“კომბოსტო და ატამი თუ კარგად მოგყავს, არ ნიშნავს, რომ აგროპოლიტიკაშიც ერკვევი”

ოზურგეთის მუნიციპალიტეტის გამგებლის ახალდანიშნული მოადგილის ლაშა ღლონტის ინტერვიუს “გურია ნიუსთან” რამდენიმე ადამიანი გამოეხმაურა. “გლეხმა კეთილი ინებოს და თავის მიწას თუ შემოსავალს თვითონვე მიხედოს!” _ ეს სიტყვები, რომელიც ლაშა ღლონტმა ჩვენი გაზეთის ჟურნალისტს უთხრა, ბევრისთვის მიუღებელი აღმოჩნდა. 
როგორც აგრონომი მარინე სუნგულია ამბობს, გლეხს, დღეს ინფორმაცია და სტიმული სჭირდება, რომ წარმატებული იყოს. როგორც მან გვითხრა, მისთვისაც გაუგებარი აღმოჩნდა ეს ფრაზა: _ ლაშა ღლონტს,  მე ვიცნობ, როგორც წარმატებული ფერმერული ოჯახის წარმომადგენელს და მან ძალიან კარგად უნდა იცოდეს ფერმერისთვის თანადგომის ფასი. თავის დროზე, ეს მასაც ჰქონდა, _ ამბობს სუნგულია. 
_ დავიწყებ იმით, რომ კომბოსტო და ატამი თუ კარგად მოგყავს, ეს არ ნიშნავს, რომ აგროპოლიტიკაშიც კარგად ერკვევი. განვითარების კანონზომიერებები, მისი მართვა და ორგანიზება გარკვეულ ცოდნას და ხედვას მოითხოვს. ზემოთ ხსენებული ფაქტი ტიპიური მაგალითია “ნაციონალების” პოლიტიკისა _ დანიშნონ თანამდებობაზე ისეთი კადრი, რომლისთვისაც ეს “ოცნების სფეროს” წარმოადგენს, რასაც შედეგად დანიშნულთა ბრმა ერთგულება და გათავხედება მოჰყვება. ამ თანამდებობაზე დანიშვნაც პოლიტიკური მიზანშეწონილობით არის გამოწვეული, ვიდრე გლეხზე ფიქრით. მე ვფიქრობ, აღნიშნული კადრის დანიშვნა შედის საკრებულოს თავმჯდომარის ალეკო მამეშვილის ინტერესებში _ თავისი გავლენის გასაძლიერებლად. მას ყველა სტრუქტურაში სჭირდება თავისი ხალხი და ასევე, მის პირად ინტერესს წარმოადგენს აკონტროლოს სოფლის მეურნეობისთვის განკუთვნილი შემოსავალ-გასავლები. სახელმწიფო მოხელეები ვალდებულნი არიან შექმნან გარემო გლეხური, ფერმერული მეურნეობის განვითარებისთვის, ახალი ტექნოლოგიების დანერგვისთვის და გლეხთა ოჯახების შემოსავლების ზრდისთვის. გამგებლის ახალ მოადგილეს წარმოდგენა არ აქვს ამ პროცესში სახელმწიფოს როლსა და მის მნიშვნელობაზე. არადა, სახელმწიფო საჯარო სამსახური უნდა გამოიყენონ გადასახადის გადამხდელების, მათ შორის, გლეხების, მეწარმეების სასარგებლოდ და არა პირადი კეთილდღეობისთვის.
ძალიან ძნელია ისაუბრო, რაიმე კონკრეტული დარგის გაძლიერებაზე, თუ ამის რეალური სურვილი ხელისუფლებიდან არ წამოვიდა. მოწოდება _ ძლიერი სოფელი! ჯერ ისევ პიარის დონეზეა.
უპირველეს ღონისძიებას წარმოადგენს ფერმერების ინფორმირება, თუ როგორ მოიყვანონ კარგი მოსავალი. მოვიყვან მაგალითს: წელს ციტრუსის მოსავლის დიდი ნაწილი დაზიანდა და ფერმერებმა სარგებელი ვერ ნახეს. ხელისუფლება ამ თემაზე რომ ფიქრობდეს, მოქმედება დაწყებული უნდა ჰქონდეს. ფერმერს უნდა მისცე საშუალება, გაერკვეს ახალ ტექნოლოგიებში და ხელი შეუწყო იაფი კრედიტების მოპოვებაში.
_ არ გიცდიათ თქვენი ხედვა გაგეცნოთ ადგილობრივი ხელისუფლების წარმომადგენლებისთვის?
