“გურია ნიუსი” დაინტერესდა, იყო თუ არა კმაყოფილი მიმდინარე სამუშაოებით მინისტრი და მოხდება თუ არა მისი ოზურგეთის მაჟორიტარ კანდიდატად წარდგენა 1 სექტემბერს, რომელსაც უშუალოდ პრეზიდენტი მიხეილ სააკაშვილი დაესწრება.
ინტერვიუს მინისტრთან და ნაციონალების სავარაუდო კანდიდატთან სტილის დაცვით, სრულად გთავაზობთ.
_ გამარჯობათ, ბატონო რამაზ!
_მოგესალმებით ქალბატონო ჟანა, როგორც ყოველთვის მომხიბვლელად გამოიყურებით…
_ ვაი, მადლობა!
_ ვაიმე რატომ? არ გჯერა? მე რასაც ვამბობ, ყოველთვის გულწრფელი ვარ, გულწრფელად ასე ვფიქრობ და მართლა ვამბობ, შენ არ გჯერა თორემ…
_ ბატონო რამაზ, ახლა თეატრალურ მოედანზე მიმდინარე სამუშაოები მოინახულეთ, როგორც ვხედავთ, სამუშაოები ჩქარი ტემპით მიმდინარეობს…
_ კი…
_ ალბათ, პირველ სექტემბრამდე უნდა დასრულდეს, რადგან ინფორმაცია გვაქვს, რომ ამ დღეს პრეზიდენტი ჩამოდის და სწორედ აქ მოხდება თქვენი წარდგენა…
_ მართლა?! თქვენ ჩემზე მეტი გცოდნიათ. მაგარია, თუ ეგრე მოხდება, მე გამიხარდება ძაან. თქვენ არა? თქვენ ამ ქალაქში არ ცხოვრობთ? წამოდით, ბაღი ერთად ვნახოთ, ხომ ლამაზია? ისიამოვნეთ, ეს ხომ კეთდება, ეს ხომ ძაან მაგარია ოზურგეთისთვის. ამ ადგილას ერთ გამხმარ ნაძვის ხეს ვდგამდით და იმის გარშემო ვტრიალებდით. ნახე, რა ლამაზია, განათდება ჯიგრულად ეგ ყველაფერი, ეს ცენტრია და ძაან მაგარია.
_ ბატონო რამაზ, როგორც ვხედავთ, თქვენ კმაყოფილი ბრძანდებით მიმდინარე სამუშაოებით; ალბათ, საქმის კურსშიც იქნებით იმასთან დაკავშირებით, რომ სამაგიეროდ მოსახლეობაა უკმაყოფილო ამ მშენებლობით!
_ არ ვიცი, საიდან უნდა ვიცოდე?
_ თუნდაც ჩვენი გაზეთის საშუალებით.
_ მე თქვენს გაზეთს არ ვკითხულობ, მე შენს მასალებს არ ვკითხულობ. ძალიან ცოტა დრო მაქვს (არადა, არა ერთი ინტერვიუ გვაქვს ბატონ რამაზთან ჩაწერილი, სადაც ამბობს, როგორ იწყებდა თავის სამუშაო დღეს “გურია ნიუსის” კითხვით. ავტ.).
_ მაშინ გეტყვით: ამ ბინის მცხოვრებლებმა არაერთხელ მოგვმართეს დახმარებისთვის, რისი ამსახველი ვიდეო და ფოტო მასალა გვაქვს კიდეც _ გამოთქვამენ უკმაყოფილებას იმის გამო, რომ წყალი ჩამოსდით, ბევრს გარემონტებული ბინა გაუფუჭდა… ჩვენ გაზეთს თუ არ კითხულობთ, შეგიძლიათ მათი განცხადებები მოიკითხოთ _ გამგეობაშიც მრავლად დევს, მათზე მოსახლეობას პასუხი არ მიუღია…
_ არ ვღებულობ მაგას…
_ ეს ხომ ფაქტია, ბატონო რამაზ!
_ “ქართულმა ოცნებამ” რომ 56 000 ლარი გადაგიხადათ, ეს ფაქტია, რომ მოგისყიდათ? არა, ხომ? ჰოდა, ზოგს ჰგონია, რომ გაიყიდეთ. ზოგს გაუჩნდა ეს კითხვები და გწერდნენ, რომ გაიყიდეთ და ასე შემდეგ. მე მაგალითად მივხვდი, რომ თქვენ კი არ გაიყიდეთ, არამედ აიღეთ რეკლამისთვის. შემდეგ გაგიჩნდათ 2-3 კამერა…
_ კამერები მანამდეც გვქონდა, ბატონო რამაზ…
– კაი ახლა, არ გვინდა პოლემიკაში შესვლა. ბევრი რაიონული ცენტრი არ იქნება ასე მოწყობილი, რომელიც ოზურგეთს მალე ექნება, სულ რამდენიმე დღეში, მე კმაყოფილი ვარ ნამდვილად…
_ მოხდება თუ არა თქვენი წარდგენა 1 სექტემბერს?
