ამავე კომიტეტის პრესამსახურის წარმომადგენლის, გურანდა გურასაშვილის თქმით: “ვებგვერდი დაინტერესებულებს გააცნობს გურიის როგორც წარსულ, ასევე მიმდინარე სპორტულ მიღწევებს. ნახავთ გურიის წარმატებული სპორტსმენების ბიოგრაფიებს და გაეცნობით მათ მიერ მიღწეულ შედეგებს.”
გურიის მხარის ოლიმპიური კომიტეტის პრეზიდენტი ლაშა ლომაძე ოზურგეთის, ლანჩხუთისა და ჩოხატაურის წარმატებულ და პერსპექტიულ სპორტსმენებს მათთვის საჭირო ვიტამინებით უზრუნველყოფს, ასევე მათ გადაეცემათ ახალი ეკიპირება.
გურანდა გურასაშვილმა ახალი სპორტ-კომპლექსის მშენებლობის მაკეტი წარმოადგინა სლაიდებით მეშვეობით. მისი თქმით, ეს კომპლექსი სპორტის სხვადასხვა სახეობებს გააერთიანებს. იქვე იქნება ოლიმპიური კომიტეტის ოფისიც.
შეხვედრას ადგილობრივი ხელისუფლების წარმომადგენლები და თბილისიდან მოწვეული სტუმრები ესწრებოდნენ.
კომიტეტის შეხვედრაზე რამდენიმე სიმღერა “ნიჭიერის” ფინალისტმა “ლურჯმა იალქანმა” შეასრულა. ერთ-ერთ სიმღერას “ოცნება” ერქვა. როდესაც სიმღერის სახელწოდება გამოაცხადდა ჯგუფის სოლისტმა, დარბაზში ჩუმი სიცილი გაისმა, გაეღიმა დარბაზში მყოფ ალეკო მამეშვილს, ოზურგეთის მუნიციპალიტეტის საკრებულოს თავმჯდომარეს, ოზურგეთის მუნიციპალიტეტის გამგებლის მოვალეობის შემსრულებელ ილია ვაშაყმაძეს და სხვა საჯარო მოხელეებს, რომლებიც იქ იმყოფებოდნენ.
ოზურგეთის მუნიციპალიტეტის საკრებულოს თავმჯდომარე დარბაზში მყოფ საზოგადოებას სიტყვითაც მიმართა. არ არის გამორიცხული, რომ სწორედ ეს ადამიანი, ცოტა ხანში საპარლამენტო არჩევნებში ჩაერთოს, როგორც “ერთიანი ნაციონალური მოძრაობის” დეპუტატობის კანდიდატი.
_ ძალიან მნიშვნელოვანი დღე არის ოზურგეთისა და სრულიად გურიის ყოფა-ცხოვრებაში, დღეს გურიის ოლიმპიურმა კომიტეტმა შეკრიბა ასობით სპორტსმენი და მათი მხარდამჭერები თეატრში მოგვიწვია. ინფორმაციის სახით მინდა გითხრათ, რომ ოზურგეთში 1000-მდე ახალგაზრდაა დაკავებული სპორტის სხვადასხვა სახეობებში, ჩვენი ადგილობრივი და რეგიონალური ხელისუფლების მოვალეობაა ის, რომ ყველა სპორტით დაინტერესებულ ახალგაზრდას ხელი შევუწყოთ. ოზურგეთის სასპორტო სკოლის კაპიტალური რემონტი არის დაგეგმილი და დარწმუნებული ვარ, ამის შემდეგ უფრო მეტი ახალგაზრდა დაინტერესდება სპორტის სხვადასხვა სახეობით. სულ რამდენი დღე და დაიწყება ლონდონის ოლიმპიური თამაშები, მინდა საქართველოს ყველა ოლიმპიელს ვუსურვო წარმატებები, _ თქვა ალეკო მამეშვილმა.
