11 მაისს, სრულიად საქართველოს კათოლიკოს–პატრიარქი საპატრიარქო ტახტის მოსაყდრე, სენაკისა და ჩხოროწყუს მიტროპოლიტი შიო (მუჯირი) გახდა _ ის პატრიარქ შიო მესამედ იწოდება.
“ძნელია, ჩემთვის ამ წუთებში გამოვხატო ჩემი სულიერი განწყობა, რაც თან ახლავს იმ არჩევანს, რომელმაც წილად მარგუნა დიდი პატივიც და მძიმე ჯვარიც, გთხოვთ, ილოცოთ ჩემთვის“, _ თქვა სრულიად საქართველოს კათოლიკოს-პატრიარქმა, მცხეთა-თბილისის მთავარეპისკოპოსმა, ბიჭვინთისა და ცხუმ-აფხაზეთის მიტროპოლიტმა, უწმინდესმა და უნეტარესმა, შიო მესამემ განაცხადა.
ოფიციალური ინფორმაციით, საეკლესიო კრებას 1 200-მდე დელეგატი დაესწრო.
“გურია ნიუსმა” სცადა გაერკვია რამდენი დელეგატი ესწრებოდა გურიიდან ეკლესიის გაფართოებულ კრებას სამების საკათედრო ტაძარში. ამის გასარკვევად შემოქმედის ეპარქიის პრესსამსახურს, დეკანოზ ბასილ გოგოტიშვილს ვესაუბრეთ.
“შემოქმედის ეპარქიიდან იყო 52 დელეგატი“, _ გვითხრა დეკანოზმა ბასილ გოგოტიშვილმა და ისაუბრა არჩევნების შედეგის შესახებაც ისაუბრა: “ძალიან გაგვიხარდა ეს არჩევანი. ყველა კანდიდატი ღირსეული იყო და ღირსეულთა შორის ღირსეულმა გაიმარჯვა“.
“პატრიარქის, უწმინდესი ილია მეორეს გადაწყვეტილებით, მეუფე შიო მოსაყდრე გახლდათ 9 წლის განმავლობაში და ეკლესია რა გამოწვევების წინაშე დგას, მან კარგად იცის. ბრძანა კი თავის გამოსვლაში, რომ უწმინდესის დაწყებულ გზას გააგრძელებს და შეეცდება შეინარჩუნოს ის, რაც კი ამ წლების განმავლობაში უწმინდესმა შექმნა. დანარჩენს დრო გვიჩვენებს”, _ ამბობს მამა ბასილი.
შიო მესამეს პატრიარქად არჩევასთან დაკავშირებით განცხადება გაკეთდა პოლიტიკურ სპექტრში.
“სრულიად საქართველოს ვულოცავ კათოლიკოს–პატრიარქის, უწმინდესისა და უნეტარესის, შიო III-ის არჩევას.
უდიდესი პატივისცემით ვულოცავ მის უწმინდესობას, ვუსურვებ ღვთის წყალობასა და სულიერ სიმტკიცეს.
ღმერთი ფარავდეს ჩვენს ქვეყანას!” _ დაწერა სოციალურ ქსელში “ქართული ოცნების” დეპუტატმა ვასილ ჩიგოგიძემ.
პატრიარქის არჩევას გამოეხმაურა ჩოხატაურის მუნიციპალიტეტის მერი, მინდია ჟღერია:
“სრულიად საქართველოს ვულოცავ კათოლიკოს–პატრიარქის არჩევას!
ღმერთი ფარავდეს ჩვენს ქვეყანას და მის სულიერ მამას, კათოლიკოს–პატრიარქ შიო III-ს!”
განცხადება გაავრცელა ოზურგეთის მუნიციპალიტეტის მერმა, პაატა კუნჭულიამ:
“საქართველოს სამოციქულო ავტოკეფალურ მართლმადიდებელ ეკლესიას ახალი წინამძღოლი _ სრულიად საქართველოს კათოლიკოს–პატრიარქი, უწმინდესი და უნეტარესი შიო III ჰყავს.
დიდი პატივისცემით ვულოცავ ამ ისტორიულ დღეს სრულიად საქართველოს.
თქვენო უწმინდესობავ და უნეტარესობავ, გვჯერა, რომ თქვენი წინამძღოლობით ქართული ეკლესია კვლავაც სიბრძნის, ერთიანობისა და სულიერი სიმტკიცის გზით ივლის, იმ დიდი მემკვიდრეობის ერთგულად, რომელიც ჩვენმა უწმინდესმა და უნეტარესმა ილია II-მ დაგვიტოვა.