_ შეიძლება 1-ში მოხდეს. თუმცა შეიძლება ხვალაც, ზეგაც… არ ვიცი ზუსტად. ეს იქნება ჩემთვის ძალიან მნიშვნელოვანი. თუ ეს ასე მოხდა, მე ჩავთვლი, რომ მე ვიქნები უბედნიერესი კაცი, თუ ჩემი კანდიდატურა დასახელდება და ამას ჩემი ქვეყანა გადაწყვეტს, ჩემი სამშობლო სადაც არის, იმ კუთხის მაჟორიტარი დეპუტატი ვიყო, დედას ვფიცავარ, ძაან მაგარი იქნება ჩემთვის. როგორც ერთი ქართველისთვის, იყო მაჟორიტარი დეპუტატი შენი კუთხიდან, ეს ძალიან დიდი პატივია. თქვენ, ალბათ, რაღაც კვლევებს ატარებთ როგორც ჟურნალისტები; ხომ ატარებთ გამოკითხვებს, ეკითხებით თქვენს მეგობრებს, საჯარო პირებს, მოსახლეობას, პოლიციელებს, პედაგოგებს და ყველა იძახის, რომ რამაზი ძაან მაგარია და ძაან უყვართ რამაზი?! მეც მეუბნებიან, თუნდ შეიძლება მატყუებენ, მე მართლა მინდა, რომ გამოვადგე ოზურგეთს. თუმცა, ეს ჩემი გადასაწყვეტი არაა რა. 22 წელი, გურიაში ერთი მეტრი ასფალტი არ იყო დაგებული, 22 წელი! თქვენ პოზიტივს უნდა უყურებდეთ, თუმცა კიდეც უნდა გააკრიტიკოთ, თუ ხედავთ რომ გასაკრიტიკებელია… მე ვთვლი, რომ ძალიან ბევრი გავაკეთე,
_ როდის მოხდება პრეზენტაცია, როდის გაიხსნება ეს მოედანი?
_ არ ვიცი. მე უნდა ვიცოდე?!
ამ საუბრის დროს, გზაზე ტელეკომპანია “მე-9 არხის” მანქანა გამოჩნდა და რამაზ ნიკოლაიშვილმა არც ეს ფაქტი დატოვა უყურადღებოდ.
რამაზ ნიკოლაიშვილი: – ისე, “ინფო 9” (ტვ-9) არ უნდა დავუძახოთ, არ უნდა ნახოს, რა კეთდება? ისე, რაღაც ინტერესი დაკარგა…
_ “გურია ნიუსმა”?!..
_ “გურია ნიუსი” ყოველთვის იყო ავანგარდში და ამას მე ძალიან ვაფასებ. გულწრფელად ვამბობ, რა. ნუ, ახლა ზედმეტი მოგდით ხანდახან; ნუ, ეგ ჩემი აზრია. თუ ჟანამ, დაწერა, მე არ მჯერა, მაგრამ, რომ ვიღაცას წყალი ჩამოუვიდა, იმ ვიღაცას ჰქონდა 40 წლის კარ-ფანჯარა დაყენებული, ქალბატონო ჟანა და მაშინ სტატისტიკა რატომ არ მოიყვანე, დღეს რომ მეტალოპლასტმასის კარ-ფანჯრები აქვთ ჩასმული, ქვევით ღობეები რომ ჰქონდათ და დღეს ვიტრაჟებია, დაწერე ეგ ჟანა? არ დაწერე! რატომ?
_ ბატონო რამაზ, მე დავწერე ის, რასაც მოსახლეობა ამბობს, რაც ვნახე ჩემი თვალით და რაც დავაფიქსირე ვიდეო და ფოტომასალაში...
_ შენ უნდა მისცე მოსახლეობას ობიექტურად განსაჯოს, შენ ეუბნები მოსახლეობას, რომ ვიღაც ორ ადამიანს და სავარაუდოდ სამს, შეიძლება სარემონტო სამუშაოების დროს, ჩამოუვიდა წყალი. მე არ წამიკითხია, დედას გეფიცები, მაგრამ ამ ადამიანებს კარ-ფანჯარა, საიდანაც სიცივე შედიოდათ და ვერ იჭერდნენ სითბოს სახლებში, ხომ უფრო ძვირი უჯდებოდათ თავის სახლების გათბობა?
