გთავაზობთ წერილობით განცხადებას, რომელსაც მაკა ჭყონია “გურია ნიუსის” რედაქციას უგზავნის:
“გასულ კვირას გაზეთ “გურია ნიუსის” ვებგვერდზე განთავსებულ სტატიაში, სათაურით “საქორწინო ბეჭედი დავაგირავე, ბავშვებისთვის ტკბილეულობა რომ მეყიდა”, ყოველგვარი ეტიკეტის გარეშე შემიძლია ვთქვა, რომ, რასაც რესპოდენტი ლადო გიორგაძე, ჩემი მისამართით საუბრობს, არის სრული ტყუილი და მოგონილი, შეურაცმყოფელი ვერსიები, რაც მინიმუმ შეურაცხყოფა და მაქსიმუმ ცილისწამებაა.
პასუხისმგებლობას შემცირებული თანამშრომლების შესახებ არ გავურბივარ, თუმცა, მინდა განვმარტო, რომ რომ ხელშეკრულება შეუჩერდა 2011-2012 წლებში იმ ადამიანებს, რომლებიც საბავშვო ბაღებში კონტიგენტის ზრდასთან დაკავშირებით იქნენ აყვანილი გარკვეული ვადით და თითოეული მათგანი ხელშეკრულების გაფორმების დღიდან ინფორმირებული იყო ხელშეკრულების პირობებსა და ვადასთან დაკავშირებით. ხელშეკრულების შეჩერება დროებით აყვანილ დამხმარე თანამშრომლებზე, გამოიწვია ბიუჯეტში შესულმა ცვლილებებმა. 2013 წლის ბიუჯეტით გათვანისწინებულია საბავშვო ბაღებში ინვენტარის განახლება და ახალი სათამაშოების შეძენა.
მინდა ვთქვა, რომ თითოეული მათგანის ხელშეკრულების შეწყვეტა, ჩემთვის მტკივნეული თემაა, რადგან კარგად მესმის და ვაცნობიერებ მათ მდგომარეობას, ხელფასი, რომელსაც ისინი საბავშვო ბაღში გამოიმუშავებდნენ, იყო მათი შემოსავლის წყარო, მაგრამ ასევე არსებობს კანონიერი ვალდებულებები, რომელიც სამწუხაროდ, მორალურ მხარეს ზიანს აყენებს.
არ შემიძლია არ აღვნიშნო პრესის დამოკიდებულება ზოგადად მოვლენებთან დაკავშირებით. სამწუხაროდ მედიაში ინტერვიუების დაუბალანსებელი სტილი დაინერგა, რომლის წაკითხვის შემთვხვევაში დამნაშავე და ტირანი აუცილებლად გამოდის ის, ვინც ესა თუ ის რესპოდენტი ისე გაანაწყენა, რომ სამართლის პოვნას ტელევიზიასა და პრესაში, იმ იმედით ეძებს, რომ დამნაშავე დირექტორს განაჩენს ხალხი გამოუტანს.
ახლა კი ციტირების სახით მოვიყვან ბატონ ლადოს ცილისმწამებლურ ბრალდებებს, რომელსაც ის ჩემი მისამართით ავრცელებს:
ამონარიდი “გურია ნიუსის” ვებგვერდზე გავრცელებული ინტერვიუდან:
_ თქვენი აზრით, რა იყო სამსახურიდან დათხოვის მიზეზი?
_ მიზეზი პოლიტიკური შეხედულებები იყო. არ გავითვალისწინე მათი მოთხოვნები, რასაც მავალებდნენ.
_ რას გავალებდნენ?
პირადობის მოწმობისა და ხელმოწერების შეგროვებას, აქტიურობას შეხვედრების დროს „ნაციონალური მოძრაობის“ მხარდასაჭერად აქციებზე. რა ვქნა, ვერ გამოვხატე, ვერ გავაკეთე, ვერ გავიზიარე, ვერ შევასრულე მათი მოთხოვნები და ახლა დავისაჯეთ ამის გამო? ახლა კი ყველაზე საშინელი და ფაქტი, რომელმაც სამი მცირეწლოვანის მამა შოკში ჩამაგდო, ისაა, რომ ჩემი მეუღლე სამსახურიდან გაათავისუფლეს.
_ თქვენი მეუღლის გათავისუფლების მიზეზი რა იყო?