ღმერთმა დაგლოცოთ და გაგაძლიეროთ. თქვენი ლოცვა–კურთხევა არ მოკლებოდეს საქართველოსა და ქართველ ხალხს“, _ ამბობს პაატა კუნჭულია.
პარტია “ახალის” ლიდერი ჩოხატაურში, ბაჩო ახალაძე ამბობს, რომ ახალი პატრიარქის პირობებში საზოგადოება მეტ სოციალურ პასუხისმგებლობას ელოდება:
“გურიაში და ზოგადად რეგიონებში ეკლესიას მხოლოდ რიტუალური ფუნქცია აღარ უნდა ჰქონდეს. როდესაც საზოგადოებაში არის სიღარიბე, მიგრაცია, ახალგაზრდების გადინება, განათლებისა და ფსიქოლოგიური მხარდაჭერის დეფიციტი, ეკლესია ვერ დარჩება მხოლოდ ტაძრის კედლებში.
ვფიქრობ, ახალი პატრიარქის პირობებში საზოგადოება სწორედ მეტ სოციალურ პასუხისმგებლობას ელოდება: საგანმანათლებლო პროექტებს, ახალგაზრდებთან რეალურ მუშაობას, ოჯახების მხარდაჭერას, ფსიქიკური ჯანმრთელობის თემებზე გახსნილ საუბარს.
ეკლესიის ავტორიტეტი ყველაზე მეტად მაშინ იზრდება, როცა ის ადამიანების ყოველდღიურ ტკივილთან დგას და არა მხოლოდ საკურთხეველთან. ამიტომ, დღეს ეკლესიის როლი უნდა იყოს არა მხოლოდ სულიერი, არამედ სოციალური თანადგომაც _ განსაკუთრებით რეგიონებში, სადაც ადამიანები ხშირად მიტოვებულად გრძნობენ თავს“, _ ამბობს ბაჩო ახალაძე ჩვენთან საუბრისას.
გარდა ამისა, ახალაძის თქმით, ბოლო წლებში გაჩნდა განცდა, რომ ეკლესიის ნაწილი ზედმეტად დაუახლოვდა ამან გარკვეულწილად დააზიანა მისი ნეიტრალური სულიერი ავტორიტეტი:
“ვფიქრობ, ახალი პატრიარქის ერთ–ერთი მთავარი გამოწვევა სწორედ ნდობის აღდგენა იქნება _ იმის ჩვენება, რომ ეკლესია დგას საზოგადოების და არა რომელიმე პოლიტიკური ძალის მხარეს.
როდესაც ეკლესია ძალიან ახლოს დგას ხელისუფლებასთან, ჩნდება რისკი, რომ კრიტიკული ხმა დაკარგოს. არადა, ეკლესიის ისტორიული მისია ყოველთვის იყო სიმართლის თქმა, მათ შორის ხელისუფლების მიმართაც, როცა ამას საზოგადოებრივი სამართლიანობა მოითხოვდა.
თუ ახალი პატრიარქი შეძლებს რეალური პოლიტიკური დისტანციის შენარჩუნებას, ეკლესია ბევრად უფრო გამაერთიანებელი და სანდო ინსტიტუცია გახდება ყველა მოქალაქისთვის, მიუხედავად მათი პოლიტიკური შეხედულებებისა“, _ ამბობს ახალაძე.
შიო მესამეს გაპატრიარქებასთან დაკავშირებით განცხადება გაავრცელეს ბიძინა და ეკატერინა ივიანიშვილებმა:
“თქვენო უწმინდესობავ,
გულითადად გილოცავთ საქართველოს მართლმადიდებელი ეკლესიის კათოლიკოს–პატრიარქად არჩევას.
დღეიდან თქვენ გაკისრიათ საპატიო და, ამავდროულად, საპასუხისმგებლო მისია, რომ უხელმძღვანელოთ ჩვენს დედაეკლესიას და იყოთ თითოეული მართლმადიდებელი ქართველის, ერის და ბერის სულიერი მამა.
თქვენო უწმინდესობავ, უდიდესი ისტორიული პასუხისმგებლობაა, ემსახურო ეკლესიას და ქვეყანას იმ დროს, როდესაც საზოგადოებას განსაკუთრებით სჭირდება სულიერი სიმტკიცე, ერთიანობა და მშვიდობა.
ეს პასუხისმგებლობა კიდევ უფრო დიდია იმის გათვალისწინებით, რომ თქვენ აგრძელებთ სრულიად საქართველოს კათოლიკოს–პატრიარქის, უწმინდესის და უნეტარესის, ილია მეორის გზას, რომელმაც ნახევარი საუკუნის განმავლობაში, რთულ და ქარტეხილებით აღსავსე პერიოდში, ჩვენი ხალხი და ქვეყანა ღირსეულად ატარა.
