ საქონლის ფერმას და სვეტიცხოველს ვაქცევთ სასტუმროდ. ეს ნიშნავს იმას, რომ ვკლავთ ლეგენდად ქცეულ ქართველ დედას, 9 ძმა ხერხეულიძის დედას! ეს ნიშნავს იმას, რომ ერეკლეს ავადმომუსაიფე ხმალს ვაბარებთ ჯართში. აღარ გავაგრძელებ, ვფიქრობ ისედაც ნათელია ეს ყველაფერი თქვენთვისაც და მოგიწოდებთ ქმედითი ნაბიჯების გადადგმისკენ", _ პოლიტიკური გაერთიანება ,,რეფორმატორების'' თავმჯდომარმ ირაკლი ღლონტმა ასეთი შინაარსის ღია წერილით მიმართა საქართველოს პრემიერს.
საპარლამენტო უმცირესობა კი თავდებში უდგება გიორგი ცერცვაძეს და ხელისუფლებას ქმედითი ნაბიჯების გადადგმისკენ მოუწოდებს,
განსხვავებული აზრი გააჟღერა საპარლამენტო უმრავლესობის წევრმა ზაქარია ქუცნაშვილმა. მისი განმარტებით, მან არ იცის ბრალი რაში ედება ცერცვაძეს, მაგრამ აფხაზეთსა და უკრაინაშ ბრძლა ინდულგენცია არ უნდა იყოს.
"არ ვიცი, გია ცერცვაძეს რაში დებენ ბრალს ეს არ ვიცი. არ შეიძლება იყოს აფხაზეთში ბრძოლა ან უკრაინაში ბრძოლა ინდულგენცია. ეს არ არის რაღაცისგან პასუხისმგებლობის თავის არიდების საშუალება.
ოთხოზორიას მკვლელიც იბრძოდა აფხაზეთში. ამ საბაბით არ გადმოგვცეს აფხაზებმა მკვლელობის ჩადენაში ეჭვმიტანილი პირი… რუსეთთან მკვლელების ნაწილში, მე ვფიქრობ, რომ უნდა ვითანამშრომლოთ", _ განაცხადა ზაქარია ქუცნაშვილმა.