_ სამი მცირეწლოვანი შვილის დედა, ქალბატონმა მაკა ჭყონიამ, ე.წ. ბაღების გაერთიანების დირექტორმა, რომელიც “ნაციონალური მოძრაობის” ყველაზე აქტიური მხარდამჭერი და მათი დავალებების უბადლო შემსრულებელია, ცინიკური და ამაზრზენი პასუხით გამოისტუმრა, _ ხელშეკრულებას აღარ ვაგრძელებო. რატომო რომ ჰკითხა, ეს “ნაციონალებს” და ახალ გამგებელს, შარაშენიძეს ჰკითხეო.
მაკა ჭყონია: პოლიტიკური შეხედულება?! საჯაროდ ვაცხადებ, რასაც ბატონი ლადო ჟურნალისტთან საუბრისას აცხადებს არის სრული ტყუილი. ჩემსა და მის მეუღლეს შორის არ შემდგარა არანაირი სახის საუბარი (არც სატელეფონო, არც პირადი), სადაც მე შემეძლებოდა ცინიკურად და ამაზრზენად მეპასუხა მისთვის. ართუ თეა ხომერიკისთვის, არამედ არცერთი ჩემი თანამშრომლისთვის არ მომითხოვია პირადობის მოწმობები და არცერთი განთავისუფლებული ადამიანისთვის არ გამიცია ზემოთხსენებული პასუხი, “ეს “ნაციონალებს” და ახალ გამგებელს, შარაშენიძეს ჰკითხეო.” _ სრული პასუხისმგებლობით ვაცხადებ, რომ, ეს არის ლადო გიორგაძის მიერ მოგონილი ტყუილი.
არ მინდა დავწვრილმანდე, თუმცა არ შემიძლია არ შევეხო სტატიაში ნახსენებ, ჩემს პოეტურობას, რომელიც ასევე გიორგაძის მიერ მოგონილი ტყუილია! პირადად მე, ლექსი არასოდეს არავისთვის მიმიძღვნია.
(სტილი დაცულია)
“გურია ნიუსი” ლადო გიორგაძეს დაუკავშირდა.
_მე ყველა კითხვას გავცემ პასუხს ფაქტებით და დასაბუთებულად. ახლა ვიმყოფები თბილისში და ვაპირებ ადამიანის უფლებათ დაცვის ორგანიზაციას მივმართო, მივმართავ სახალხო დამცველს, ასევე ბავშვთა დაცვის ორგანიზაციას, იმიტომ, რომ ქალბატონი მაკა ჭყონიას მხრიდან ადგილი ჰქონდა ზეწოლის ფაქტებს ბავშვებზე, როგორ შეიძლება მსგავსი ასაკის ბავშვები, პრეზიდენტის თითქმის ყველა ჩამოსვლაზე, საათობით ჭყლეტაში მოაყოლო? ან ღამის 11 საათზე რესტორანში რა უნდოდა ბავშვებს რამაზ ნიკოლაიშვილის საპატივცემულოდ? ქალბატონმა მაკამ ბაღის ბავშვები გამოიყენა პოლიტიკური სიტუაციისთვის, რომლის ფაქტებიც მაქვს და რაც მთავარია, უპირველესად პროკურატურას მივმართავ, სადაც შემაქვს განცხადება. აუცილებლად შეისწავლონ და გამოიკვლიონ სკოლამდელი სააღმზრდელო-საგანმანათლებლო ცენტრის ფინანსური დოკუმენტაცია. ჩაატარონ ფინანსური აუდიტი. ჩემს მიერ გაკეთებულ განცხადებაში თითოეული სიტყვა არის სიმართლე. ქალაბატონმა მაკა ჭყონიამ ყველა „ნაც.მოძრაობის“ აქტივისტი დატოვა სამსახურში და „ქართული ოცნების“ მხარდამჭერები სამსახურიდან გამოუშვა. ამ ქალბატონმა გამგებელს გადააბრალა თანამშრომლების გათავისუფლების პროცესი. სრული პასუხისმგებლობით ვაცხადებ, რომ ქალბატონმა მაკა ჭყონიამ ლექსი მიუძღვნა რამაზ ნიკოლაიშვილს. ღონისძიებაზე დაგეგმილი იყო მისი გამოსვლა, მაგრამ როცა დაინახეს ჟურნალისტები, ეს ლექსი რეპერტუარიდან ამოიღეს, მე ამის დამადასტურებელი ფაქტიც მაქვს, ხელნაწერიც, რომელსაც აუცილებლად გადმოგცემთ.
მივმართავ პროკურატურას, რათა შეისწავლოს სკოლამდელი სააღმზრდელო-საგანმანათლებლო ცენტრის ხელმძღვანელის ქალბატონ მაკა ჭყონიას საქმიანობა, _ აცხადება ლადო გიორგაძე “გურია ნიუსთან”.