_ რა თქმა უნდა, კი. 2010 წლის 7 დეკემბერს განცხადებით მივმართე ოზურგეთის მუნიციპალიტეტის საკრებულოს თავმჯდომარეს ალეკო მამეშვილს, სადაც ვწერდი, რომ, რადგან მოსახლეობის უმეტესობის ინფორმირება დაბალია და კარგად არ იციან, როგორ მოიყვანონ მაღალი ხარისხის მოსავალი (წელს განსაკუთრებით ეს პრობლემა ციტრუსებს შეეხო), ჩვენი არასამთავრობო ორგანიზაცია “სასოფლო-სამეურნეო პროგრესის ცენტრი” ბოლო წლებია ცდილობს ამ კუთხით განავითაროს ურთიერთობა ფერმერებთან. საკრებულოს შევთავაზეთ, რომ საინფორმაციო კამპანია გავაჩაღოთ სოფლებში. ჩვენი მწირი რესურსების გამო, ამის გაკეთება გაგვიჭირდება და ამიტომ ვფიქრობდით, რომ კერძო, არასამთავრობო და ადგილობრივი თვითმმართველობის სტრუქტურების გაერთიანებით და თანამშრომლობით ბევრი სასიკეთო ღონისძიება გახორციელდებოდა, მაგრამ, მუნიციპალიტეტის საკრებულო დღემდე დუმს.
_ ქალბატონო მარინე, თქვენთვის ცნობილია, რომ “გურია ნიუსი” სწორედ ამ მიზნით აპირებს განაახლოს პოპულარული საგაზეთო დამატება “კარმიდამო ჩემი” და ყველა სპეციალისტის, მათ შორის თქვენი თანადგომისა და თანამშრომლობის იმედიც გვაქვს… ჩემი შემდეგი კითხვა კი ერთჯერად, ჩვენივე გადასახადებით შევსებული ბიუჯეტიდან გაცემულ “დახმარებას” ეხება _ უკვე ცნობილია, რომ გლეხს ხელისუფლება პურის ფქვილს და საწვავის ტალონს დაურიგებს… თქვენი აზრით, გლეხს ეს დახმარება ეყოფა?
_ ჩემი აზრით, მსგავსი ღონისძიებები ღირსეული მოქალაქეებისთვის შეურაცხმყოფელიც უნდა იყოს. არქიფო სეთურის სახელმწიფოში იმდენს არიგებენ, შიმშილით სული არ ამოგვძვრეს, მაგრამ ვერც ვიაზროვნოთ. ასეთი ღონისძიებები ერთჯერადია და განვითარებას არ უწყობს ხელს; ამასთანავე, არ არის იაფი. ჩვენი მშრომელი გლეხისთვის საჭიროა მასტიმულირებელი გარემოს შექმნა, ხოლო ფერმერი თავად შეძლებს შექმნას ის დოვლათი, რომ სახელმწიფოს “მათხოვრად” არ გადაიქცეს. ზუსტად ეს არის სახელმწიფოს როლი.
_ რამდენიმე დღის წინ, საქართველოს პრეზიდენტი ხალხის კითხვებს პასუხობდა, თუმცა, კითხვაზე მეტი მადლობა გაისმა. თქვენ რა კითხვა გაქვთ პრეზიდენტთან?
_ პრეზიდენტს პირდაპირი პასუხი თითქმის არაფერზე გაუცია, ის ამბობდა მხოლოდ იმას, რაც მას უნდოდა. ჩემი კითხვა კი ასეთია: _ რა დაგიშავა გურიამ?
“გურია ნიუსი” სულ მალე განაახლებს საინფორმაციო კამპანიას სოფლის მეურნეობის განვითარების მხარდასაჭერად გურიაში. ჩვენ ვთავაზობთ ამ სფეროში მომუშავე ყველა ადამიანს, პოლიტიკური შეხედულებების მიუხედავად, შემოგვიერთდეს და ერთად ვიმსჯელოთ ქვეყნისთვის ყველაზე მტკივნეულ საკითხზე _ რით და როგორ დავეხმაროთ გლეხს, ერთმანეთს, რომ გადავრჩეთ, გავძლიერდეთ და ქვეყანაც გადავარჩინოთ. აქვე, საგანგებოდ _ ღიად და საჯაროდ, ვთავაზობთ ჩვენი ინიციატივის მხარდაჭერას ბატონებს ლაშა ღლონტს, ალეკო მამეშვილს და ხელისუფლების ყველა წარმომადგენელს, რადგან ეს მხოლოდ მათი მოქალაქეობრივი კი არა, სამსახურებრივი მოვალეობაა!