ასე ცხოვრობენ ადამიანები 21-ე საუკუნეში
“გურია ნიუსის“ ფოტოჟურნალისტ რეზო ცქვიტინიძის ფოტორეპორტაჟი
ოზურგეთის მუნიციპალიტეტის სოფელ მზიანიდან
“გვინდა ცხოველებისგან განვსხვავდებოდეთ” _ ეს სიტყვები ოზურგეთის მუნიციპალიტეტის სოფელ მზიანში მცხოვრებ აფხაზეთიდან დევნილებს ეკუთვნით. _ 18 წელია, ამ ე.წ. ჩაის მიმღებ პუნქტში ვცხოვრობთ, _ ამბობს ქალბატონი ნათელა.
ფოტოებზე აღბეჭდილ შენობაში ჩანტლაძეებისა და სარიების ოჯახები ცხოვრობენ. როგორც თავად ჰყვებიან, პირველად, როცა აქ დასახლდნენ, საცხოვრებელი თავად გაარემონტეს. იგი სამოციან წლებშია აშენებული, ძალიან ძველი და ამორტიზირებულია: “აი, მაგალითად, ეს კარები, რომ გაგვიჭირდა, შხამქიმიკატების შენობას მოვხსენით, გავრეცხეთ და ჩამოვკიდეთ. ხშირად მივმართავთ ყველა ინსტანციას დახმარებისთვის, მაგრამ _ ამაოდ. 5 ოქტომბერს, გურიის მხარის გუბერნატორთან ერთად, მუნიციპალიტეტის ხელმძღვანელი პირები მოვიდნენ. შემოსვლისას, უცებ ერთი ნაბიჯით უკან დაიხიეს _ იატაკის ჩავარდნის შეეშინდათ. თავი უხერხულად იგრძნეს, შევებრალეთ კიდეც. დაგვპირდნენ, რომ უმოკლეს დროში მოგვინახულებდნენ და თანმიმდევრობით გაგვიკეთებდნენ, რაც აუცილებლად გასაკეთებელია. დღემდე ველოდებით”, _ ამბობენ დევნილები.
“სამჯერ ჩავარდა იატაკი. ახლა ფანერები დავაგეთ და არ ვიცით, კიდევ როდის აღმოვჩნდებით იატაკის ქვეშ. ჩვენი ბრალი ხომ არ არის, ასეთ დღეში რომ ვართ? დაგვაბრუნონ ჩვენს სახლში, აფხაზეთში. არავისზე ნაკლები არც სახლები და არც თანამდებობები გვქონდა. სხვა პრეტენზია აღარ გვაქვს _ გვინდა ცხოველებისგან განვსხვავდებოდეთ! როგორ ფიქრობთ, ბევრს ვითხოვთ?!
აქ ცხოვრობენ აფხაზეთიდან დევნილი ჩანტლაძეები
აქ კი ასევე აფხაზეთიდან დევნილი სარიები ცხოვრობენ
ეს სამზარეულოა
“გვინდა, ცხოველებისგან განვსხვავდებოდეთ!”
ნაჩუქარი თხა ორი ოჯახის ბოლო იმედია
“იქნებ, თქვენი დახმარებით, ჩვენმა ხმამ კეთილ ადამიანებამდე მიაღწიოს!”
