კოალიცია „ქართულ ოცნებაში“ აცხადებენ, რომ არანაირი ფაქტობრივი მასალა არ არსებობს, რაც ამ ფონდის საქმიანობას ნათელს მოჰფენდა.
_ ბოლო თვეების განმავლობაში ვცდილობ მოვიპოვო ინფორმაცია ფონდის შექმნასთან და მის მოღვაწეობასთან დაკავშირებით. ამ მიზნით, წერილობით მივმართე პრეზიდენდის ადმინისტრაციას და სახელმწიფო რწმუნებულს გურიის მხარეში, მაგრამ უშედეგოდ. კითხვაზე – არის თუ არა შექმნილი გურიის აღორძინების ფონდი, არავინ მპასუხობს, ასევე არავინ მაძლევს ფონდის დაარსებასთან დაკავშირებული აქტების ასლებს და თუნდაც არაოფიციალურად ამ კითხვაზე პასუხი არა აქვს არც ერთ ოფიციალურ პირს გურიის მხარეში, _ აცხადებს ოზურგეთის მუნიციპალიტეტის საკრებულოს ოპოზიციონერი დეპუტატი და კოალიაცია “ქართული ოცნების” წევრი, თემურ სალუქვაძე.
მისივე თქმით, პრეზიდენტის ადმინისტრაციის მიმართვის პარალელურად, ფონდის შექმნასა და მისი მოღვაწეობის შესახებ ინფორმაციის მოპოვებას შეეცადა სახელმწიფო ორგანოთა ოფიციალურ ვებსაიტებზე, მაგრამ ასეთი ფონდის დაარსებასთან დაკავშირებით, არანაირი ინფორმაცია არ არსებობს.
_ ჩვენ თავიდანვე ეჭვი გამოვთქვით აღორძინების ფონდის მიზნობრიობასთან დაკავშირებით და განვაცხადეთ, რომ ვაპირებდით მის მონიტორინგს. მიმაჩნია, რომ ჩვენი და საზოგადოების მხრიდან ფონდის საქმინობის სავარაუდო კონტროლის თავიდან აცილების მიზნით, ხელისუფლებამ უარი თქვა სახელმწიფო თანხების გამჭვირვალე ხარჯვაზე, რაც თავის დროზე „ნაციონალური მოძრაობის“ მხრიდან მიჩნეული იქნა საკუთარი მხარისადმი მტრულ დამოკიდბულებად.
ნათელია, რომ პრეზიდენტის დაპირება გურიის აღორძინების ფონდის შექმნასთან დაკავშირებით არ შესრულებულა და როგორც ბევრი სხვა დაპირება ესეც რიხიანად ნათქვამი ტყუილი აღმოჩნდა, ასევე ტყუილი აღმოჩნდა მის თავმჯდომარედ რამაზ ნიკოლაიშვილის დანიშვნა და საბოლოო ჯამში, საერთოდ ტყუილი აღმოჩნდა 2012 წლის გურიის აღორძინების წლად გამოცხადების საპრეზიდენტო იდეა, რადგანაც ბევრი არაფერი გაკეთებულა, თუ არ ჩავთვლით ოზურგეთში თეატრალურ მოედანზე ამორტიზებული ძველი სახლის საღებავ-ფერუმარილით მოკაზმვას. შესაბამისად, არა მგონია, გურიის აღორძინების „ნაცმოძრაობის“ პროექტს 20 დღე ეყოს, რომელიც არჩევნებამდე დარჩა, _ განაცხადა თემურ სალუქვაძემ.
„გურია ნიუსი“ რამაზ ნიკოლაიშვილის პრესსამსახურის წარმომადგენელს მაია სიხარულიძეს დაუკავშირდა, რომელმაც ასეთი კომენტარი გააკეთა: „მთელი დღის განმავლობაში გვაქვს ძალიან ბევრი შეხვედრა, ვხვდებით ხალხს და ვეცნობით მათ პრობლემებს, აქედან გამომდინარე, არ გვაქვს დრო, ასეთ აბსურდზე კომენტარები ვაკეთოთ“.
რამაზ ნიკოლაიშვილის უდროობის გამო, „გურია ნიუსის“ კითხვა, სად შეგვიძლია ამ დოკუმენტაციის მოპოვება და ამ ფონდის ფარგლებში, რა აქვს გაკეთებული გაკეთებული გურიის აღორძინებისთვის, უპასუხოდ დარჩა.
ჩვენც შევეცადეთ ინფორმაცია მოგვეპონებინა ამ ფონდთან დაკავშირებით, მაგრამ ინტერნეტში მხოლოდ პრეზიდენტის ინიციატივა და განცხადება იძებნება ამ ფონდის დაარსებაზე.
თუ ფონდის ხელმძღვანელი რამაზ ნიკოლაიშვილი მოგვაწვდის ინფორმაციებს ფონდის საქმიანობასთან დაკავშირებით, ასევე მის თანამშრომლებსა და ბიუჯეტზე, დაუყოვნებლივ გამოვაქვეყნებთ.