მეტალოპლასტმასის ფანჯრები რომ ჩავსვით, ეს დაწერე? არ დაწერე, ჟანა! არ გეცალა? ქვევით რომ “კლეტკებით” იყო შეღობილი და მაღაზიები რომ ულამაზესი ვიტრაჟებით შეიცვალა და გაკეთდა, კი, ბატონო, მესმის, ხმაურიც აწუხებთ, მაგრამ მე ვფიქრობ, რომ ოზურგეთში, სადაც წლების განმავლობაში არაფერი არ გაკეთებულა და ასეთი სილამაზეები კეთდება, ადამიანები უნდა შეიზღუდონ, გაგებით მიუდგნენ და თუ ვინმეს რაიმე გაუფუჭდა, მე ბოდიშს ვუხდი.
მშენებლებს ვესაუბრე და დარწმუნებული ვარ, რომ ყველა ის დაზიანება, რაც მათ ჰქონდათ, ყველას გაუკეთებენ და მოუგვარებენ. აბა, რა სისულელეა, ისე ხომ არა მიატოვებენ?! ეს ჩვენი მიზანია, ის კი არა, რომ ვიღაცა გავაბრაზოთ; პირიქით, ვასიამოვნოთ ადამიანებს. ეს პროცესი არ გაჩერდება, კი დამთავრდება რამდენიმე დღეში, თუმც სამუშაოები გაგრძელდება. დაიწყება თეატრი… გვინდა, რომ ამ წელს სასტუმროც დავიწყოთ, ეს ქუჩა მთლიანად ასეთი ქვაფენილით გაკეთდება, მატარებლის სადგურიდან – თეატრამდე დამთავრებული.
_ ბატონო რამაზ, იქნებ, გვითხრათ, რომელი ორგანიზაცია ატარებს ამ სამუშაოებს?
_ ეს, ტენდერები ჩატარდება და გაირკვევა.
_ ვინც ახლა ატარებს სამუშაოებს, იმაზე გეკითხებით..
_ ეს თქვენ არ იცით?
_ არ ვიცით – უკვე ორ თვეზე მეტია ვითხოვთ პასუხს საჯარო ინფორმაციაზე და არ მოგვაწოდეს!
_ არ ვიცი, ეს ჩემი საქმე ნამდვილად არ არის. მიწერეთ წერილობით და მოგწერენ…
_ მივწერეთ და არ გვიპასუხეს!
_ ეს ცუდია, რატომ არ მიწერეთ ლელა? (ეკითხება ლელა თავართქილაძეს, რომელმაც მინისტრის კითხვა უპასუხოდ დატოვა) არ ვიცი. მოკლედ, პროცედურა დაცულია, ციდან არაფერი არ ვარდება. ეს არის ტექნიკური საკითხი, რომელიც მინისტრის დონეზე გადასაწყვეტი არაა, ხომ მეთანხმები, ჟანა? მთავარია, რომ კეთდება.
_ ბატონო რამაზ, როდის ჩამოდის პრეზიდენტი ოზურგეთში?
_ თქვენ თვლით, რომ მე ადმინისტრაციის ხელმძღვანელი ვარ? ან მოადგილე? მე საიდან უნდა ვიცოდე, აბა? ახლა მე ეს ინფორმაცია არ მაქვს, არ ვიცი, როდის ჩამოდის პრეზიდენტი, თუმცა, ის ძალიან ხშირად ჩამოდის და აქ რამდენიმე დღე იცხოვრა კიდეც. მას აქვს ხედვები, რომ უკეთესობისკენ უნდა შეიცვალოს და ამის გგემებიც გვაქვს და ამაზე ვმუშაობთ და როდის ჩამოვა გურიაში, მე ეს ინფორმაცია არ მაქვს.
_ წარმატებებს გისურვებთ, ბატონო რამაზ!
_ წარმატებები მოდის იმ ხალხთან, ვინც 24 საათის განმავლობაში შრომობს, ვინც არ არის დაკავებული პოპულისტური განცხადებების კეთებით და ვისაც შეუძლია ღამე იძინოს მხოლოდ 4 საათი და დანარჩენი საათები თავისი ქვეყნისთვის დალიოს.
მე, ჩემი ცხოვრების წესით, ვარ მოწადინებული, ჩემო ჟანა, რომ ვემსახურო ჩემს საყვარელ ქვეყანას, ეს იქნება ოზურგეთი, თბილისი თუ ჩხოროწყუ, მნიშვნელობა არ აქვს, რა! ეს გურულებმა ყველაფერი კარგად იციან. თუ ვარ ღირსი წარმატების, ეს წარმატება მოვა! თუ არ ვარ ღირსი, არ მოვა!