გვწამს, რომ თქვენი მოღვაწეობა სიმშვიდის, თანადგომისა და ეროვნული ერთიანობის საფუძვლად იქცევა და კიდევ უფრო განამტკიცებს საქართველოს ეკლესიის მრავალსაუკუნოვან ტრადიციას და ფასეულობებს, რომლებზეც ჩვენი ეროვნული იდენტობა დგას.
გისურვებთ ჯანმრთელობას, ძალას და სულიერ სიმტკიცეს.
ღმერთმა დალოცოს თქვენი უწმინდესობა და სრულიად საქართველო“, _ ნათქვამია ბიძინა და ეკატერინა ივანიშვილების განცხადებაში.
განცხადება გაავრცელა “ნაციონალურმა მოძრაობამ“: “ერთიანი ნაციონალური მოძრაობა“, როგორც ქრისტიანულ–დემოკრატიულ და კონსერვატიულ ფასეულობებზე დაფუძნებული პოლიტიკური ძალა, პატივისცემით მიესალმება საქართველოს სამოციქულო ავტოკეფალური მართლმადიდებელი ეკლესიის გადაწყვეტილებას კათოლიკოს–პატრიარქის არჩევის შესახებ. გულითადად ვულოცავთ ამ უმნიშვნელოვანეს მოვლენას სრულიად საქართველოს პატრიარქს უწმინდესსა და უნეტარეს შიო III-ს“.
“საქართველოს კათოლიკოს–პატრიარქს, შიო III-ს წარმატებას ვუსურვებთ ერის სულიერი გაძლიერების უმნიშვნელოვანესი მისიის შესრულებაში.
გვჯერა, რომ საქართველოს ეკლესია დარჩება მშვიდობის, თანადგომისა და ეროვნული ერთიანობის საყრდენი“, _ აცხადებს გახარიას პარტია “საქართველოსთვის“.
“მინდა გამოვთქვა სურვილი, რომ ახალმა პატრიარქმა გააგრძელოს ის გზა, რაც არის ქართული ეკლესიის გზა – დამოუკიდებლობის გაძლიერება და ერთობის კონსოლიდაცია, საზოგადოების ერთობის. ამისათვის ერთი ნაბიჯი არის, რომელსაც მე ვისურვებდი და დარწმუნებული ვარ, რომ ამ სურვილს იზიარებს ძალიან ბევრი ადამიანი – ის, რომ პატრიარქმა პირველი ნაბიჯი გადადგას, რომ შეიწყალოს ყველა სინდისის პატიმარი“, _ აცხადებს საქართველოს მეხუთე პრეზიდენტი სალომე ზურაბიშვილი.
საპატრიარქოს საზოგადოებასთან ურთიერთობის სამსახურის ხელმძღვანელის, ანდრია ჯაღმაიძის განცხადებით, შესაძლოა, ახლადარჩეულმა პატრიარქმა, შიო მესამემ “სინდისის პატიმრების” გათავისუფლების საკითხი დააყენოს _ როგორც დეკანოზმა ჟურნალისტებს განუცხადა, ამ საკითხზე ხელისუფლებასთან იმსჯელებენ:
“ადრე ვთქვი, რომ კვლავ დავაყენებთ საკითხს და ვისაუბრებთ ამაზე ხელისუფლებასთან. გიდასტურებთ, დიახ, ასე იქნება. ახლა ძალიან რთულია გეგმებზე საუბარი, როდის, რა იქნება“, _ თქვა ანდრია ჯაღმაიძემ.
საქართველოს საპატრიარქოს გვერდზე არსებული ინფორმაციის თანახმად, ახალარჩეული პატრიარქი ბერად 1993 წლის 5 იანვარს აღიკვეცა. 1995 წლის 19 აგვისტოს დიაკვნად ეკურთხა, 1996 წლის 6 მაისს კი მღვდლად, ეპისკოპოსად 2003 წლის 7 სექტემბერს აკურთხეს, 2009 წლის 20 სექტემბერს მთავარეპისკოსობა ებოძა, 2010 წლის 2 აგვისტოს კი სენაკისა და ჩხოროწყუს, ავსტრალიისა და ახალი ზელანდიის მიტროპოლიტობა ებოძა. უკვე 9 წელია, საპატრიარქო ტახტის მოსაყდრის სახელს ატარებს, კათოლიკოს-პატრიარქ ილია მეორის გადაწყვეტილებით.
პატრიარქის გარდაცვალების შემდეგ, მიტროპოლიტი მისი მოვალეობებს ასრულებდა.
ავტორი
